Ñahendu Jesús. Viernes 15º Durante el Año

Escucha el evangelio y la reflexión en: https://youtu.be/C3QCG6aHoyo

Viernes 15º Durante el Año Mateo 12, 1 – 8

Peteĩ sábado árape, Jesús ohasa ohóvo peteĩ kokue rupi idisípulo kuéra ndive. Umi idisípulo iñembyahýigui, oñepyrũ oipo’o trígo ra’ỹi ha ho’u ohóvo hikuái. Umi fariséo ohechávo upéva, he’i Jesúspe: — Ema’ẽmi mba’épa ojapo hína nde disípulokuéra. Péicha ndajajapóiva pytu’uha árape.

Jesús katu he’i chupekuéra: — Ndapeikuaái nga’u piko mba’épa David ha iñirũnguéra ojapo raka’e ku iñembyahýi ramo guare. Oike hikuái tupaópe ha ho’u umi pan Ñandejárape oñemboyke va’ekue. Ha’e kuéra niko ndaikatúi va’ekue ho’u umíva. Pa’ikuérape guarãnte vaekue niko. Ndapeikuaái avei piko Moisés léipe he’iha, pa’ikuéra ikatuha hembiapo pytu’uha árape tupaópe, ha avave ndaikatuiha he’i hesekuéra mba’eve.

Añete ha’e peẽme, pende apytépe oĩ hína ko’ágã peteĩ tuichavéva tupaógui. Peẽ ndapeikuaái hína mba’épa he’ise ku Ñandejára Ñe’ẽme he’írõ “Che aipota peiporiahuvereko pende rapichápe, pene rymba peikuave’ẽ rangue chéve ofréndarõ.”

Péva peikuaa rire, napemboja reíri va’erã mo’ã avavére hembiapo vaiha. Ha che poguýpe oime avei hína ha’évo mba’e-mba’épa ikatu ojejapo pytu’uha árape.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Heta ningo jareko ley ha artículokuéra, oñemoĩva ñane akã ári. Umi ikatúva jajapo ha ndaikatúiva jajapo oĩmba hína lívrope, he’íva lo mitã ñe’ẽ. Oime ñane Constitución, decreto, ordenanza municipal, estatuto, reglamento. Ndofaltái ningo ley oparupiete. Organización, escuela, tupaópe jepe oime hína la condición oñemoĩva ñandéve ha mba’éichapa ñamboguata vaerã opa mba’e. Ha umíva niko ñaikotevẽ ikatu haguãicha jajorrespeta, jaiko peteĩ guatápe ha ñañombojojapa.

Opa umi ley, decreto, reglamento, ordenanza kuéra, taha’e ñande sociedad, térã ñande Iglésia rehegua, oĩ vaerã ñanepytyvõ haguãicha. Umíva ha’e tembiporu oñemoĩva jaiko porãve haguã oñondive ñande sociedad pe ha Ñandejára rapére. Ndaha’éi va’erã niko ñane mbyai ha ñande rape joko haguã.

Ñahendu angete umi fariseokuéra oiko vai Jesús ndive, idisípulokuéra ndojapói haguére pe léi he’i haichaite. Iñembyahýigui hikuái oipo’o kokuégui trígo ha ho’u ohóvo. Ha péva sábado árape ndikatúi kuri ojejapo iléikuérape.

Jesús katu odefende ichupekuéra ha he’i pe tapicha ohasa asýva ha oikotevẽvape ndaikatúi jajopyve ley rérape ha ñambohasa asyve. Ha Ñandejára oipotaha ñane rakate’ỹ ñande rekovére ha ñande rapicha rekovére ha’e hakate’ỹ háicha ñande rehe. Ha pe ley, taha’e ha’éva, ñande reko asy, ñande jopýva ha ohupíva ñande ári ikatu’ỹva jaropu’aka, natekotevẽi ñapena.

Oimépa hína nde che irũ ha che reindy, ley, reglamento umíva, oñemoĩva ne akã ári ha nepytyvõ rangue ndereko asyvéva. Mba’éichapa ikatúne umíva jaipe’a ha ñambopyahu. Mba’éichapa ikatúne péva jajapo.

Pa’i Alberto Luna.