Ñahendu Jesús. Viernes 2º Tiempo Durante el Año

Escucha el evangelio y la reflexión en: https://youtu.be/632uISgUURE

Viernes 2º Tiempo Durante el Año Marcos 3, 13-19

Upéi Jesús ojupi peteĩ sérrope ha ohenói umi ohenoiseva’ekuépe. Oñembyaty rire, oiporavo 12 ijapytéguikuéra, omoirũ haguã chupe ha omondo haguã omyerakuãvo iñe’ẽ. Ko’ãvape ombohéra apóstol, ha ome’ẽ chupekuéra pu’aka omosẽ haguã umi añáme.

Ko’ãvahína umi 12 ha’e oiporavova’ekue: Simón, ha’e ombohérava’ekue Pedro, Zebedeo ra’ykuéra Santiago ha ityvýra Juan, umívape ha’e ombohéra Boanerges, Andrés, Felipe, Bartolomé. Mateo, Tomás ha Alfeo ra’y Santiago, Tadeo, Simón hetã rayhúva, ha Judas Iscariote, pe upéi omoñuhãva’ekue Jesúspe.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Aty guasúpe niko ñakañýma ojuehegui, ndajajokuaapavéima. Hetaiterei ñaiméramo ndaikatuvéima ñañemongeta porã oñondive. Ñandejára peguarã katu nañakañýi, ñande retáramo jepe. Ha’e ñane renói ñande réra rupi, peteĩ teĩme ñanemohenda ha ome’ẽ ñandéve ñane rembiaporã.

Ñandejára niko ome’ẽ ñandéve tembiporu porã. Ñane akã, ñande po, ñande py, ñande resa, ha ojerovia ñande rehe. Ha’e ndojapói upe ñande jehegui ikatúva jajapo.

Ha’e oipota ñande jajevale, ani jajerure chupe upe ñande voi ikatúva jajapo. Jahecha Jesús ohenói iñirũrã umi 12 apóstol, oime haguã ijykerete, ojokuái haguã chupekuéra, oho haguã upérupi oñemoñe’ẽ hapichápe.

Jesús oheja hekoviarã, ikatúva upéi omyakã tembiapo Iglésiape, ombyaty ha oisãmbyhy va’erãva umi Jesús rehe ojeroviávape. Ñande Iglésiape umi omyakãva ha’e ñande obispo kuéra, opytáva apóstolkuéra rekovia ha omosãva ñande jerovia rape ymaite guivéma oúva, Jesús ete omoñepyrũ va’ekue ha oguahẽva ñandéve ko’ãgaite peve.

Ñande avei che irũ ha che reindy, ñande karai ramo guare, ñañehenói ñande réra rupi ñamoirũ haguã Jesús pe. Ñañembyaty haguã ñande rapicha kuéra ndive ha jaguata haguã oñondive Jesús rapére. Ha’e ñanembokatupyry ha ome’ẽ ñandéve pe pu’aka ñaikotevẽva, jajapo haguã hérape upe otokáva ñandéve. Jaha rei katu hese.

Pa’i Jasy.