VIERNES 8º TIEMPO DURANTE EL AÑO
1 junio, 2023SOLEMNIDAD DE LA SANTÍSIMA TRINIDAD
4 junio, 2023LECTURA PETEÎHA:
Ko’ágã ñahendúta Tupã Ñandejára ñe’ẽ Eclesiástico arandukápe oĩ háicha 51, 12-20a
Tupã Ñandejára romboaguyjéta ha roguerohorýta. Aguerohorýta Tupã Ñandejárape imba’e porãgui, imborayhu ndopáigui araka’eve.
Che mitã rusúrõ gueteri, aiko mboyve opa rupi, aheka va’ekue arandu che py’aite guive.
Che mitã rusu guive aheka va’ekue, ha amano meve akóinte ahekáta.
Parral apesãicha hi’aju va’ekue ohóvo ha che mbopy’a rory.
Apia’ỹre, hape rupi aguata aikóvo ipyporére che mitã rusu guive.
Ajapysaka mírõ guarã hese heta ite ajuhu pype ikuaapyrã.
Hese ae heta mba’e aikuaa, upévare pe che mbo’eharépe, ajapo iterei mba’érõ. Ha’e va’ekue aiko haguã ha’e che mbo’e háicha, che akã raku hese ha nambyasy mo’ãi. Che tarovaite va’ekue hese ha che resa ndaipe’avéi ichugui, che pojái va’ekue hese pe yvate oĩháme, ha ambyasy ymavéma ndaikuaái hague.
Hesehápe ajei va’ekue ivaíva apógui, teko potĩ rupi ahupity ichupe, hese ae ahupity akã porã iñepyrũha guive, upévare ndaheja mo’ãi.
Tupã Ñandejára Ñe’ẽ
SALMO ÑEMBOHOVÁI 18, 8-11
Opavave: Ne rembiapo porã omokorasõ rory Tupä Ñandejárape.
Tupã Ñandejára rembiapoukapy ndaijojahái, ñane mbopy’a rory.
Tupã Ñandejára rembiapoukapy ijeroviaha,
omoarandu oikuaa’ỹvape. O.
Tupã Ñandejára rembiapoukapy oĩ heko itépe, ñane korasõ ombovy’a.
Tupã Ñandejára rembiapoukapy hesakã, ñande resape’a. O.
Tupã Ñandejára ñe’ẽ na imeguãi ha ndahekoviái, oiko opa árape guarã.
Tupã Ñandejára mbojovake hína añetegua
opa ara ite heko jooja. O.
Iporãiteve óro ojajaipávagui, umi óro iporävévagui;
he’ẽve eiretégui ka’aguýgui osyrýva káva raitýgui. O.
ALELUIA Cf. Col 3, 16a. 17c
Aleluia.
Ñandejára Jesucristo ñe’ẽ toiko pende pype opa ite mba’e porã reheve;
peaguyjeve me’ëvo ichupe ha Tupã ñande Rúpe.
Aleluia.
EVANGELIO
Ñahendúta Ñandejára Jesucristo rekove ha hemimbo’e San Marcos omombe’u háicha 11, 27-33
Upe ramo Jesús omosẽ rire Tupãógui umi oñemúvape ha ohepyme’ẽva opa mba’épe, oho jevy hikuái Jerusalénpe. Oguata aja pe Tupao rupi oguahẽ hendápe pa’i ruvichakuéra, Moisés rembiapoukapy mbo’eha ha moakãhára kuéra. Oporandu ichupe hikuái: Máva piko oheja ndéve rejapo haguã ko’ã mba’e? Máva pokatu rupi reju? Jesús ombohovái ichupekuéra:
Che avei aporandúta peẽme peteĩ mba’e, ha peje ramo chéve, ha’éta peẽme mba’éicha rupípa ajapo ko’ã mba’e. Peje chéve: Máva piko ombou raka’e Juánpe oporomongarai haguã? Tupã Ñandejára térã piko yvypóra?
Ha’e kuéra katu oñepyrũ oñomongeta kyre’ỹ oñondive, ha he’i: “Ja’e ramo Tupã Ñandejára ombou hague ichupe, he’íta ñandéve: ‘Mba’ére ndaperoviái ra’e ichupe?’ Ha ja’e ramo yvypóra hague…”
Okyhyje hikuái opavave opu’ã ramo guarã hese kuéra, ogueroviágui hikuái Juan maranduhára hague. Upévare he’i hikuái Jesúspe: Ndoroikuaái.
Upépe Jesús he’i ichupekuéra: Upéicharõ, che avei namombe’u mo’ãi peẽme máva pokatu rupípa ajapo ko’ã mba’e.
Ñandejára Jesucristo Ñe’ẽ.