SÁBADO TRIGÉSIMO PRIMERO DURANTE EL AÑO

LECTURA PETEÎHA:

Ñahendúta Tupã Ñandejára Ñe’ẽ San Pablo ohai va’ekue Roma guápe 16, 3-9. 16. 22-27

Che pehẽnguekuéra: Pemo maiteimi Prisca ha Aquílape, che rembiapo irũ Jesucrístope guarã mba’apópe. Ha’ekuéra, nahakate’ỹi va’ekue hekovére, omo’ã haguã che rekove. Ame’ẽ che aguyje ndaha’éi ichupekuéra añónte, umi ñane pehẽngue kuéra Tupã Ñandejára iglésia judio’ỹvape avei.

Pemo maitei avei umi Prisca ha Áquila rógape oñemboatývape. Pemo maitei pe ahayhu etéva che irũ Epénetope, ha’e raẽvete Ásiape oguerovia va’ekue Crístope. Pemo maitei Maríape, heta ite omba’apo va’ekue pende rehe.

Pemo maitei che retãgua Andrónico ha Juníaspe, che irũ va’ekue yvyrakuápe. Ha’ekuéra ojekuaaiterei va’ekue umi apóstol apytépe, ha oguerovia va’ekue hikuái Jesucrístope che mboyve. Pemo maitei Ampliátope, ahayhuetéva che irũ Ñandejára reroviápe. Pemo maitei Urbánope, ñane irũva Cristo rehegua mba’apópe, ha pe ahayhu etéva Estáquispe.

Peño momaitei peteĩ ñehetũ marangatúpe. Opa Jesucristo iglésia pene momaitei. Che, Tercio, ajapóva hína ko kuatiañe’ẽ, arahauka avei peẽme che maitei, Ñandejára rérape. Pene momaitei Gayo. Aime hína hógape, ha avei Jesús iglésia. Pene momaitei avei Erasto, táva pegua viru ñangarekoha, ha ñane pehẽngue Cuarto. Ñandejára Jesucristo ta pende rovasa. Amén.

Ñamo mba’e guasu Tupã Ñandejárape, ikatúva pene mombarete marandu pyahu che amoasãiva ha Jesucristo rehegua tekombo’e rupi. Kóva oĩ pe Tupã Ñandejára mba’e ñemi omombe’u va’ekuére, okañy va’ekue ko yvy oĩ mboyve guive, ha Ko’ágã oñemoesakãva umi maranduhára kuatiañe’ẽ rupi, Tupã Ñandejára opa’ỹva omoĩka va’ekue.

Ko mba’e ñemi Tupã Ñandejára rembipota rehegua, ojekuaauka opa tetãme, oguerovia ha ojapo haguã. Tupã Ñandejára peteĩ ntéva ha iñarandúvape guarã, teko mimbipa opa ára guarã, Jesucristo rupi! Amén.

Tupã Ñandejára Ñe’ẽ.

SALMO ÑEMBOHOVÁI 144, 2-4. 6. 10-11

Opavave: Tupã Ñandejára, ára ko’ẽre romomba’e guasúta.

Ára ko’ẽre romomba’e guasúta,
ha nde réra amomba’éne opa ára.
Ñandejára niko tuicha hína, ituichakue ndaikatúi jaikuaapa.
Ichupe ñamomba’e guasu va’erã. O.

Túvakuéra omombe’úne ta’ýra kuérape ne rembiapokue,
ha’ekuéra omoherakuãne umi mba’e tuicha ite rejapóva.
Omombe’úne hikuái mba’éichapa remimbipa,
ha che aikuaaukáne umi mba’e rechapyrã rejapóva. O.

Opa ne rembiapokue ta ne momba’e guasu, Ñandejára,
opa nde rehe ojeroviáva ta ne momba’e guasu.
Ha’ekuéra to moerakuã tuichaha upe ne retã,
ha’ekuéra toikuaauka nde ne mbareteha. O.

ALELUIA 2Cor 8, 9

Aleluia.
Ñandejára Jesucristo imba’e reta ramo jepe oñemomboriahu ñande rehehápe, ikatu haguäicha ñane momba’e reta imboriahu reheve.
Aleluia.

EVANGELIO

Ñahendúta Ñandejára Jesucristo rekove ha hemimbo’e San Lucas omombe’u háicha 16, 9-15

Upe ramo Jesús he’i hemimbo’ekuérape: “Ha’e peẽme peipuru haguã opa herekopy ko yvy arigua peñe moirũ heta haguã. Péicha umi mba’eta opávo oĩta pene moguahẽva óga opa ára guarãme.”

Pe mba’e michĩvape heko potĩva, heko potĩ avei hetávape; ha pe ipojoja’ỹva mba’e michĩme, ndaikatúi avei ipojojávo mba’e hetápe. Ha upéicha, umi mba’e reta gua’u ko yvy arigua ndive peẽ napendereko potĩri ramo, máva piko ojeroviáta pende rehe ome’ẽ haguã peẽme umi mba’e reta añeteguáva? Ha na pende reko potĩri ramo pene mba’e’ỹre, máva piko ome’ẽta peẽme pe pene mba’éva?

Peteĩ tembiguái ndaikatúi ijára mokõivo. Ndaija’éine peteĩre ha ohayhúne pe ambuépe, térã ombojeroviáne peteĩme ha ojahéine pe ambuére. Ndaikatúi ñambojerovia Tupã Ñandejárape ha virúpe oñondive.

Umi fariséo, viru ohayhúva, ohendu opa ko’ã mba’e ha oñembohory Jesús rehe. Jesús he’i ichupe kuéra: Peẽ hína umi pehasáva heko jojávarõ opavave renondépe, Tupã Ñandejára katu oikuaa hína pende py’apy. Tupã Ñandejára no momba’éi umi mba’e yvypórape guarã iporãvéva.

Ñandejára Jesucristo Ñe’ẽ.