VIERNES TRIGÉSIMO SEGUNDO DURANTE EL AÑO
16 noviembre, 2023DOMINGO SEMANA XXXIII TO
19 noviembre, 2023LECTURA PETEÎHA:
Ko’ágã ñahendúta Tupã Ñandejára ñe’ẽ Sabiduría arandukápe oĩ háicha 18, 14-16; 19, 6-9
Py’aguapy ha kirirĩ opa mba’e oñuã, ha pyhare pyte Oguahẽvo ne ñe’ẽ ipu’akapáva, ñorairõhára py’a guasúicha yvágagui ojepoi, nde guapyha mimbipágui, ha ho’a upe yvy ári oñehundíma haguã.
Ne rembipota ipópe kyse rãimbe ramo guáicha, omosarambi opa rupi te’õngue. Opoko javeve yvágare yvy ári itenonde. Opa ko yvy, nde pokatu rupi, omoambue heko tee ani ojehu mba’eve ivaíva nde ra’ykuérape.
Ojehecha pe arai omo’ã ramo hekohakuéra. Y rendaguépe iñapekãvo pe yvy Mar Rójogui. Oiko tape potĩ, ñu ne porãva y pochy pa’ũme.
Upe rupi ohasa hikuái, nde pópe oñemo’ãvo, ohechávo mba’e imomorãmby.
Ha’ete umi kavaju okarúva kapi’ipety rovyũ porãme, ha ovecha ra’ỹicha isaraki, ne momba’e guasúvo, Tupã Ñandejára, Nde, imosãsohára.
Tupã Ñandejára Ñe’ẽ.
SALMO ÑEMBOHOVÁI 104, 2-3. 36-37. 42-43
Opavave: Tupã Ñandejára rehe ojeroviáva to vy’a.
Ichupe peropurahéi ha pemoherakuã imombe’upyrãva
ha’e ojapo va’ekue .
Héra marangatu pembotuicha.
Tupä Ñandejára rehe ojeroviáva to vy’a. O.
Upéi katu ojuka mayma memby ypykue,
opaite mitã ypykue ojuka Egíptope.
Israel guápe oguenohẽ pláta ha oroita reheve,
ndaipóri ikangýva ijapytépekuéra. O.
Imandu’a iñe’ẽ marangatúre
ome’ẽ va’ekue hembiguái Abrahámpe.
Oguenohẽ hetãme vy’a pópe,
ha hembiporavokuéra osapukái rory osẽvo. O.
LECTURA MOKOÎHA
Ñahendúta Tupã Ñandejára Ñe’ẽ San Juan ohai va’ekue Kuatiañe’ẽ mbohapyhape 5-8
Che pehẽngue ahayhúva: Hekopete niko rejapo umi mba’e rejapóva umi ñane pehẽnguére, ha umi mombyrygua upe rupi ohasávape jepe.
Upévare niko ñandéve ho’a ñaipytyvõ haguã ichupekuéra, ikatu haguã ha’ekuéra omoherakuã umi mba’e añeteguáva.
Tupã Ñandejára Ñe’ẽ.
SALMO ÑEMBOHOVÁI 111, 1-6
Opavave: Ovy’a upe omomba’éva Tupä Ñandejárape.
Ovy’a upe omomba’éva Tupã Ñandejárape,
ha ipy’a rory ojapóvo hembiapoukapy.
Iñemoñare imbareténe ko yvy ári,
heko potĩva ra’y kuéra ojehovasáne. O.
Hógape opa mba’e oguerekóne,
ha ipojeráne opa árape.
Pytümbýpe jepe oĩ ohesapéva heko potĩvape,
ha upéva ipy’a porã, oporo poriahuvereko ha heko joja. O.
Ovy’a upe ipy’a ite guive oiporukáva hapichápe,
ha opa oguerekóva ogueroguata hekópe.
Hekojojáva ndojecha vai chéne, opa ára oikóne hese mandu’a. O.
ALELUIA Cf. 2Tes 2, 14
Aleluia.
Tupã Ñandejára ñane renói Marandu pora rehe ae,
jahupity haguã Ñandejára Jesucristo réra herakuã porãva.
Aleluia.
EVANGELIO
Marandu porã Ñandejára Jesucristo rekove ha hemimbo’e San Lucas omombe’u háicha 18, 1-8
Upe ramo Jesús omombe’u ichupe kuéra peteĩ ñe’ẽ mbojoja, ombo’e haguã ichupe kuéra oñembo’e va’erãha, ipy’a kangy’ỹre.
He’i ichupekuéra: “Oĩ va’ekue peteĩ távape peteĩ mbojovakehára ndokyhyjéiva Tupã Ñandejáragui ha nomomba’éiva yvypórape. Ha upe táva upévape oĩ avei peteĩ kuña imenave’ỹva oguerekóva peteĩ ambuéndi ojoavyha, ha ohóva upe mbojovakehára rendápe ojerurévo ichupe ñepytyvõre.
Heta ára pukukue, upe mbojovakehára nohenduséi ichupe, upéi katu ojepy’a mongeta: ‘Ndakyhyjéirõ jepe Tupã Ñandejáragui ha namomba’éi yvypórape, ko kuña imenave’ỹmava che moangekói oikóvo. Aipytyvõta ichupe anive haguã ou ha che mbyaju.’”
Ha Jesús he’ive: “Péicha he’i pe mbojovakehára ñaña. Ha néi, Tupã Ñandejára nga’u piko noipytyvõ mo’ãi avei umi oiporavo va’ekuépe, ohenói asýva ichupe ára ha pyhare? Omoha’arõta piko? Ha’e peẽ, oipytyvõ va’erãha pya’ete. Ha ou jevy vove Tupã Ñandejára ra’y ou va’ekue yvypóraicha, ojuhúne gueteripa jerovia ko yvy ape ári?”
Ñandejára Jesucristo Ñe’ẽ.