DOMINGO TRIGÉSIMO DURANTE EL AÑO

LECTURA PETEÎHA:
Ko’ágã ñahendúta Tupã Ñandejára ñe’ẽ Jeremías arandukápe oĩ háicha 31, 7-12

Ñandejára he’i: “Pesapukái vy’apópe ha pevy’a Jacob retã rehe, upe itenondéva opa tetã apytépe. Pemyerakuã porã ichupe ha peje: ‘Ñandejára oipe’a ivaívagui hetã guápe Israel rembyrépe.’ Tetã yvate gotyo guágui pogueru jevýta, ha yvy apýra ruguágui pombyatýta.

Hendivekuéra oúta ohecha’ỹ ha ikarẽva, kuña hye guasúva ha umi imemby ramóva. Heta iterei umi oútava! Oñembo’e ha hasẽta oúvo. Hi’y hetahápe araháta ichupekuéra, yvy joja porã rupi, ani oñepysãnga. Che niko hína Israel ru ha che ra’y ypykue hína Efraín.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 125, 1-6

Opavave: Tuicha mba’e Ñandejára ojapo va’ekue ore rehe.

Ore Jára ore reraha jevy ramoguare Siónpe
iñapytĩmby rojerereko haguégui tetã mombyrýpe,
ha’ete vaicha ku ore képe rohecha va’ekue
Upéma ramo ropuka reípa vy’águi ha rosapukái joa va’ekue. O.

Ambue tetã rupi oje’e ore rehe:
“Tuichaite mba’e niko Ñandejára ojapo hesekuéra”.
Tuicha mba’e Ñandejára ojapo va’ekue ore rehe.
Ha tuicha rovy’a va’ekue upe ramo. O.

Ore Jára! Eme’ẽ jevy oréve umi mba’eta roguereko va’ekue,
ku ama omyenyhẽ háicha umi ysyry.
Umi tesaýpe oñemitỹ va’ekue
vy’a pópe omono’õne ikoga’a. O.

Upe tesaýpe osẽva
mba’e ra’ỹi ipo renyhẽ oñotỹ haguã
vy’a pópe ou jevýne
koga’a apesã ipópe. O.

LECTURA MOKÕIHA:

Ko’ágã ñahendúta kuatia ñe’ẽ ojehai va’ekue Hebreoskuérape 5,1-6

Che pehenguekuéra: Oimeraẽva pa’i guasu ojeporavo yvypóra apytégui, ha oñemoĩ omba’apo haguã yvypóra rehehápe Ñandejára renondépe, omoguahẽ haguã kuave’ẽmby ha mymbajuka yvypóra angaipa rehe. Ha pe pa’i ikangýgui avei oimeraẽva yvypóraicha, ikatu oiporiahuvereko umi oikuaa’ỹgui iñangaipáva ha heko porã’ỹvape. Ha upe ha’e ikangýgui voi oikuave’ẽ va’erã mymbajuka iñangaipa rehe, ha yvypórakuéra angaipa rehe avei.

Avave ndaikatúi oñemoĩvo ha’e voi pa’i guasu ramo. Ñandejára hína pe ombojeroviáva ichupe upe mba’épe, ojapo haguéicha Aarón rehe. Upéicha avei, Cristo noñemoĩri va’ekue ha’e voi Pa’i Guasu ramo. Ñandejára hína pe omoĩ va’ekue ichupe.

He’i voi niko ichupe: “Nde ha’e che ra’y. Che romo ñemoña ko árape”.

Ha he’i avei ichupe Ñandejára Ñe’ẽme “Nde ha’e pa’i opa ára guarã Melquisedec chagua”.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Cf. 2 Tim 1, 10b
Aleluia.
Cristo Jesús rupi, pe ñane pysyrõva. Ha’e upe ohundi va’ekue ñemano ha
marandu porã rupi ohechauka pe jeikove opa’ỹva.
Aleluia

EVANGELIO
Marandu porã Ñandejára Jesucristo rekove ha hemimbo’e San Marcos omombe’u háicha 10, 46-52

Jesús ha idisípulokuéra oguãhẽ Jericópe. Ha osẽvo hikuái upégui, heta umi ohóva hapykuérikuéra. Pe tape yképe katu oguapy hína peteĩ tupãmba’e ojeruréva, ha ohecha’ỹva. Héra Bartiméo, Timéo ra’y. Ha ohendúvo Jesús ku Nazaretgua, ohasaha ohóvo hína upe rupi, oñepyrũ osapukái: — Nde Jesús Mesías, che poriahuverekomína.

Heta katu oĩ ojeréva ha he’íva chupe okirirĩ haguã. Ha’e katu hatãve osapukái:— David ra’y, ore poriahuverekomína.

Upépe Jesús opyta ha he’i: — Peje chupe tou.

Ha he’i hikuái Bartiméope: — Pya’éke epu’ã eju. Nerenói niko hína. Pe ohecha’ỹva oity ijahoja, opo opu’ã ha oñemboja Jesús rendápe.

Jesús oporandu chupe: — Mba’éiko reipota ajapo nde rehe.

Pe ohecha’ỹva he’i chupe: — Mbo’ehára, ahechasemínteko.

Jesús he’i chupe: — Terehóntema. Che rehe rejerovia haguére rekuera. Upepete pe ohecha’ỹva ohecha sapy’a, ha oho Jesús rapykuéri.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.