Ñahendu Jesús Ñe’ẽ. Sábado 30º Durante el Año

Escucha el evangelio y la reflexión en: https://youtu.be/cr2UFJAVu64

Sábado 30 Durante el Año Lucas 14, 1. 7 – 11

Peteĩ pytu’uha árape, peteĩ fariséo okonvida Jesúspe oho haguã osena hendive hógape. Ha opa umi oĩva upépe omaña joa hína Jesús rehe.

Jesús ohecha mba’éichapa umi oñekonvida va’ekue, tenondete voi oho oguapy. Osẽ he’i chupekuéra: Reñekonvidárõ menda hápe, anítei reho reguapy pe mesa akãme voi. Cháke ikatúne oguãhẽ peteĩ tuichavéva ndehegui. Ha upe ne konvida va’ekue oúne he’i ndéve: “Epu’ãta mante oguapy haguã kóva”. Tuicha ñemotĩ rehasáne. Upéi ave, rehóne eguapy amo huguaitépe.

Reñekonvidárõ katu, tereho eguapy amoite huguápe. Ágã nde rechávo pe ne konvida va’ekue, oúne he’i ndéve: “Che irũ, ehasána eguapy amo iñakãme”. Upéicharõ, umi oguapýva nde yke rupi, tuicha nembojerovia vaerã. Umi ojejapo ha oñembotuicháva niko oñemomichĩ va’erã ágã, ha umi heko mirĩva katu oñembotuicháne.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Avave niko nosẽ vaiséi upe oike hápe, ha avave ndaitapykueséi. Jaha ramo so’o hápe ha ñande tapykue niko ikanguekue mante jaguerúta. Ndajaperdeséi ningo, jaipota ñande club osẽ campeón, ndajapytaséi koléro. Ha jaha ramo ñaha’ã partido ñane irũnguéra ndive niko nañanerembyséi, jaikese avei, ñandejase. Ha jakaru ramo katu, ndajapytaséi mesa guýpe. Ndaivaíri niko upéva. Hi’ã niko ñandejapa, jareko ñane rendaguã, tañande ropyty joja opavavépe. Ani avave oñembo’yke, ha hemby.

Ko’ápe Jesús ohecha mba’éichapa umi fariseo itaryrýi ojechaukaségui, oipotágui opavave oguerohory ha oguerochichĩ chupekuéra. Ha upéva Jesús ndohecha porãi. Pe ñemoĩse ñande rapicha akã ári ha ñaimo’ã ñandéntema voi mba’e guasuha, ha ñande resarái ñande rapichágui ñaimeségui tenondete. Iporãve, he’i Jesús, ñame’ẽ ambuépe hendaguã. Ani ñandetaryrýi.

Péicha jajapóramo, che reindy ha nde che irũ, tuicha hekoviáta ñandéve, he’i Jesús. Ñandejára ohechakuaa ha oguerohorýne ñañembotapykue imi hague ñamotenonde haguã ñande rapicha. Ha ñane renóine amo huguaiteguive.

Upépe ñapu’ãta ñande juruvy ha ñande aguara syry jahávo púnta itépe jaguapy, ijykerete mesa guasúpe, opavave renondépe.

Pa’i Jasy.