LECTURAS CRISTO REY ARETE GUASU

LECTURAS CRISTO REY ARETE GUASU

LECTURA PETEÎHA:
Ko’ágã ñahendúta Tupã Ñandejára ñe’ẽ Samuel aranduka mokõiháme oĩ háicha 5, 1-3

Upe rire opa Israel ñemoñaregua oho Hebrón pe oñe’ẽ haguã David ndive ha he’i hikuái ichupe: “Ore niko nde ruguy tee, ha Saúl ramo jepe ore ruvicha guasu, ndénte voi reisãmbyhy va’ekue Israel guápe ñorairõháme. Hi’arive, Ñandejára ome’ẽ ndéve iñe’ẽ ndetaha upe omyakãva ha oisãmbyhýva Israel”.

Upéicha opa myakãhára Israelgua oho ha oñe’ẽ David ndive Hebrón pe, ha ha’e oñoñe’ẽ me’ẽ hendivekuéra, omoĩvo Tupãme mba’e rechaha ramo. Upéma ramo ha’ekuéra omoĩ Davíd pe Israel ruvicha guasu ramo.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 121, 1-2. 4-5

Opavave: Jaha vy’apópe Tupaópe.

Avy’aite chéve oje’e ramo: “Jaha tupaópe”.
Jerusalén! Ne rokẽmema roñembo’y. O.

Upépe ojupi Israel ñemoñareguakuéra,
Ñandejára réra omomba’e guasúvo,
ojeheja haguéicha ichupekuéra tembiapoukapy ramo.
Upépe oguapy mburuvicha guasu David rogagua,
teko jojápe oporombojovake haguã. O.

LECTURA MOKÕIHA:
Ñahendúta Tupã Ñandejára Ñe’ẽ San Pablo ohai va’ekue Colosas guápe 1, 12- 20

Che pehenguekuéra: Peme’ẽne pende aguyje ñande Túvape, pene mbokatupyrýva pehupity haguã avei pe ha’e ome’ẽtavagui Tupã mba’évape, ha’e oisãmbyhy mimbihápe.

Tupã niko ñande pe’a pytũ poguýgui ha ñande reraha pe Ta’ýra ohayhuetéva oisãmbyhyhápe. Ha’e rupi ñane pysyrõ ha ojeheja reipa ñandéve ñane angaipa.

Cristo rehe jahecha, Tupã ikatu’ỹva ojehecha. Ha’e hína ta’ýra ypykue, opa mba’e mboyve guare. Ha’e rupi, Tupã ojapo ypy opa mba’e oĩva yvágape ha yvýpe, ojehechava ha ojehecha’ỹva, ha avei umi espíritu yvategua opa mba’e oguerekóva ipoguýpe ha imbaretéva. Opa mba’e ojejapo va’ekue ha’e rupi ha ichupe guarã.

Cristo hína opa mba’e mboyve ha ha’e rupi opa mba’e oĩ hendápe. Upéi ave, Cristo ha’e pe Tupã iglésia akã, ha upéva hete. Ha’e niko opa mba’e ñepyrũ ypy hague, ha’e raẽvete oikove jevy, itenonde haguã upéicha opa mba’e rehe.

Crísto pe niko Tupã omoĩmba va’ekue ipokatu. Ha ha’e rupi, Tupã omoingo porã jevy hendive opa mba’e oĩva ko yvy ári ha yvágape, Cristo ruguy rupi, oñohẽ va’ekue kurusu rehe.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Mc 11, 9. 10
Tupã to ñemomba’e guasu! To ñemomba’e guasu Ñandejára rérape oúva!
Tupã tohovasa pe oúva ñande ru Davídcha ñane sãmbyhývo! Tupã to ñemomba’e
guasu!

EVANGELIO
Marandu porã Ñandejára Jesucristo rekove ha hemimbo’e San Lucas omombe’u háicha 23, 35-43
Opavave: Romomba’e guasu ndéve, Ñandejára.

Jesús oñemosaingo rire kurusúre opavave oĩva upépe oma’ẽ joa hikuái hese. Ha mburuvichakuéra jepeve oñembohory hese, ha he’i: Hetápeko osalva va’ekue. To japo ijehe ko’ágã, añete ramoha ha’e upe Mesías, Tupã oiporavo va’ekue.

Umi soldádo oñembohory avei Jesús rehe. Oñemboja, ho’uka ichupe víno hái, ha he’i: – Nde ramo judíokuéra ruvicha guasu, nde voi ejesalva! Ha oĩ peteĩ kuatia iñakã ári, he’íva: ‘Kóva hína judíokuéra ruvicha guasu!’

Peteĩva pe oporojuka va’ekue, oĩva kurusu rehe ijyke rehe, oñembohory hese: Nde ramo upe Mesías, ejesalva nde, ¡ha ore salva oréve ave! Pe ambue katu oja’o upe hapichápe ha he’i ichupe: Nderekyhyjéi piko Tupãgui, ñaime niko hína peteĩcha? Ñande niko hekópe jahasa asy hína. Oñemyengovia ñandéve hína ñane rembiapo vaikue. Ko kuimba’e katu ndojapói mba’eve ivaíva.

Upéi he’i Jesúspe: – Jesús, ne mandu’amíke che rehe reguahẽvo ne Rréinope.

Jesús he’i ichupe: ¡Añetehápe ha’e ndéve, ko árape reimetaha che ndive yvágape!

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Jesucristo.