Ñahendu Jesús. Miércoles 3º Adviento
13 diciembre, 2022Ñahendu Jesús. Viernes 3º Adviento
15 diciembre, 2022
Escucha el evangelio y la reflexión en: https://youtu.be/ruVRI0dHM_s
Jueves 3° de Adviento Lucas 7, 24 – 30
Juan disípulo kuéra oho rire, Jesús imandu’a Juan rehe umi hese ojapysakávape. Ha he’i: Peẽ pesẽ ramo guare peho desiértope, mba’e pehecha haguã piko peho raka’e. Pehecha nga’u piko peteĩ ojepepýva ku takuapícha yvytu omovãva. Nahániri aje. Maerã aipo ramo peho raka’e. Pehóiko pehecha peteĩ kuimba’e oñemonde jeguapáva. Nahániri.
Peikuaa porã niko umi oñemonde jeguáva mburuvicha guasu róga rupínte oikoha. Amo hapópe, mba’e aipo ramo pehecha raka’e. Pehecha peteĩ proféta, ajépa. Ha proféta añete.
Juan niko tuichaiteve mba’e profétagui hína. Hese niko Ñandejára oñe’ẽ va’ekue he’i ramo guare: Che amondo che ñe’ẽ rerahaha ne renonderã ombosako’i haguã ndéve nde raperã.
Añetéko ha’e peẽme hína, ko’agãite peve ndaipóri gueteri ko yvy ári onaséva tuichavéva Juángui. Opáichavo, pe michĩvéva Ñandejára Rréinope, upéva tuichave chugui.
Opa umi ohendu va’ekue Juánpe niko ojerure va’ekue chupe omongarai haguã chupekuéra. Umi impuésto kovraha jepe oñemongarai. Ñandejára voi niko péicha oipota va’ekue ojejapo. Umi fariséo ha umi Moisés léi ombo’éva katu nopenái Ñandejárare, ha ndohejái
Juánpe omongarai chupekuéra.
Ñandejára Jesucristo ñe’ẽ.
ÑAMBOGUEJY ÑANDE REKOVÉPE…
Ndaikatúi ningo ñame’ẽ gusto opavavépe. Japyta porãséramo opavave ndive amo ipahápe jaikóta peteĩ kapi’i yvytu ombovaváva, oipeju háguionte ñanemoñenóva. Péicha ningo umi ndopytáiva iñe’ẽme ha omomorãva opa mba’e oje’éva ichupe kuéra. Oñakãity mantéva mburuvicha renondépe, oipeju háguio yvytúnte ojepokãva. Amo ipahápe ndajaikuaavéima mba’épa la ho’uséva, mba’épa upe oipotáva añete.
Jesús he’i Juan Bautista ndaha’éiha ku kapi’u yvytu ombovavávaicha, opyta porãséva opavave ndive. Ha’e peteĩnte iñe’ẽ, ha’e he’i upe Tupã oñandukáva ichupe he’i haguã. Ndaha’éi ku opyta porãséva katuete avave ndive. Juan Bautista nokirirĩri va’ekue mburuvicha guasu renondépe jepe. Herodes pe he’i hembiapo vaikue, soldado kuérape he’i ani haguã oiporu mbarete hendape’ỹ, umi impuesto okovrávape he’i avei ani haguã imonda.
Fariseo kuérape he’i ani haguã hova mokõi. Ha upéicha ojekuaa ha’eha profeta, maranduhára, omombe’úva añete Tupã ñe’ẽ, omyesakãva tembiapo vai kañyhápe ojejapóva ha ohechaukáva tape porã jaguata haguã.
Pa’i Jasy.