LECTURAS NAVIDAD VÍSPERA PYHARE

LECTURAS NAVIDAD VÍSPERA PYHARE

Ko’ágã ñahendúta Tupã Ñandejára ñe’ẽ Isaías arandukápe oĩ háicha  62, 1-5

Nde rayhupápe, Sión, nakirirí mo’ãi, nde rayhupápe, Jerusalén, ndapytu’u mo’ãi,

osẽ meve kuarahýicha tekojoja ha hendy peve tatáicha iñesẽ jejopy vaígui.

Nde reko joja ohecháta mayma tetãnguéra

ha nde reko mimbi mburuvicha guasu maymáva.

Nde katu reñembohéra pyahúta,

Ñandejáraite voi omoĩtava ndéve.

Ndéta Tupã nde Jára pópe, mburuvicha guasu akã rehegua jeguaka   

porãicha, mba’e vera isyva rehe guarãva.

Ndoje’e mo’ã véima nde rehe, “Ojeheja rei va’ekue”,

ha nde yvy rehe, “iperõmba va’ekue”.

Reñembohérata uvei “Che rembiayhu”,

Ha nde yvy katu, “Che rembireko”.

Ndétagui Ñandejára rembiayhu, ha nde yvy iménata.

Peteĩ mitã rusu hembiayhúre omenda háicha,

upe nde apo jevýva omendáta nde rehe.

Ha hembireko ndive iména ovy’a háicha Ñandejára ovy’áta ne ndive.

Tupã Ñandejára Ñe’ẽ.

SALMO ÑEMBOHOVÁI 89, 4-5. 16-17. 27. 29

Opavave: Aropurahéita tapiaite Tupã Ñandejára ipy’a porãha.

 “Che ame’ẽ va’ekue che ñe’ẽ che rembiporavópe.

Kóicha ha’e va’ekue che rembiguái Davídpe:

‘Ne ñemoñare ndopamo’ãi araka’eve,

ha’e kuéra mburuvicha guasúta tapia. O.

Ovy’aite va’erãpa pe tetã torypápe ne momba’e kuaáva,

ha oguatáva nde resa renondépe,

nde rérape ovy’áta opa ára,

ha nde reko joja omokyre’ỹ ichupekuéra. O.

He’íne chéve ha’e: ‘Nde hína che ru,

Tupã che renohẽva jejopy vaígui

Ichupe ahayhúne tapia,

Napyrũi chéne che ñe’ẽ ichupe ame’ẽva rehe. O.

LECTURA MOKOIHA

Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha 13, 16-17. 22-25

Upéma ramo Pablo opu’ã ha oporomokirirĩvo ipópe, he’i ichupekuéra:

Pehendu peẽ Israelguáva ha avei peẽ mombyryguáva pembyajéva Tupã Ñandejárape. Tupã Israel Jára oiporavo va’ekue ñande rukuéra ypykuépe, ojapo ichugui kuéra tetã guasu, oikórõ gueteri mombyrygua ramo Egíptope, ha upéi ipokatúpe oguenohẽ ichupekuéra upe tetãgui.

Tupã Ñandejára omongúivo Saúlpe ha omoí mburuvicha guasu ramo Davídpe, ha’e he’i hague: ‘Ajuhu David Jesé ra’y, ha’e ningo kuimba’e arovy’áva, ha ojapótava che rembipota. Peteï David ñemoñarévagui, Tupã Ñandejára ombou va’ekue Jesús oipysyrõ haguã Israélpe iñangaipágui, ome’ẽ haguéicha iñe’ẽ.

Jesús ou mboyve, Juan omoerakuã va’ekue iñe’ẽ opa Israel guápe, oñemongaraivo hikuái ojevy va’erãha Tupã Ñandejára gotyo. Ha Juan, hi’ára guahẽ aguĩma ramo, he’i va’ekue: ‘Che nda ha’éi  upe peẽ peimo’ãva: che rire katu ou hína peteĩ, chéve ija’ỹva ajora ipy reheguánte jepe.’

Tupã Ñandejára Ñe’ẽ.

ALELUIA

Aleluia.

Ko’ë ramo opáta tekoavy yvy ape ári ha jarekóta Tupã Pysyrõ.

Aleluia.

EVANGELIO

Marandu pora Ñandejára Jesucrísto  rekove ha hemimbo’e San Mateo omombe’u háicha  1, 1-25

Ko’ãva hína umi Jesucrísto  ypykue. David ha Abraham ñemoñare.

Abraham, Isaac ru va’ekue; Isaac, Jacobo ru ha Jacobo katu Judá ha tyvýrakuéra ru. Judá, Fares ha Zérah ru, ha isykuéra Tamar. Fares, Esrom ru; Esrom, Aram ru; Aram, Aminadab ru; Aminadab, Nahasón ru; Nahasón, Salmón ru; Salmón, Booz ru, ha Booz sy Rahab. Booz, Obed ru ha isy katu Rut. Obed, Jesé ru, ha Jesé, mburuvicha guasu David ru. David, Salomón ru ha isy katu Urías rembirekore.

Salomón, Roboam ru va’ekue; Roboam, Abías ru; Abías, Asá ru; Asá, Josafat ru; Josafat, Joram ru; Joram, Ozías ru; Ozías, Jotam ru; Jotam, Ahaz ru ha Ahaz, Ezequías ru. Ezequías, Manasés ru; Manasés, Amón ru; Amón, Josías ru. Josías, Jeconías ha tyvýrakuéra ru. Upéma ramo Israelgua kuéra ojereraha va’ekue tembiguái ramo Babilóniape.

Upe rire, ou va’ekue Salatiel, Jeconías ra’y. Ha’e Zorobabel ru va’ekue. Zorobabel katu Abihud ru; Abihud, Eliaquim ru; Eliaquim, Azar ru. Azar, Sadoc ru; Sadoc, Aquim ru; Aquim, Eliud ru; Eliud, Eleazar ru; Eleazar, Matán ru; Matán, Jacob ru. Jacob, José ru; ha José María ména. María hína, Jesús hérava Cristo, sy.

Upéicha jajuhu oĩha 14 ñemoñare Abraham guive David peve; ha 14, David guive Israelgua Babilóniape ojereraha ramo guare  peve; ha 14 avei upe guive, ou peve Cristo.

Jesucrísto  ou ramo guare  kóicha va’ekue:

Isy María ome’ẽma iñe’ẽ omenda haguã José rehe. Ha oiko mboyve oñondive, María hye guasu Espíritu Santo rupi. José katu, kuimba’e ijoheipyréva, nomoherakuã vaiséi ichupe. Oheja reise mo’ãnte ichupe, avave oikuaa’ỹ rehe. Ko’ã mba’e ombojere aja iñakãme, ojehechauka ichupe iképe Ñandejára remimbou, ha he’i ichupe:

José, David ñemoñare, ani rekyhyje reraha haguã ne rembirekorã Maríape. Pe mitã ha’e oguerekótava niko Espíritu Santo pu’aka rupi ou. María imembýta ha rembohérata pe mitã Jesús. Ha’e hína upe oguenohẽtava hetãguápe hembiapo vaikuégui.

Ko’ã mba’e ojehu oiko haguã hekoitépe upe Tupä Ñandejára he’i va’ekue maranduhára rupi:

“Kuñataĩ imarã’ỹva hye guasúta ha imemby kuimba’éta. Oñembohérata Emanuel, he’iséva “Tupã ñane ndive”.

José opáyvo, ojapo Ñandejára remimbou he’i haguéicha ichupe, ha ogueraha hembirekorã Maríape. Oiko’ỹ rehe oñondive imemby, ha José ombohéra Jesús.

Ñandejára Jesucrísto  Ñe’ẽ

O bien más breve:

Ko’ágã ñahendúta Ñandejára Jesucrísto  rekove ha hemimbo’e San Mateo omombe’u háicha 1, 18-25

Jesucrísto  ou ramo guare kóicha va’ekue:

Isy María ome’ẽma iñe’ẽ omenda haguã José rehe. Ha oiko mboyve oñondive, María ojejuhu hye guasuha Espíritu Santo rupi. José katu, kuimba’e ijoheipyréva, nomoherakuã vaiséi ichupe. Oheja reise mo’ãnte ichupe, avave oikuaa’ỹ rehe. Ko’ã mba’e ombojere aja iñakãme, ojehechauka ichupe iképe Tupã Ñandejára remimbou, ha he’i ichupe:

José, David ñemoñare, ani rekyhyje reraha haguã ne rembirekorã Maríape. Pe mitã ha’e oguerekótava niko Espíritu Santo pu’aka rupi ou. María imembýta ha rembohérata pe mitã Jesús. Ha’e ningo upe oguenohẽtava hetãguápe hembiapo vaikuégui.

Ko’ã mba’e ojehu oiko haguã heko itépe upe Tupã Ñandejára he’i va’ekue maranduhára rupi:

“Kuñataĩ imarã’ỹva hye guasúta ha imemby kuimba’éta.

Oñembohérata Emanuel, he’iséva “Tupã ñane ndive”.

José opáyvo, ojapo Tupã Ñandejára remimbou he’i haguéicha ichupe, ha ogueraha hembirekorã Maríape. Oiko’ỹ rehe oñondive imemby, ha José ombohéra Jesús.

Ñandejára Jesucrísto  Ñe’ẽ.