LECTURAS DEL LUNES TRIGÉSIMA TERCERA SEMANA

LECTURAS DEL LUNES TRIGÉSIMA TERCERA SEMANA

Primera lectura:

Ko’ágã ñahendúta Tupã Ñandejára ñe’ẽ Jueces arandukápe oĩ háicha 1, 10-15. 41-43. 54-57. 62-64

Umi árape: Ijapytépekuéra osẽ peteĩ iñaña etereivéva: Antíoco Epífanes, mburuvicha guasu Antíoco ra’y. Ha’e oiko ra’e Rómape, ojejopýva ramo, ha oiko ichugui mburuvicha guasu, 137pe oñeime hague ramo guare Grecia poguýpe.

Umi ára umívape, Israélpe oiko peteĩ atýra osẽ va’ekue tetã rekógui, ombotavy va’ekue hetápe he’ívo: “Ñañe moĩna peteĩ Ñe’ẽme umi tetã ñande jereregua ndive, ñane año guive niko, heta mba’e asy ou ñandéve”.

Hetápe ho’a porã upéva, ha peteĩ atýra oho mburuvicha guasu rendápe. Mburuvicha guasu he’i ichupe kuéra ikatuha osẽ tetã rekógui ha ojapyhy mombyrygua jepokuaaha, ha aipórõ, ojapóvo upéva, omopu’ã hikuái Jerusalénpe peteĩ oñeime haguã, oñomi hikuái ijeapi’oha, omboyke ñe’ẽ ñome’ẽ marangatu, omenda hikuái umi Tupã Ñandejára jaheiháre ha oñemoĩ ojapóvo ivaíva.

Upe mburuvicha guasu oguenohẽ tembiapoukapy opa tetã ipoguýpe oguerekóvape guarã, he’íva: maymáva peteĩ tetã nteha ha ojeheja haguã teko jepokuaahágui. Opa tetã ojapo he’i háicha upe mburuvicha guasu, ha heta Israelgua ohasa Tupã Ñandejára reko teégui omomba’e guasu tupã gua’u, omymba juka ita’ãngakuérape ha omongy’a hikuái Pytu’uha ára.

Ha 15ha árape, mes hérava Kislev jave, áño 145 ramo, upe mburuvicha guasu ojapouka peteĩ altar tupã gua’úpe guarã, pe altar marangatu oñemymbajukaha ári. Upéicha avei ojapouka umi táva Judea guápe; óga kuéra rokẽme ha opa okaháre ojehapy insiénso; umi kuatia Tembiapoukapy rehegua ojuhúva, omondoropa ha ohapy hikuái; ha oimérõ ojejuhúva oguerekoha upe kuatia Tupã Ñandejára Rembiapoukapy rehegua, ojejuka.

Opáichavonte, heta va’ekue Israelgua noñe me’ẽiva ha ndo’úi mba’eve ipotĩ’ỹva; omanoseve, oñemongy’a rangue umi tembi’u ipotĩ’ỹvape ha opyrũ pe ñe’ẽ ñome’ẽ marangatúre. Ha omano.

Tupã Ñandejára Ñe’ẽ.

SALMO ÑEMBOHOVÁI 118, 53. 61. 134. 150. 155. 158

Opavave: Ñandejára, ani che reja ha’a umi oñemombaretéva pópe.

Iñangaipáva che mbopochy ahechávo ne rembiapoukapy omboykeha.
Iñañáva che moñuhã opáguio, che katu ne rembiapoukapýgui nda che resaráiri. O.

Ani che reja ha’a umi oñemombaretéva pópe ikatu haguã ajapo ne rembiapoukapy.
Oñemoaguĩ che rehe umi che rapykuéri oikóva, ne ñe’ẽgui mombyry oĩ hikuái. O.

Heko vaívape nerenohẽ mo’ãi jejopy vaígui, ne rembipota ndojaposéigui hikuái.
Heko vaíva ahecha ha che pochy, umíva ndojapóigui ne ñe’ẽ. O.

ALELUIA Jn 8, 12

Aleluia.
Ñandejára Jesucristo he’i: “Che hína pe ohesapéva yvy ape ári.
Upe che moirüva orekóta tesapeha Tekove rehegua”.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Lucas omombe’u háicha18, 35-43

Upe ramo oĩmarõ hína Jesús Jericó ypýpe, peteĩ ohechave’ỹva, oguapýva pe tape yképe ojerure tupãmba’e, ohendúvo ohasaha heta yvypóra, oporandu mba’épa ojehu. Oje’e ichupe Jesús Nazaretgua ohasaha upe rupi. Ha ha’e osapukái: Jesús, David ra’y, che poriahuvereko mína!

Umi ohóva tenonde omongavaju ichupe okirirĩ haguã. Ha’e katu osapukaive: Jesús David ra’y, che poriahuvereko mína!

Jesús opyta, ha he’i ojegueru haguã ichupe. Oguahẽvo ijypýpe oporandu ichupe: Mba’épa reipota ajapo nde rehe?
Upe ohecha’ỹva he’i: Che Jára, ahechase jevy.

Jesús he’i ichupe: Ehecha jevy! Rejerovia haguére rekuera.

Upepete voi pe ohecha’ỹ va’ekue ohecha jevy, ha oguerohory Tupãme Jesús rapykuéri. Ha opa ohecha va’ekue hembiapo oguerohory avei Tupã Ñandejarape.

Ñandejára Jesucristo Ñe’ẽ.