LECTURAS DEL SÁBADO 07 DE DICIEMBRE

LECTURAS DEL SÁBADO 07 DE DICIEMBRE

Primera lectura:

Ko’ágã ñahendúta Tupã Ñandejára ñe’ẽ Isaías arandukápe oĩ háicha     30, 19-21. 23-26      

Péicha he’i Tupã Ñandejára: Peẽ, Siongua peikóva Jerusalénpe, ndapejahe’o mo’ã véima. Tupã Ñandejára pende poriahuverekóta ohendu vove pesapukái ichupe pejerurévo pytyvõ, ha pene rendu vovénte oporandúta peẽme mba’épa peipota. Ha Tupã Ñandejára ome’ẽ ramo jepe peẽme jehasa asy rehegua pan ha ñembyasy rehegua y, ha’e hína pene mbo’ehára ha nokañy mo’ã véima pende hegui.

Pende resa teépe pehecháta ichupe. Ha pepía ramo pende akatúa térã pende asu gotyo, pehendúta peteĩ ñe’ẽ pende rapykuéri he’ítava peẽme: “Kóva hína pe tape, tapeho kóva rupi.”

Tupä Ñandejára omboúta ama upe mba’e ra’ỹi pende yvýpe peñotỹvape guarã ha pe mbuja osẽva pende yvýgui iporã ha héta. Pene rymba kuérape hembypáta ho’u va’erã.

Umi guéi ha vúrro omba’apóva pende kokuépe jepe, oguerekóta hembi’urã umi kapi’i iporãve ha hevéva. Oguahẽvo pe jejuka guasu ára ha ho’ávo umi óga yvate imbaretéva, oĩta ysyry guasu osyry hatãva opa yvyty yvate ha umi yvy pu’ã yvatépe. Tupã Ñandejára oipohano ha ojokuáta umi hetãgua oikutu va’ekuépe. Upérõ jasy ohesapéta kuarahýicha ha kuarahy ohesapéta 7 kuarahýicha.

Tupã Ñandejára Ñe’ẽ.

SALMO ÑEMBOHOVÁI    146, 1-6

R. Ovy’aite umi oha’aröva Tupã Ñandejárape.

Ajépa iporã ite Tupãme japurahéi ramo,

ichupe ñamomba’e guasu va’erã vy’a pópe.

Tupä Ñandejára omopu’ã jevy Jerusalén

ha omboatypa Israelgua mombyry rupi isarambi va’ekue. R.

Ipy’a rasýva ha’e omonguera

ha umi ho’o ojejoka hague rupi ha’e ojokuapa.

Ha’e he’i mbovýpa mbyjakuéra oĩta

ha héra rupi peteĩ teĩme oikuaa. R.

Tupä Ñandejára niko tuicha ha imbarete hína,

iñarandukuépe ndaijojahái.

Tupã Ñandejára oipytyvõ imboriahúvape,

hembiapo vaívape katu yvýre oipete. R.

ALELUIA

Aleluia.

Tupã Ñandejára ha’e ñande Mbojovakeha,

omoïva Apoukapy, ñane Mburuvicha guasu:

Ha’e ñane pysyrõta.

Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha. Pejapysaka porãtapa hese?                                   

9, 35-10, 1. 5a. 6-8

Upe ramo Jesús ohasa oikóvo peteĩ távagui ambuépe. Ha mamo oĩháme itupao, upépe ha’e oporombo’e. Omoherakuã avei marandu porã Tupã Ñandejára sãmbyhyha ára rehegua, ha omonguera opaichagua hasývape. Ha ohechávo hetaha umi ijatýva, oiporiahuvereko heta ichupe kuéra. Ohecha kuaa, ha’ekuéra ikane’õ ha ikangypaha ku ovecha herekua’ỹ vaicha. Ha he’i hemimbo’ekuérape: Ajépa tuicha pe kokue ha heta hi’a, omono’õ va’erãnte mbovy. Upévare, pejerure pe kóga járape tombou umi ou va’erã omono’õ.

Jesús ohenói umi 12 hemimbo’épe ha ome’ẽichupe kuéra pokatu omosẽ haguã mba’epochy, ha omonguera haguã opaichagua mba’asy.

Péicha hína umi 12 apóstol réra: tenondete Simón hérava avei Pedro, ha tyvýra Andrés. Upéi Santiago ha tyvýra Juan, Zebedeo ra’y kuéra. Felipe ha Bartolomé, Tomás ha Mateo, viru ombyatýva Rómape guarã. Avei Santiago, Alfeo ra’y ha Tadeo. Oĩ avei Simón, hetã rayhúva, ha Judas Iscariote, pe upéi omoñuhã va’ekue Jesúspe.

Jesús omondo hembiaporãme ko’ã 12 kuimba’épe kóicha ombo’e rire ichupe kuéra: Ta peho uvei Israelgua rendápe, ku ovecháicha okañy mbáva. Ta peho pemyerakuã hi’aguĩ maha ñesãmbyhy yvágagui oúva. Pemonguera hasýva, pemoingove jevy omanóvape, pemonguera umi hete aipávape ha pemosẽ mba’epochy opavavégui. Peẽme niko oñeme’ẽ rei ko pokatu, ani pejerure hese mba’eve.

Ñandejára Jesucristo Ñe’ẽ.