Ñahendu Jesús Ñe’ẽ. Martes Semana 25° TO

Escucha el evangelio y la reflexión en: https://youtu.be/1QwVFgGFOXs

Martes 25 a TO

Lucas 8, 19 – 21

Upérõ ou Jesús rendápe isy ha tyvýrakuéra. Ndaikatúi oñemboja hikuái hendápe hetágui umi ojerepáva hese. Osẽ peteĩ he’i Jesúspe:

— Nde sy ha nde ryvy kuéra oime amo okápe hína. Nde rechase.

Jesús katu he’i: — Che sy ha che ryvy niko umi ohendúva ha ojapóva Ñandejára Ñe’ẽ.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE

Kuimba’e niko jareko ñande ryvy (hermano menor) ha ñande ryke’y (hermano mayor), oime ñane reindy ave (hermana). Kuña nguéra katu oreko tykéra (hermana mayor) ha ikypy’y (hermana menor), ha oime ikyvy kuimba’e (hermano). Ha umíva ha’e hina ñane pehengue ñane reñóigui ñande ru ha ñande sýgui.

Ikatu oime avei ñane hermano térã hermana, ha’éva ñande sýgui año, térã katu ñande rúgui año. Opaichagua niko ñaime.

Oĩ avei ñane pehengue jarekóva ñane hermáno ramo, ñande sy ha ñande ru ha’égui ipaíno, térã katu ñande paíno ra’ykuéra. “Hermano espiritual”, ja’éva hese. Opa umíva niko, ñande ru ha ñande sýicha, ndajaiporavói, oñeme’ẽntema ñandéve, jajuhúntema, ha jaguata hendive kuéra jaiko ypy guive ñamano meve. Tuicha mba’e ko pe ñande familia. Ndaikatúi niko ñamboyke.

Opáichavo oime hína ñane irũnguéra ñande jaiporavóva, opa ára jarekóva ñande ykére, ñañandúva ñane pehenguéicha. Ha sapy’ánte umíva apytépe oime jahayhúva ñande py’aite guive ha jajepokuaavéva hese ñande róga guágui. Japo’o ha jakakuaa rire niko ñandéma ñandejehegui ñañemopeteĩ ha ñañemoirũ ñande rapicha ñandéicha oñandúva ha oguatáva rehe.

Ñande idéa orekóva avei. Ha umi ñane irũgui ou oiko ñane pehengue, ñande ryvy, ñane reindy, ha ñande sýicha.

Péva ningo la oikóva umi Hesu rehe ojeroviáva raka’e. Umi disípulo ha apóstolkuéra ningo ou oiko oñondive, ojeroviágui Hesu rehe. Omboja’o orekóva ha oñomoirũ tembiapo ha hemiandúpe. Umíva hina, he’i Hesu, ohendúva Ñandejára ñe’ẽ ha oñeha’ãva ojapo. Ha upéicha ñande ñañeha’ãramo jaiko niko, ikatu ñandeja avei umíva apytépe.

Ñande aipóramo Hesu ryvy ha Hesu kyvýta hína. Ha’e ñanembojoja isy rehe ha ipehengue kuérare, ñanemopeteĩ hendive.

Hesu niko ojapo ñande hegui peteĩ familia guasu, ndaha’éiva ñande ruguýrente ñañemosãva. Upe jerovia hese hína upe ñanemosãva ha ojapóva ñande hegui ipehengue.

Pe mborayhu ñañandúva Hesúre ome’ẽta ñandéve aipóramo, hetaiteve ñande ryke’y, ñane reindy, ñande ryke, ñande kyvy ha ñande sy.

Erekópa che reindy ha nde che irũ peichagua nde rapicha reñemopeteĩvahendivekuéra
nde jerovia, ne remiandu ha nde guatápe.

Pa’i Jasy.