LECTURAS DOMINGO SEMANA XXVI TO

LECTURAS DOMINGO SEMANA XXVI TO

LECTURA PETEÏHA:

Ko’ágã ñahendúta Tupã Ñandejára ñe’ẽ Ezequiel arandukápe oĩ háicha 18, 24-28

Ñandejára péicha he’i: Pe heko jojáva nda heko porãvéi ramo, ha ojapo heko añáva rembiapo, peimo’ã piko peë oikovetaha. Na che mandu’avéi chéne umi mba’e porã ojapo va’ekue rehe, omanóne iñangaipa rehe.

Peë pejéne nda che reko jojaiha. Ehendúna, Israel, peje piko peë nda che reko jojaiha. Nda ha’éi pa hína peë uvei umi pene rembiapo vaíva. Imarangatúva ojei ramo heko jojágui, ojapo ivaíva ha omano.

Omano hembiapo vai hague rehe. Heko añáva ojei ramo mba’e vai apógui ha ojapo heko joja ha hekópe guáva, oikovéne katu ete. Ojesape’a ramo ha oñemboyke mba’e vaieta ojapo va’ekuégui, añetehápe oikovéne ha nomanói chéne.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 25, 4-9
Opavave: Ñandejára, ani nde resarái ne mborayhu ha nde poriahuverekógui.

Ñandejára, ehechauka chéve nde rape ha che sãmbyhy.
Che mbo’e umi mba’e añete guáva.
Ndéko hína che Jára, che renohẽva jejopy vaígui.
Nde rehe ajepokã opa ára. O.

Che ru, ani nde resarái ne mborayhu ha nde poriahuverekógui,
reñandúva ore rehe opa ára.

Che angaipágui katu eñembyesarái, mba’e vai ajapo va’ekuégui che pyahu ramo guare .
Che Jára, ani nde resarái che hegui, ne mborayhu niko tuicha. O.

Ñandejára niko imba’e porã ha imarangatu,
upéva rehe oheko mbo’e heko vaívape.
Imboriahúvape oisãmbyhy ani haguã ojavy,
ha hápe rehe ichupekuéra omboguata. O.

LECTURA MOKÖIHA:
Ñahendúta Tupä Ñandejára Ñe’ẽ San Pablo ohai va’ekue Filipos guápe 2, 1-5

Che pehenguekuéra: Oime ramo Cristo ome’ẽ ra’e peëme ipokatu peporo mokyre’ỹ haguã, pe mborayhu pene atõi ramo peporo mbovy’a jevy haguã, opavave pehupyty ramo peteï Espíritunte, peporo poriahuvereko kuaa ramo, pe che myenyhẽna vy’águi peikóvo oñondivepa peteï py’ápe, peñe mbojoajúvo oñondive peteï mborayhúpente, peteï espíritupente ha peteï tembipotápente.

Ani pejapo mba’eve peënteségui térã pejejapógui, jejapo’ỹme uvei ha peteï teĩ to guereko hapichápe mba’eguasuvérõ guáicha ichugui. Avave toheka’ỹ pe chupénte ou porãva, pe ou porãva hapicha kuérape avei katu. Peiko kena ojoapytépe Cristo oiko haguéicha.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Jn 10, 27
Aleluia.
Che ovechakuéra oikuaa che ñe’ẽ ha ou che rapykuéri,
ha che aikuaa ichupekuéra.
Aleluia.

EVANGELIO
Marandu porã Ñandejára Jesukrísto rehegua San Mateo omombe’u háicha 21, 28-32
Opavave: Romomba’e guasu ndéve, Ñandejára

Upe ramo Jesús he’i umi pa’i ha judíokuéra mburuvichápe: Mba’épa peje ko peëme amombe’útava rehe. Oĩ va’ekue peteï kuimba’e ita’ýra mokõiva. Ha he’i pe ijypykuépe: “Che ra’y, tereho emba’apo ñande kokuépe”.

Pe ita’ýra katu he’i ichupe: “Ndahaséi”. Upéi ombyasy péicha he’i hague, ha oho. Upéi pe kuimba’e oho ita’ýra pahague rendápe, ha he’i avei ichupe oho haguã omba’apo. He’i katu ha’e itúvape: “Néi, che ru, aháta”, ha ndohói. Mávapa umi mokõivévagui ojapo itúva rembipota.
Umi upépe oĩva he’i ichupe: Pe ijypykue.

Upépe Jesús he’i ichupekuéra: Añetehápe ha’e peëme, umi impuesto ombyatýva Rómape guarã ha umi kuña reko vai raẽ oikéta pende hegui Ñandejára Rréinope. Juan Bautista niko ou va’ekue pene mbo’évo mba’éichapa peiko va’erã, ha ndaperoviaséi va’ekue ichupe. Umi impuesto ombyatýva Rómape guarã ha umi kuña reko vai katu oguerovia ichupe. Peë pehecha ramo jepe upéva, napembyasýi pende reko vai ha ndapejeréi ichugui, perovia haguã ichupe.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.