Ñahendu Hesu. Jueves Semana 26° TO

Escucha el evangelio y la reflexión en: https://youtu.be/pGvopwLrfJQ

Jueves 26ª TO

Lucas 10,1–12

Upérõ Jesús oiporavove 72 idisipulorã ha umívape omondo henonderã, mokõi-mokõi, puebloha rupi hamba’e, umi ha’e ohasataha rupi. He’i chupekuéra:

Ajépa tuicha pe Ñandejára kokue ha heta hi’a, omono’õ va’erãnte mbovy. Upévare, pejerure Ñandejárape tombohetave umi ou vaerãva omyerakuã pe marandu porã opavavépe. Tapeho peẽ.

Peikuaáke pomondoha hína ku ovecháicha jaguaretekuápe. Ani peraha pláta térã pende avíorã térã pende py rehegua ave.

Ani avavépe pemomaitei tapére. Oimérõ pene mog̃uahẽva hógape, pya’ete pemomaitei pejévo “Ñandejára rérape ta peime porãmba, ha py’a guapy toĩ pene ndive.” Ha oiko ramo hikuái py’a guapýpe, pene ñembo’e ohovasáne chupekuéra. Nahánirirõ katu, peẽme jeýnte opytáne. Ani peiko peva-peva rei óga-ógagui.

Pepyta upe peg̃uahẽháme ha pe’u upe oñeme’ẽva peẽme. Omba’apóvape niko ija ohupyty hembiapo repykue. Peike ramo peteĩ puéblope ha pene mog̃uahẽ porã ramo hikuái, pe’u umi mba’e oñeme’ẽva peẽme. Pemonguera opa hasýva ha peje chupe kuéra Ñandejára Rréino
hi’aguĩmaha.

Peike ramo peteĩ puéblope katu, ha na pene mog̃uahẽ porãi, pesẽ okápe ha peje, “Yvytĩmbo pende pueblopegua roityvyro hína ore pýgui peikuaa hag̃ua mba’épa pene ra’arõ. Peikuaáke kóva, Ñandejára Rréino hi’aguĩma pendehegui.”

Che ha’e peẽme, ág̃a ára pahápe, Ñandejára oinupã rasyvéta chupe kuéra umi Sodómape oiko vaekuégui.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Ikatúko hína che irũ ha che reindy, umi tembiapo vai oikóva renondépe, heta tapicha jeiko asy ha ñeikotevẽ ojerepáva ñande rehe ha umi aña ha’eteku ñande aho’ítava, jaju ñande ñañandu ndaikatu mo’ãiha jajapo mba’eve. Peicha guarãntema ha naipohã mo’ãiha voi ko ñande rekove. Maerã voípa aipo ñañeha’ã mba’éta. Nambre – ja’e- jajeka ichugui. Ha ñasẽ jaheja. Toiko la oikóva.

Hesu avei oñandu raka’e umi hetãygua remikotevẽ tuichaha, oñandu ityre’ỹ, ikane’õ ha oñeapytĩmba vaicha hikuái. Ndaipóri ome’ẽmíva ichupe kuéra esperánsa ha sa’i umi oñemoĩva omoirũ, oipytyvõ ha ombo’e Ñandejára rape. Tuicha la kokue -he’i- ha sa’i la oka’apíva Ñandejára peguarã.

Ha mba’épa ojapo Hesu. Noñemoha’eñói. Ombyaty ha ohekave iñirũrã omboguata haguã hembiapo. Tenonderã niko ohenói kuri umi 12 apóstol oĩ haguã hendive ha ojokuái haguã chupekuéra. Ko’ãga jahecha ohenóiha hetavépema. 72pe oiporavo ha ojokuái henonderã.

Tuicha tuichavéramo upe ñeikotevẽ ha tembiaporã, upépe oñeikotevẽve ñande rehe hína. Ha hesa’i sa’ivéramo umi oñeha’ã añetéva, upépe ñañemoĩ vaerã che reindy ha nde che irũ, jahekave ñane irũrã ñamba’apo haguã oñondive Ñandejára kokuépe.

Pa’i Jasy.