SÁBADO FERIA DE ADVIENTO

Ko’ágä   ñahendúta Tupã Ñandejára ñe’ẽ Jueces arandukápe oĩ háicha              13, 2-7. 24-25a

Táva Sorápe oiko va’ekue peteĩ kuimba’e hérava Manóaj. Ha’e Dan ñemoñare kuérava. Hembireko ndaikatúi imemby. Ko kuñakaraípe ojehechauka Tupã Ñandejára remimbou ha he’i ichupe:

“Ndaikatúiva ne memby na ne membýiri. Ko’ágã katu nde rye guasu ha ne membýta peteĩ mitã kuimba’e. Anivétei re’u vino térã oimeraẽ mba’e ne monga’úva ha anítei re’u mba’eve naipotĩriva. Ko mitã akã rague ne reikytĩ mo’ãi. Ha’e oñemboyke Tupã Ñandejárape guarã oikove ypy mboyve guive. Ha’e oguenohẽ ñepyrũta Israel ñemoñarépe filistéo kuéra po guýgui”.

Oho upe kuñakarai he’i iménape: “Oñemboja che rendápe peteĩ kuimba’e ha’ete vaicha chéve Tupã Ñandejára remimbou. Tuicha che mondýi ha naporandu jepéi ichupe moõguipa ou. Ha’e avei nde’íri chéve mba’éichapa héra”.

Imemby upe kuña ha ombohéra upe mitã kuimba’e Sansón. Upe mitã okakuaa ha Tupã Ñandejára ohovasa ichupe. Tupã Ñandejára pu’aka oñeñanduka ñepyrũ hete pýpe.

Tupã Ñandejára Ñe’ẽ.

SALMO ÑEMBOHOVÁI 70, 3-4a. 5-6ab. 16-17

R. Tupã Ñandejára, che pe’a umi hembiapo vaíva po guýgui

Nde upe reñangarekóva che rehe, nde guýpe añemo’ã ha nde che renohẽ jejopy vaígui.

Nde hína upe che rehe reñangarekóva ha upe che mo’ãva. R.

Tupã Ñandejára, che pe’a umi hembiapo vaíva po guýgui,

nde rehénte voi Tupã Ñandejára che mitã guive ajerovia,

che sy ryépe aimérö guare upe guivéma nde rehe ajeko.

Nde upe che renohẽ va’ekue che sy ryepýgui R.

Amoherakuãne mba’e tuicha ite rejapo va’ekue Ñandejára.

Amoherakuãne nde añonteha upe nde reko jojáva.

Tupã Ñandejára, che mitã rusu guive nde che reko mbo’e,

ko’ágã peve amombe’u mba’e tuicha ite rejapo va’ekue. R.

ALELUIA

Aleluia.

Jesé rapo hoky pyahúva, remoï va’ekue tetä nguéra ohecha haguä,

pya’e eje ore pysyrö haguä.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?                                                    1, 5-25

Upe ramo, Herodes mburuvicha guasúrõ guare Judápe, oiko va’ekue peteĩ pa’i hérava Zacarías, pa’i Abías ñemoñare rehegua. Hembireko, hérava Isabel, Aarón ñemoñare. Mokõi véva heko joja Tupã Ñandejára renondépe, ha ojapóva hekópe Tupä Ñandejára rembipota ha hembiapoukapy. Ndaita’ýraiva hikuái, ndaikatúigui Isabel imemby.

Upéi ave, mokõivéva ituja itereíma. Peteĩ jevy, pe pa’i aty omyakãva Zacarías, hembiaporã guahẽ jave hína Tupaópe, Tupã Ñandejára renondépe, ojapo háicha pa’i kuéra, Zacarías oike pe koty marangatúpe ohapývo insiénso Tupã Ñandejára renondépe. Otĩmbo aja pe insiénso opavave okápe oñembo’e joa.

Upe javete ojehechauka sapy’a Zacaríaspe peteĩ Ñandejára remimbou, oñembo’y pe altar insiénso ojehapyha akatúavo. Ohechávo pe Tupã Ñandejára remimboúpe, Zacarías opyta ijurujái ha okyhyje terei.

Pe Tupã Ñandejára remimbou katu he’i ichupe: Zacarías, ani rekyhyje. Tupã Ñandejára  ohendu ne ñembo’e. Ne rembireko Isabel imembýta, ha rembohérata Juan. Nde revy’a itereíta, ha heta oiméta oguerohorýva nde ra’y ou hague yvy ári. Nde ra’y mba’e guasúta Tupä Ñandejára renondépe.

Ha’e ndo’u mo’ãi vino térã vino yvaguigua, ha Espíritu Sántogui henyhẽta, ko yvy ári ou mboyve guive. Ha’e rupi heta Israelgua ojevýta Tupã Ijárape. Juan oúta Ñandejára renonderã, Elías espíritu ha ipokatu reheve, omoingo porã haguã túva kuéra ta’ýra kuéra ndive, ha umi iñe’ẽ rendu’ỹva oikuaa haguã mba’éichapa iñe’ẽ rendu va’erã.

Ha péicha ombosako’íta Israel guápe ojerovia haguã Tupä Ñandejára rehe. Zacarías oporandu pe Tupã Ñandejára remimboúpe: Mba’éicha piko aikuaa porãta upéva? Che che tujáma ha che rembireko ave iguãiguĩma.

Tupã Ñandejára remimbou he’i ichupe upépe: “Che hína Gabriel, aiméva Tupã Ñandejára renondépe. Ha’e che mbou ame’ẽ haguã ndéve ko marandu porã. Ha ko’ágã, ndereroviái haguére ko’ã mba’e ha’éva ndéve, ne ñe’ẽngúta, oikopa peve opa mba’e”.

Upe aja, opavave oha’arõva okápe Zacaríaspe, oporandu joa ojupe mba’érepa hi’are terei Tupao ryepýpe. Ha osẽvo, Zacarías ndaikatúi oñe’ẽ ichupe kuéra. Upépe ohechakuaa hikuái oiméne haguã imba’e recha ra’e pe Tupao ryepýpe.

\Zacarías ipo ha iñakã mante ombovava oikuaauka haguä he’iséva, ha péicha opyta iñe’ẽngu. Ha ojapopávo hembiapo, pa’i Zacarías oho hógape. Ko’ã mba’e ojehu rire, hembireko Isabel hye guasu, ha 5 mése aja nosẽvéi hógagui. He’i ijupe: “ Tupä Ñandejára ojapo che rehe kóicha, anive haguã avave ojahéi che rehe”.

Ñandejára Jesucristo Ñe’ẽ.