LECTURAS: VIERNES 4º DURANTE EL AÑO

LECTURAS: VIERNES 4º DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Hebreos guápe  13, 1-9a

Che pehẽnguekuéra:

Pejoayhu tapia kena oñopehenguéicha. Aníke pende resarái pende rory va’erãha umi pende rógape oguahẽva ndive. Upéicha oime va’ekue, oikuaa’ỹre, omoguahẽva va’ekue Tupã Ñandejára remimboúpe.

Pene mandu’a kena umi yvyrakuápe ojejopývare, peime ramo guáicha peẽ avei hendive kuéra. Pene mandu’a umi oñembohasa asy va’ekuére, peẽ avei ikatu pehasa upévare.

Opavave to momba’e ñemenda, ha ani omyakãratĩ hembirekópe. Tupã Ñandejára ombojovake va’erã umi heko ky’ávape ha umi oporomyakãratĩvape.

Ani pehayhu viru. Pevy’a perekóvare. Tupã Ñandejára niko he’i va’ekue: “Araka’eve ndoroheja rei va’erãi.” Aipórõ ikatu ja’e jeroviápe: “Ñandejára che pytyvõhára, ndakyhyjéi chéne. Mba’e piko ojapóta che rehe yvypóra?”

Pene mandu’áke umi Jesús iglésia sãmbyhyháre, ha umi omoguahẽ va’ekue peẽme Tupã Ñandejára marandu. Pejepy’a mongetamína hekovekuéra kuére ha peñeha’ã peiko ha’e kuéra oiko haguéicha.

Jesucristo niko heko peteĩnte: kuehe, ko ára ha pe tapia guarã.

Tupã Ñandejára Ñe’ẽ.

SALMO ÑEMBOHOVÁI 26, 1. 3. 5. 8b. 9abc

Opavave: Tupã Ñandejára che rekove ohesapéva, ha che pytyvõva.

Tupã Ñandejára che rekove ohesapéva, ha che pytyvõva.

Mávagui piko akyhyjéta?

Tupä Ñandejára oñangareko che rehe,

Máva piko che mongyhyjéta? O.

Oñembohetárõ jepe ñorairõhára kuéra ha che mongora,

ndakyhyjéi chéne ichuguikuéra.

Ondyry ramo jepe che rehe hikuái, nda che py’a tarovái chéne. O.

Ágã ou vove ára ajejopy vaiha, Ñandejára che moguahẽne tupaópe, ha iguýpe añemo’ãne.

Yvate che rupíne ani haguã mba’eve ojehu chéve.

Che py’a pýpe aikuaa ereha: “Peju che rendápe”. O.

Ne rendápe niko aguahẽ Tupä Ñandejára, ani rekañy che hegui,

Ani nde pochy che ndive. Nde añónte niko upe che pytyvõva. O.

ALELUIA Cf. Lc 714, 29

Aleluia.

Ovy’aite va’erã umi orekóva iñakãme Tupã Ñandejára ñe’ẽ pe ikorasõ omoĩ porãvo

ha heta mba’e osẽ ichugui naikane’õire.

Aleluia.

EVANGELIO

Marandu porã Ñandejára Jesucristo rekove ha hemimbo’e San Marcos omombe’u háicha   6, 14-29

Upe ramo guare mburuvicha guasu Herodes ohendu pe oje’éva Jesús rehe, herakuãmava opa rupi. Oĩ he’íva: “Juan Bautista niko opu’ã jevýma omanóva apytégui, ha upévare ipokatu ojapo haguã hechapyrãva.” Oĩ he’íva: “Maranduhára Elías hína upéva.”

Ha ambueve he’i: “Peteĩ umi maranduhára yma guaréva hína.”

Ohendúvo ko’ã mba’e, Herodes he’i: Upéva hína Juan. Che añakã’ouka va’ekue ichupe ha ko’ágä  oikove jevýva.

Herodes niko, Herodías rehehápe, ojopyuka va’ekue Juánpe yvyrakuápe ha ombotyuka ichupe koty ypytũme. Herodías, Herodes ryvy Filipo rembirekore va’ekue, ha Herodes omenda hese. Ha Juan he’i va’ekue Heródespe: “Ndaikatúi remendávo nde ryvy rembirekorére.”

Upévare Herodías ndaija’éi Juan rehe, ojukase ichupe ha ndaikatúi, Herodes niko okyhyje ichugui  oikuaágui ha’eha kuimba’e marangatu, ha omo’ã ichupe. Ohendu ramo ichupe opyta jepi oikuaa’ỹre mba’épa ojapóta. Upéicha ramo jepe Herodes ohenduse Juánpe.

Herodías katu ohecha oguahẽha peteĩ ára ou porãtava ichupe. Herodes ojapo karu guasu hi’ára mbotýre, mburuvicha kuéra ha poguasu kuéra Galiléa guápe guarã. Herodías memby oike ha ojeroky pe karu guasuhápe. Herodes oguerohory eterei pe ijeroky ha opavave upépe oĩva rovake, he’i pe kuñataĩme: Ejerure chéve reipotáva ha ame’ẽta ndéve.

Ha ome’ẽ jevy jevy ichupe iñe’ẽ, he’ívo ome’ẽtaha ichupe oimeraẽ mba’e, taha’e hetã mbytere jepe. Ha’e osẽ ha oporandu isýpe: Mba’épa ajeruréta?

He’i ichupe: Ejerure ichupe Juan Bautista akãngue.

Pe kuñataĩ oike pya’e oĩháme mburuvicha guasu ha he’i ichupe: Aipota reme’ẽ chéve ko’ágã ite voi peteĩ ña’ẽmbépe Juan Bautista akãngue.

Upéva oguapy eterei mburuvicha guasúre. Ha ome’ẽ haguére iñe’ẽ opavave rovake ndaikatúi opyrũvo hese. Upévare ojapo mante pe mitãkuña ojeruréva ichupe. Ha pya’ete omondo peteĩ ñorairõhára ogueru haguã ichupe Juan akãngue. Upéva oho koty ypytũme, oñakã’o Juánpe, ha ogueraha iñakãngue peteĩ ña’ẽmbépe. Ome’ẽ upe kuñataĩme ha ha’e ome’ẽ isýpe.

Juan remimbo’e kuéra oikuaávo, ogueraha hetekue ha oñotỹ.

Ñandejára Jesucristo Ñe’ẽ