Ñahendu Hesu. Domingo 5º Páskua
2 mayo, 2021Ñahendu Hesu. Miércoles 5º Páskua
5 mayo, 2021
Escucha el evangelio y la reflexión en: https://youtu.be/CzH3dQzhHt8
Felipe ha Santiago ára
San Juan 14, 6 – 14
Ohasa mboyvemi Tupã ykére, Jesús he’i idisípulokuérape: Che hína upe tape, upe tekove ha pe añeteguáva. Che rupive mante ikatu oñeguahë che Ru rendápe. Peẽ chekuaa ramo, peikuaa avei che rúpe. Ha ko’agãite guivéma voi peikuaa chupe, pehechágui peikóvo chupe.
Upépe Felipe osë he’i: — Mbo’ehára, ehechaukána oréve nde Ru, upéva iporãtama oréve.
Jesús he’i chupe: — Felipe, aréma niko aiko hague pene ndive, ha piko ne’ĩra chekuaa.
Upe chéve che recháva niko ohecháma che rúpe. Mba’éicha piko péicharõ rejerure chéve ahechauka haguã peẽme che ru. Nderegueroviái piko che peteĩnteha che ru ndive, ha che ru peteĩnteha chendive. Umi mba’e ha’éva peẽme niko, nda’éi che jehegui reínte ha’éva.
Che ru oĩva che pype, ha’e hína upe ojapóva opa mba’e. Peguerovia ha’e ramo peẽme che peteĩnteha che ru ndive, ha che ru peteĩnteha chendive. Nda che gueroviái ramo umi mba’e ha’éva rupi, che guerovia umi mba’e ajapóva rupi. Añetéko ha’e hína peẽme.
Upe che rehe ojeroviáva, ojapo va’erã avei umi mba’e che ajapóva. Ha tuichave mba’e katu ojapóne, che ahátagui che ru rendápe. Opa mba’e pejeruréva che rérape, che ame’ẽta peẽme. Ha péicha, umi mba’e che ajapóva rupi pehecháta mba’éichapa tuicha che Ru. Che ajapóta oimeraẽ mba’e peẽ pejeruréva chéve.
Ñandejára Jesucristo Ñe’ẽ.
ÑAMBOGUEJY ÑANDE REKOVÉPE
Ko árape ñanemandu’a hína mokõi apóstol katupyry rehe: Felipe ha Santiago.
Felipe niko San Juan Bautista disípulo va’ekue, ha’e hína upe púnta itépe omoirũ va’ekue Hesúpe, oporandu ichupe: Mbo’ehára, moõiko reiko. Ha oho opyta hendive. Felipe ningo upe oporandu vaekue Hesúpe: Mba’éicha piko ñamongarúta ko’ã hénte etápe.
Péva Hesu omboja’óramo guare pan ha pira 5 mil héntepe guarã. Ha Felipe ave upe última séna aja he’i va’ekue Hesúpe: Ehechaukána oréve Tupã nde Rúpe. Pévante rohechase.
Ñande avei che irũ ha che reindy heta mba’e ndajaikuaái ha oime Felípeicha ikatu ave ñaporanduse Hesúpe moõpa ha’e oiko, ikatúnepa ñamongaru umi hénte etápe iñembyahýi ha isoguéva. Toipe’a ñandéve upe yvága rokẽ sapy’amínte jepe jahecha haguã oimépa upépe Ñandejára, jajeroviave haguã hese.
Hesu he’íne ñandéve he’i haguéicha Felípepe: Natekotevẽi ojepe’a yvága. Jahechakuaánte va’erã Ñandejára rembiapokue ojechaukáva hína ñandéve. Ha péva ningo la ñanembo’éva avei apóstol Santiago ikuatiápe: “Mba’épe piko iporã ja’e jajeroviaha ha ndajajapói mba’eve iporãva.
Oĩrõ peteĩ ñane pehẽnguéva ijao’ỹva ha oguereko’ỹva ho’u vaerã upe árape, ha peteĩ peẽva he’i chupe: ‘Toho porãite ndéve. Eñeñuã ro’ýgui ha ekaru’ ha nome’ẽi chupe upe oikotevẽva, mba’épe piko iporã upéva. Upéicha avei -he’i Santiago- jerovia año ojechauka’ỹva tembiapo rupi, výro rei.”
Pa’i Alberto Luna.