Ñahendu Jesús Ñe’ẽ. Domingo 6º Pascua

Escucha el evangelio y la reflexión en: https://youtu.be/yswhHL8U3qQ

Domingo 6º Pascua

Juan 15, 9 – 17

Upérõ Jesús he’i idisípulo kuérape: Che pohayhu peẽme, che ru che rayhuháicha chéve. Peiko kena mborayhúpe, pe mborayhu pende rehe añandúvape. Pejapo ramo che rembipota, peikóta pe mborayhúpe pende rehe añandúvape. Péicha avei che, ajapóvo che ru rembipota, aiko pe imborayhu ha’e che rehe oñandúvape.

Añe’ẽ niko peẽme kóicha pevy’a haguã che ndive, ha pene renyhẽ haguã vy’águi. Pe tembiaporã ahejáva peẽme hína, pejoayhu che pohayhuháicha. Pe mborayhu tuichave oñandúva niko hekove jepe ome’ẽ iñirũre. Ha peẽ che irũ hína, pejapórõ che ha’éva peẽme.

Che niko nda’éi pende rehe peẽ che rembiguaiha. Tembiguái niko ndoikuaái mba’épa ijára ojapo. Che poguereko che irũ ramo, aikuaaukágui peẽme opa mba’e che ru he’i va’ekue chéve.

Peẽ nda che poravói va’ekue chéve. Che poiporavo va’ekue peẽme. Che pomondóta pejapo haguã heta mba’e iporãva ha hetápe ohupytýva.

Péicha, che ru ome’ẽta peẽme opa mba’e pejeruréva chupe che rérape. Upévare, ha’e jey voi peẽme, pejoayhu.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Oje’éva ningo upérupi: “Pe ja’u ha ñamboy’úvante la jagosáva”. Jakaru porã, ñane resãi ha ñaime guive ñande rógape, opa mba’éma oĩ porã. Péantema la vy’a ko yvy apére.

Ñahendu avei Hesu he’i ouha ñanembo’e ha oñe’ẽ ñandéve javy’a haguã hendive, ha ñane renyhẽ haguã vy’águi, he’i voi. Ha umi idisípulokuérape he’i jevy jevy ojoayhu haguã, ha’e ohayhu haguéicha ichupekuéra.

Jesús ningo oiméne opilla umi iñirũnguéra, ha’e voi oiporavo va’ekue, oiméramo jepe hetáma oiko hendive, ohendu ichupe, okaru ha oñembo’e jepe oñondive, ndaha’éi la ojoayhupáva ha’e ombo’e háicha ichupekuéra.

Ojoavy mimi hikuái oñondive, opuntease ojuehe ha mba’e, jahecha mávapa omandave ijapytépekuéra.

Upéicha avei ikatu ñañeñandu ñande che reindy ha nde che irũ. Ndajaikuaa porãi mba’épa he’ise pe mborayhu Hesu orekóva ñande rehe, ha ndajarekokuaái avei ñande rapicha kuéra ndive pe Hesu mborayhu, vy’águi ñanemyenyhẽva.

ÑAÑEMBO’E OÑONDIVE

Ñandejára Hesukrísto, ehayhúgui nde valleguápe, eiko va’ekue emonguera hasýva, emongaru iñembyahýiva, ehesape’a ndohecháiva, ekonsola hasẽva, emokunu’ũ mitã tyre’ỹ.

Nde ore renói ha poravóva ne irũrã, na orembo’emi roporohayhu haguã nde eporohayhu haguéicha, rovy’a avei ha ore renyhẽ haguã vy’águi ndéicha. Amén.

Pa’i Alberto Luna.