LECTURAS MARTES XV DEL TIEMPO ORDINARIO

LECTURAS MARTES XV DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Éxodo arandukápe oĩ háicha 2, 1-15a

Peteĩ kuimba’e Leví ñemoñaregua omenda kuña iñemoñareguáre. Hembireko imemby ichugui peteĩ mitã kuimba’emi porãite. Ha iporã raságui omokañy 30 ára aja. Ndaikatu véima ramo omokañy areve, ojapyhy peteĩ ajaka piri, omboty vlékepe ipa’ũnguéra ha omoĩ upépe imembymi; upéi oheja ichupe piritýpe y Nilo rembe’ýpe. Ha upe mitã reindy upe aja oĩ mombyrymi ichugui.

Upégui ohecháta mba’épa ojehu ichupe. Faraón rajy oñemboja upépe. Y Nílope ojahúta. Umi iñirũ nguéra oho oguata y rembe’ýre.

Faraón rajy ohechávo upe ajaka pirity apytépe, pya’e ogueruka. Upépe ohecha upe mitãmi hasẽva ha oiporiahuvereko ichupe. Upéi he’i: “Mitã hebréo hína!”

Upe mitã reindy oñemboja ha he’i ichupe: Tahána taheka ndéve kuña hebréa, omokambu haguã ichupe ne mba’erã.

Faraón rajy he’i ichupe: Pya’éke eheka! Ha upe mitãkuña ohenói isýpe. Faraón rajy he’i ichupe: Remokambúta chéve ko mitãmi ha ame’ẽta ndéve ne rembiapokue repy.

Upéicha ogueraha ha omongakuaa imembymi. Okakuaa rire, ome’ẽ jevy Faraón rajýpe. Faraón rajy oguereko ichupe imemby ramo he’ívo: “Moisés ambohéra che memby, ýgui anohẽ haguére.”

Moisés ikaria’ýma. Osẽ peteĩ ára, oho haguã ohechávo umi hebréo kuéra, umíva hetãgua.

Upérõ ohecha mba’éicha ite pevépa oiko asy hikuái. Oĩ Egiptogua oinupãva hebréope, hetãgua teépe. Oma’ẽ opa gotyo ha ndaipóri avave. Upérõ ojuka upe Egipto guápe ha upéi ojaty he’õngue yvyku’ípe.

Osẽ jevy vove upe ára ambuépe, upépe ohecha oñorairõ hikuái oñondive mokõi hebréo. Upérõ he’i upe oporonupãvape: Mba’ére piko reinupã nde rapichápe? Ha upéva he’i ichupe: Ha máva piko nde, reju haguã ore ja’o? Reju jeýma piko che jukasévo, kuehe rejuka haguéicha ku Egipto guápe?

Upéva ohendúvo Moisés oñemondýi he’ívo ijupe: “Ojekuaapáma nipo ra’e!” Faraón oikuaávo upe ojehu va’ekue, ohekauka Moiséspe ojuka haguã. Ha’e katu okañy ha oho Madiánpe. Upépe oguapy peteĩ ykua rembe’ýpe.

Tupã Ñandejára Ñe’ẽ.

SALMO ÑEMBOHOVÁI 8, 3. 14. 30-31. 33-34

Opavave: Peikoveseramo, peheka Tupã Ñandejárape.

Karugua pypukúpe niko añapymi ahávo, ha huguápe nda ikatúi añembo’y.
Y ipypukuvehápe niko ha’a, ha ysyry mante che reraha. O.

Tupã Ñandejára, ndéve niko añembo’e reju haguã che pytyvõ.
Ne mborayhu niko tuicha, eju che nohẽ ajejopy vaihágui. O.

Tupã Ñandejára, che niko vaípe ajejopy.
Eju che pytyvõ ha che pe’a ko jejopy vaígui.
Tupã Ñandejára réra aropurahéine.
Amoherakuãne ha’e tuichaha. O.

Imboriahúva ohecha ha ovy’a, ikyre’ỹne umi Tupã Ñandejára rehe ojeroviáva.
Tupã Ñandejára ojapysaka imboriahúvare, ha nomboykéi umi iñapytĩmby oikóva. O.

ALELUIA Cf. Sal 94, 8a. 7d

Aleluia.
Ani pemohatã pene korasö, pehendu uvei Tupã Ñandejára ñe’ẽ.
Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha 11, 20-24

Upe ramo Jesús oñepyrũ oñe’ẽ pochy umi távare hetave mba’e hechapyrãva ojapo haguépe. Umi upepegua niko nombyasýi iñangaipa. Ha Jesús he’i: Ejererekóke nde, táva Corazín!

Ejererekóke nde, táva Betsaida! Táva Tiro ha Sidónpe ajapo rire umi mba’e hechapyrãva ajapo va’ekue pende pype, ymáma ojere va’erã mo’ã hikuái Tupã Ñandejárape, ha omonde va’erã mo’ã ao vosakue ha oguapy tanimbu ári, ohechauka haguã ombyasyha iñangaipa.

Upévare ha’e peẽme, Tupã Ñandejára oporo mbojovakeha árape, peẽ peñe nupã pohyivéta umi táva Tiro ha Sidón peguágui. Ha nde, táva Cafarnaúm, reimo’ã piko reguahẽtaha yvágape? Tupã Ñandeajára uvei nde reitýta omanóva retãme.

Sodómape ajapo rire umi mba’e hechapyrãva ajapo va’ekue nde pype, upe táva oĩ va’erã mo’ã gueteri Ko’ágãite peve. Upévare ha’e peẽme, Tupã Ñandejára oporo mbojovakeha árape, peẽme peñe nupã pohyivétaha umi Sodoma peguágui.

Ñandejára Jesucristo Ñe’ẽ