Ñahendu Jesús Ñe’ẽ. Sábado 20º Durante el Año

Escucha el evangelio y la reflexión en: https://youtu.be/ni92WQDP_cE

Sábado 20º Durante el Año Mateo 23, 1 – 12

Upérõ Jesús oñe’ẽ jave idisípulokuéra ndive, he’i chupe kuéra: Umi fariséo ha umi Moisés léi ombo’éva niko hína umi oikuaavéva mba’épa oĩ hína Moisés léipe. Upévare, pene ñe’ẽ rendu vaerã chupekuéra ha peñeha’ã vaerã pejapo opa he’íva peẽme. Umi mba’e ojapóvante ani pejapo. Ha’e kuéra niko he’i peteĩ mba’e, ha ndojapói pe he’íva.

Ñande apére oity heta mba’e pohýi, ha’ekuéra katu ikuã’ínte jepe nomongu’éi ojapo haguã. Opa ojapóva, ojechauka haguãnte ojapo. Omboja isyváre térã ijao jyváre Ñandejára Ñe’ẽ pehẽngue mimi. Ha umi ijao katu ombofléko puku-puku ohechauka haguã gua’u ojapoha opa mba’e Ñandejára oipotáva.

Tupaópe térã karu guasuhápe ohórõ katu, ku poguasúrõ guáicha oikose. Jajotopa ramo hendivekuéra oimehápe rei, oipota tuicha ñamomaitei chupekuéra ku ñane mbo’ehára guasu ramo guáicha ha’ekuéra.

Peẽ katu, ani peheja avavépe he’i peẽme peẽ mbo’eháraha. Peẽ niko ojoryvy, ha peteĩnte pene mbo’ehára. Ha ani avavépe peje “che ru”. Peteĩnte niko pende ru, ha ha’e oĩ yvágape. Ani avei peheja avave he’i peẽme “myakãhára”. Che añónte, pe Mesías, pene myakãhára hína. Pe tuichaséva pende apytépe, toiko ku tembiguáirõ guáicha ha’e.

Umi ojejapo ha oñembotuicháva niko oñemomichĩ vaerã ágã, ha umi heko mirĩva katu oñembotuicháne.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE…

Ñande ruvichakuéra voi ningo la korrúpto py. Umíva la ñande raha vaipáva. Oĩma katu pa’i ojapóva ojapo’ỹ vaerã. Ha mba’e piko la ñande. Ikatúntema japoi ñande jehegui. Oikóvantema oikóta. Upéicha ñahendu jepi he’i lo mitã.

Hesu katu he’i ñandéve naiporãi jakausa ñande rapichápe ñane rembiapo vaikue rehe. Taha’e polítiko, ñande sy, ñande ru, obispo, ñande patrón, ñande ruvicha, taha’e ha’éva oguata karêva. Ndaikatúi ñande upévare jajapo avei pe ivaíva ha’ekuéra ojapóva, ha jaheja jajapo’ỹre Ñandejára ñanembo’éva.

Ikatúko hína che reindy ha nde che irũ, pe ñane sambyhyva rekove naiporãmbái. Ñane mbo’ehára, ñande ruvicha, ñande patrón, ñande autorida kuéra ha mba’e.

Opáichavo jahecháramo iporãha upe oje’éva ñandéve jajapo haguã, jajapónte va’erã ñande jehegui, jepe umi he’íva ñandéve ndojapóiramo.

Umíva niko ñande jajapo ndaha’éi jaipotágui ñande rapicha ñande recha ha ojepopete ñandéve. Nahániri. Jajapo niko Ñandejára, ñande Ru ha ñane mbo’ehára, he’i haguére. Jajeroviágui hese ñaneñe’ẽ rendu ichupe.

Pa’i Jasy.