LECTURAS SÁBADO XXII DEL TIEMPO ORDINARIO

LECTURAS SÁBADO XXII DEL TIEMPO ORDINARIO

LECTURA PETEÎHA:

Ñahendúta Tupã Ñandejára Ñe’ẽ San Pablo ohai va’ekue Colosas guápe 1, 21-23

Che pehẽnguekuéra: Peẽ va’ekue yma tetã mombyrygua ipy’apýpe ija’e’ỹva Tupã Ñandejárare, opa mba’e vai pejapóvare, Ko’ágã Cristo pene moingo porã jevy, omano rupi yvypóra háicha. Ha upéva ojapo pende rereko haguã henondépe, marangatúpe, pende ky’a’ỹre ha pene rembiapo vai’ỹre. Ha upevarã pene ratã va’erã pende jeroviápe, pejei’ỹre pe ñeha’arõkuaa perekóva marandu pyahu pehendu va’ekue rupi. Upéva hína pe marandu oñemombe’úva opa rupi, ha che aipytyvõva oñemoasãi haguã.

Tupã Ñandejára Ñe’ẽ.

SALMO ÑEMBOHOVÁI 53, 3-4. 6.8

Opavave: Tupã Ñandejára, ehendu che ñembo’e

Tupã Ñandejára, che renohẽ jejopy vaígui nde réra rehehápe.
Che mo’ã ne mbaretépe.
Tupã Ñandejára, che rendu ndéve añembo’évo,
ejapysaka upe ndéve ha’évare. O.

Tupã Ñandejára katu chéve che pytyvõ, ha’e che moingove.
Che mba’e kuave’ẽ amoguahẽta ndéve.
Nde réra amomba’éta.
Nde niko ne mba’e porã. O.

ALELUIA Jn 14, 6

Aleluia.
Ñandejára Jesucristo he’i: “Che hína pe Tape, Añetegua, ha Tekove.
Avave ndohói che Ru rendápe ndaha’éi ramo che rehe ae”.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Lucas omombe’u háicha 6, 1-5

Upe ramo Jesús ohasa ohóvo kokue rupi peteĩ pytu’uha árape. Hemimbo’ekuéra oipo’o hína trígo, ojykýi ipópekuéra ha ho’u hikuái. Umi fariséo oporandu ichupekuéra: Mba’ére piko peẽ pejapo pe ojejapo’ỹ va’erã pytu’uha árape?

Jesús he’i ichupekuéra: Ndapeikuaái nga’u piko Tupã Ñandejára ñe’ẽme he’iha David ha iñirũnguéra iñembyahýi ramo guare, oike hague Tupaópe ha’e ha iñirũnguéra, ha ho’u umi mbuja Tupã Ñandejárape oñemboyke va’ekue.

Ha’e térã iñirũnguéra ndaikatúi va’ekue ho’u umíva, pa’ikuérape guarã añónte va’ekue umi mbuja. Ha he’ive: Che, yvypóraicha aju va’ekue, areko che pópe ha’évo mba’e mba’épa ikatu ojejapo pytu’uha árape.

Ñandejára Jesucristo Ñe’ẽ