DOMINGO TRIGÉSIMO TERCERO DURANTE EL AÑO

DOMINGO TRIGÉSIMO TERCERO DURANTE EL AÑO

LECTURA PETEÎHA:
Ko’ágã ñahendúta Tupã Ñandejára ñe’ẽ Daniel arandukápe oĩ háicha 12, 1-3

Upévo oúta Miguel, Ñandejára ánhel ruvicha, omo’ã mbaretéva ne retã guápe. Tuicha jepy’apy oĩta upe ramo, oĩ’ỹ haguéicha araka’eve, oiko ypy guive tetãnguéra.

Oguahẽvo upe ára, osẽta jejopy vaígui umi ne retãgua, héra ojehaíva kuatiápe. Heta umi oñeñotỹ va’ekue apytégui opu’ã jevýtava, oĩ oikovétava opa árape guarã, ha oĩ okyhyjétava ha oñehundi etétava.

Kuimba’e arandu oisãmbyhy va’ekue hetápe tape porãre, overáta pe arapýre, mbyjaitáicha omimbíta, opa árape guarã!

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 15, 5. 8-11

Opavave: Ñandejára, nde pópe amoĩ che rekove.

Ñandejára, nde hína opa mba’e chéve guarã.
Nde pópe oĩ che rekove.
Opa árape Ñandejára rehe che mandu’a,
ha’e oĩ ramo che ypýpe nda’ái chéne. O.

Upéva rehe, che py’a rory, ha py’a guapýpe aikóne.
Nda che rejái chéne amano.
Nde reheja mo’ãi ne irũme yvy kuápe ojeity. O.

Nde rehechaukáne chéve jeikove rape.
Ne rendápe aime ramo
vy’águi che myenyhẽne.
Nde ypýpe vy’a ndopáiva. O.

LECTURA MOKÕIHA:
Ko’ágã ñahendúta kuatiañe’ẽ ojehai va’ekue Hebreoskuérape 10, 11-14. 18

Umi Pa’i judío ko’ãga peve, ára ko’ẽ rehe, umi mymbajuka jeýnte oikuave’ẽ jevy jevy, ndaikatúi ramo jepe umíva ombogue angaipa. Jesucrísto katu oikuave’ẽ hekove opavave angaipa rehe peteĩ jevy ha opa ára guarã, ha upéi oguapy Ñandejára akatúape.

Upépe oĩ hína, Ñandejára omoĩ peve ipyenda ramo umi ichupe ohayhu’ỹva. Peteĩ oikuave’ẽme hekove peteĩ jevyete, ha’e omoporã añete opa ára guarãma umi Ñandejárape guarã oñemboyke va’ekuépe.

Aipo ramo, umi angaipa ojeheja reipa marõ, natekotevẽ véima kuave’ẽmby angaipa rehe.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Lc 21, 36
Aleluia.
Peñe mbosako’íke aipo ramo, peñembo’e opa ára, ikatu haguã peñemo’ã opa ko’ã
mba’e oikótavagui, ha ikatu haguã peime Ñandejára ra’y renondépe”.
Aleluia.

EVANGELIO
Marandu porã Ñandejára Jesucrísto rekove ha hemimbo’e San Marcos omombe’u háicha 13, 24-32

Upérõ Jesús he’i: Umi jehasa asyha ára ohasa rire, kuarahy iñipytũne, jasy ndohesapevéi chéne, mbyja kuéra ho’apáne, ha opa mba’e yvágape oĩva okuchupáne. Ha upévo che recháne ajúvo arai ári, tuicha pu’aka ha mimbipápe. Ha amondóne che ánhelkuéra ombyatypávo umi che aiporavo va’ekue opa guio ko yvy apéregui.

Peheja umi ígo máta ta pene mbo’e. Pehecha vove umi hakã kyrỹi hogue roky ñepyrũmaha, peikuaa hína oguãhẽmaha ára haku. Péicha avei, pehecha vove ko’ã mba’e ojehuha, peikuaáta hi’aguĩmaha che aju jeyha ára. Añetéko ha’e peẽme. Ko’ã mba’e ojehúta omanomba mboyve umi ko’ágã oikovéva. Yvága ha yvy ikatu opa, ko’ã mba’e che ha’éva katu nahániri.

Avave ndoikuaái mba’e árapepa térã araka’etépa ajúne ágã. Ñandejára ánhelkuéra ndoikuaái, che jepe ndaikuaái. Che ru añónte pe oikuaáva.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.