LECTURAS VIERNES SEGUNDO DE ADVIENTO

LECTURAS VIERNES SEGUNDO DE ADVIENTO

LECTURA PETEÎHA:

Ko’ágã ñahendúta Tupã Ñandejára ñe’ẽ Isaías arandukápe oĩ háicha 48, 17-19

Péicha he’i Tupã Israel Jára marangatu, ivaívagui nde pe’áva. Che, Tupã nde Jára, rombo’e ndéve ou porãtava rehe ha ahechauka ndéve nde raperã.

Rehendu che ñe’ẽ, nde vy’a okakuaa va’erã mo’ã ysyry guasúicha, ha ypu’ã yguasúpe guáicha reñakã rapu’ã va’erã mo’ã! Yvy ku’ícha heta va’erã mo’ã ne ñemoñare, umi nde hegui osẽva yvy ku’i ra’ỹi yguasu rembe’ýpe guáicha va’erã mo’ã. Ndojehapo’ói va’erã mo’ã nde réra, ha ndojeíri va’erã mo’ã che renondégui.

Tupã Ñandejára Ñe’ẽ.

SALMO ÑEMBOHOVÁI 1, 1-4. 6

Opavave: Tupã Ñandejára oñangareko imarangatúva rapére.

Ovy’a ojapo’ỹva iñañáva ñe’ẽ, oiko’ỹva iñangaipáva ndive,
ojehe’a’ỹva umi Tupã Ñandejárare oñembohorýva ndive.
Tupã Ñandejára rembiapoukapy ipy’a ombohory,
ha hese ojepy’a mongeta ára ha pyhare. O.

Ojogua ku yvyra mátape oñeñotỹva y rembe’ýpe,
ome’ẽva hi’a hi’árape,
ha araka’eve ndahoguekúiva:
Opa mba’e ojapóva osẽ porã ichupe. O.

Ndaupéichai umi hembiapo vaíva,
kapi’i piru kuéicha umívape yvytu omboveve.
Tupã Ñandejára oñangareko imarangatúva rapére,
hembiapo vaíva rape katu opa vai. O.

ALELUIA

Aleluia.
Tupã Ñandejára oúta, pese pehuvaitï;
ha’e py’aguapy Ruruvicha.
Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha 11, 16-19

Upe ramo Ñandejára he’í: Mávarepa ikatu ambojoja umi ko’agãgua? Ojogua umi mitã pe okáre oñembojarúva ha osapukáiva ambuépe he’ívo: “Rombopu niko peẽme mimby ha ndapejerokýi, ropurahéi peẽme purahéi jahe’o ha napenerasẽi.”

Ou niko Juan, ndokarúiva ha ndo’úiva kaguy, ha peje hese oguerekoha mba’epochy. Upéi katu aju che, yvypóraicha aju va’ekue, akaru ha ha’úva vino, ha peje che rehe, che karu ha che ka’uha, aikoha umi heko añáva ndive ha umi viru omono’õva Rómape guarã ndive. Tupã Ñandejára arandu niko ojehecha ñane rembiapokue rupi.

Ñandejára Jesucristo Ñe’ẽ.