DOMINGO TERCERO DE ADVIENTO

DOMINGO TERCERO DE ADVIENTO

LECTURA PETEÎHA:

Ko’ágã ñahendúta Tupã Ñandejára ñe’ẽ Sofonías arandukápe oĩ háicha 3, 14-18a

Epurahéi Jerusalén, esapukái vy’águi Israel retã, evy’a Jerusalén! Evy’a nde py’aite guive! Ñandejára nda ipochyvéima ne ndive, omosẽma nde rehe ija’e’ỹvape.

Ñandejára Israel ruvicha nde pype oĩ. Ndo jehu mo’ãvéi mba’eve ivaíva. Upe ramo Jerusalénpe oje’éta: “Ani rekyhyje Sión, térã reheja nde jyva ikangy!” Tupã nde Jára oĩ nde pype, ha’e imbarete ha ne mo’ãta!

Ñandejára ovy’a ne ndive. Imborayhúpe ne moingove pyahúta. Ovy’a ha opurahéita nde pýri. Ojevy’a háicha arete jave.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI Is 12, 2-6

Opavave: Pembo aguyje Ñandejárape, héra pehenói.

Ha’e hína Ñandejára, jejopy vaígui che pe’áva,
hese ajerovia ha nda kyhyjéi.
Che Jára che mo’ã ha che mombarete,
opa mba’e vaígui che pe’a. O.

Y penohẽta vy’a pópe ha ivaívagui ñesẽ ykuágui pey’úta.
Upe árape pejéta: “Pembo aguyje Ñandejárape, héra pehenói,
Peikuaauka tetãnguérape imba’e mombe’upyrã,
perosapukái héra jojaha’ỹ. O.

Pepurahéi Ñandejárape, ojapo hague rehe mba’e ndaijojahaiva,
ha opa rupi ete pemoerakuã.
Pesapukái vy’águi Siongua:
¡Tuichaitégui pende apytépe Israelgua Imarangatúva!” O.

LECTURA MOKÕIHA:
Ko’ágã ñahendúta Tupã Ñandejára ñe’ẽ San Pablo ohai va’ekue Filipos guápe 4,4-7

Che pehenguekuéra: Pevy’a opa ára Ñandejára rérape. Ha’e jevy peëme: Pevy’a! Opavave toikuaa pene mba’e porãha. Ñandejára hi’aguĩma.

Ani pejepy’apy mba’eve rehe, pemoĩ uvei opa mba’e Ñandejára pópe pene ñembo’épe; pejerure ha peme’ẽ avei ichupe pende aguyje. Ha Ñandejára ome’ẽne peẽme ipy’a guapy, tuichavéva opa ikatu va’erãgui yvypóra oha’arõ. Ha pe py’a guapy oñangarekóne pende py’a ha pene ñe’ã rehe, Cristo Jesús rupi.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Is. 61, 1
Aleluia.
Ñandejára espíritu oĩ che pype, che poravo hague rehe imba’erã.
Ha’e che mondo araha haguã ñe’ẽ iporãva mboriahukuérape

Aleluia.

EVANGELIO
Marandu porã Ñandejára Jesucrísto rekove ha hemimbo’e San Lucas omombe’u háicha 3, 2b-3 10-18

Umíva umi árape, Ñandejára oñe’ẽ Juánpe, Zacarías ra’ýpe, oikóva hína umi desiértore. He’i chupe oguejy haguã rrío Jordánpe. Ha Juan oñepyrũ oñemoñe’ẽ opavavépe. He’i chupekuéra ojevy vaerãha Ñandejárape, oñemongarai va’erãha, Ñandejára oheja rei haguã chupekuéra iñangaipa.

Upépe umi ojapysakáva oporandu chupe: — Mba’éiko reipota rojapo.

Juan he’i chupekuéra: — Umi ijao mokõiva, tome’ẽ peteĩ pe oguereko’ỹvape. Pe oguerekóva ho’u va’erã, tomboja’o oguereko’ỹva ndive.

Umi impuésto kovraha oñemboja avei oñemongarai haguã. Ha oporandu hikuái Juánpe:— Mbo’ehára, mba’éiko rojapo va’erã rojesalva haguã.

Juan he’i chupekuéra: — Anive hendape’ỹ pe kovra jo’a-jo’a pende rapichápe.

Oĩ avei soldádo upe rupi. Oporandu ave hikuái Juánpe: — Ha oréiko mba’e rojapo kuaa.

Juan he’i chupekuéra: — Anive pejopy pende rapichápe peipe’a haguã chuguikuéra pláta.
Peñekontenta pe oñeme’ẽva peẽme reheve.

Umi ohendúva hína opondera joaite, ha oikuaase hikuái ndaha’éipa Juan upe Mesías.

Juan katu osẽ he’i chupekuéra: — Che niko pomongarai ýpente. Oime katu peteĩ oútava ha pene mongaraítava Espíritu Santo ha tatápe. Ha’e imbareteve chehegui, ha nda’ijáiva chéve ajora chupe ipy rehegua sãnte jepe. Ku yrupẽ ipópeicha, oipe’áta ojuehegui umi heko porãva, heko vaívagui. Osalváta umi heko porãvape, umi heko vaívape katu oitýta tata ogue’ỹvape.

Opáicha Juan oñemoñe’ẽ oikóvo opavavépe, ha ohenduka chupekuéra marandu porã.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Jesukrísto.