SOLEMNIDAD DE SANTA MARÍA, MADRE DE DIOS

OCTAVA DE LA NATIVIDAD DEL SEÑOR SOLEMNIDAD DE SANTA MARÍA, MADRE DE DIOS

LECTURA PETEÎHA:

Ko’ágã ñahendúta Tupã Ñandejára ñe’ẽ Números arandukápe oĩ háicha  6, 22-27

Tupã Ñandejára he’i Moiséspe he’i haguã Aarón ha ita’ýrakuérape oipuru haguä ko’ã ñe’ẽ ohovasa ramo Israel guápe:

“Tupã Ñandejára ta nde rovasa ha to ñangareko nde rehe. Ñandejára ta hory nde rechavo ha to hechauka ndéve py’a porã.

Tupã Ñandejára ta nde rayhu ha to me’ẽ ndéve py’a guapy”.

 “Ha’e kuéra ohenói ramo che réra ohovasávo Israel guápe, che ahovasáta ichupe kuéra”.

Tupã Ñandejára Ñe’ẽ.

SALMO ÑEMBOHOVÁI 66, 2-3. 5-6.8

Opavave: Tupã Nadejára ta ñande poriahuvereko ha ta ñande rovasa.

Tupã Ñandejára ta ñande poriahuvereko, ha ta ñande rovasa,

to ma’ẽ ñande rehe, to jekuaa  opa rupi hembipota,

ha opa tetã rupi ha’e oporope’aha jejopy vaígui. O.

 Opa tetã to aguyjeve me’ẽ ndéve

  To purahéi vy’a pópe tetã nguéra,

resaimbyhýgui opavave teko jojápe,

hekopete remboguata tetãnguéra yvy ári. O.

Opa tetã to aguyjeve me’ẽ ndéve

Maymáva ta ne momba’e guasu,

Tupã Ñandejára, ñande ru, ñande rovasa.

Ha toiko ipoguýpe mamo mombyryve. O.

LECTURA PETEÎHA:

Ñahendúta Tupã Ñandejára Ñe’ẽ San Pablo ohai va’ekue Galacia guápe    4,4-7

Che pehenguekuéra:

     Oguahévo ára oñemoĩ va’ekue katu, Tupã Ñandejára ombou ita’ýrape, ou ypy va’ekue ko yvy ári peteï kuñágui, Moisés rembiapoukapy poguýpe, ñande pe’a haguã upe tembiapoukapýgui, ha jajerereko Tupã ra’y ramo. Ha ta’ýrama hague rehe, Tupã Ñandejára ombou ita’ýra Espíritu ñande py’ápe. Ha upe Espíritu osapukái: “Abba”, he’iséva “Che Ru”.

Aipo ramo, ñande ndaha’e véima tembiguái, ñande Tupã Ñandejára ra’ýma. Ha ñande ita’ýra hague rehe, Tupã oipota ñande avei jaiko mba’e jára ramo.

Tupä Ñandejára Ñe’ẽ.

ALELUIA    Cfr Heb 1,1-2

Aleluia.

Ymaite Tupã Ñandejára oñe’ẽva’ekue ñande ru ypykuérape heta jevy ha heta hendáicha, umi maranduhára rupi.

Ko’ágã katu. Ko’ã ipahavevogua árape, oñe’ẽ ñandéve ita’ýra rupi.

Aleluia.

EVANGELIO

Ko’ágã ñahendúta Ñandejára Jesucrísto  rekove ha hemimbo’e San Lucas omombe’u háicha 2, 16-21

Upe ramo umi Ovecha rerekua oho pya’ete hikuái pe Ángel he’i haguépe ichupekuéra ha ojuhu María ha Josépe, ha pe mitãme oñeno hína pe mymba karuhápe.

Ohechávo ichupe, oñemoĩ omombe’u hikuái mba’épa he’i ra’e ichupekuéra Tupã Ñandejára remimbou, pe mitã rehe. Ha opa ohendúva ijurujái opytávo umi ovecha rerekua he’íva rehe. María oñongatu opa mba’e ipy’apýpe ha ojepy’a mongeta.

Ovecha rerekuakuéra katu oje’ói jevy oguerohory ha omomba’e guasúvo Tupã Ñandejárape opa mba’e ohendu ha ohecha va’ekue rehe. Ojehupaite niko oje’e haguéicha ichupekuéra.

Ha 8 ára haguépe ombyapi’o hikuái pe mitã, ha ombohéra Jesús, pe téra he’i va’ekue Tupä remimbou Maríape hye guasu mboyve.

Ñandejára Jesucrísto  Ñe’ẽ.