Ñahendu Jesús Ñe’ẽ. Sábado 4º Tiempo Durante el Año

Escucha el evangelio y la reflexión en: https://youtu.be/7KGcrkxC8Gs

Sábado 4º Durante el Año Marcos 6, 30 – 34

Umi disípulokuéra Jesús omondo va’ekue ou jevy oñembyaty hendive ha omombe’u chupe opa umi mba’e ojapo vaekue ha ombo’e vaekue hikuái. Jesús he’i chupekuéra: —Jaha japytu’u ñane añoháme.

Hetágui umi ou ha ohóva Jesús rendápe, nda’ijái chupekuéra okaru haguãnte jepe. Ojupi hikuái peteĩ kanóape ha oho ha’eñoháme. Oĩ katu ohecháva chupekuéra oho ramo, ha oikuaa hikuái moõpa ohóta hína.

Upérõ, opáguio ojeho upépe, ha ha’ekuéra raẽ oguãhẽ Jesúsgui. Oguejývo Jesús pe kanóagui, ha ohechávo hetaha umi ijatýva, oiporiahuvereko chupekuéra. Ha’etévaicha chupe ku ovecha herekua’ỹvaicha oĩha hikuái. Ha oñepyrũ ombo’e chupekuéra heta mba’e.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Heta ñañeha’ã rire, ñamba’apo, ñaguahẽse ñande rógape japytu’u. Japytase ñane ño, ani oĩ ayvu, sapukái térã oúva ojeplaguea ñandéve upépe hína. Ha ñandepochy voi oiméramo ñanemyengekóiva japytu’úta vove. Ñandekueráima problémagui.

Pe tembiapo orekóva Hesu irũ nguéra niko avei omokane’õ pe mávape, oguatáva peteĩ ógagui ambuépe, oñe’ẽva peteĩ ndive, ha upéi oñe’ẽve ambue ndive.

Pe oñemoñe’ẽva hetápe, oñembo’éva hapichare, oñeha’ãva omoingoporã oikovaívape, ohendúva hapicha oiko asývape, oipytyvõva chupe ikatu háicha, amo ipahápe ikane’õ avei pe oipytyvõva ha oikotevẽ avei pytu’umi ha piro’y.

Hesu disípulokuéra ou jevývo hendápe ojecha hesekuéra kane’õnguére oguahẽha oúvo. Ha upémaramo Hesu he’i oho haguã opytu’umi oñondive ha’eñoháme. Hetágui umi ojeréva hesekuéra ha nomopa’ũiva chupekuéra mba’everã.

Osẽ oho hikuái ha oguahẽ mboyve umi oikóva hapykuéri ohóma katu ohape ha’arõ chupekuéra. Ha oguahẽvo upépe ojetopa jeýma ojerepa hesekuéra hina. Ikatu va’erã niko Hesu ipochy mba’e hendivekuéra ajépa, omosẽ mba’e, ha he’i chupekuéra: ndapehechakuaái piko orepytupamaha, ndaikatúi piko orerejami sapy’amínte jepe ropytu’u.

Mba’épa reñandu che reindy ha nde che irũ ehechávo Hesúpe. Ojeplaguea, ipochy ha oja’o rangue, oiporiahuvereko ha oma’ẽ asýva umi mboriahu atýrare. Ohechakuaáva avave anga nopenaiha hesekuéra, oikoha guácho tyre’ỹicha, tesaráipe. Mba’épa ere Hesúpe ombotapykuéva pytu’u, oñembyesaráiva kane’õgui, oñepyrũ jeýva ombo’e chupekuéra, oñembo’e ha oipohano.

Pa’i Alberto Luna.