Ñahendu Jesús Ñe’ẽ. Pindo karai ára

Escucha el evangelio y la reflexión en: https://youtu.be/GCv7uWZh_pk

Pindo karai ára. Domingo de Ramos Ciclo C Lucas 19, 28 – 40

Upérõ Jesús oipykúi hape Jerusalén gotyo. Ha oguãhẽvo Betfagé ha Betania ypýpe, opyta Monte Olívospe. Upégui omondo henonderã mokõi idisípulope. He’i chupekuéra:— Tapeho peguãhẽ amóva amo puéblope. Ágã peguãhẽvo pejuhúta hína peteĩ vúrro
oñeñapytĩva, ne’ĩrava gueteri avave ojupi hi’ári. Pejoráta ha pegueru chéve. Ha oime mba’érõ oporandúva peẽme maerãpa pejora, pejéta: “Ñandejára oikotevẽ hese.”

Idisípulo kuéra oho, ha ojuhu hikuái Jesús he’i haguéicha chupe kuéra. Ha ojora jave hína pe vúrro, osẽ ijára oporandu chupekuéra: — Maerãiko pejora.

Ha’ekuéra he’i: — Ñandejára oikotevẽ hese.

Ha osẽ ogueraha hikuái pe vúrro Jesús rendápe. Ijapére katu omoĩ hikuái umi ijao hamba’e Jesús oguapy haguã hi’ári. Ha Jesús oho aja Jerusalénpe, maymávante oipyso hapépe ijahoja. Ha oguãhẽvo Monte Olívos ypýpe ha oguejývo hikuái Jerusalén gotyo, maymáva umi ohóva hapykuéri oñepyrũ osapukái vy’apópe. Oguerohory joa hikuái Ñandejárape opa umi milágro Jesús ojapo vaekuére. He’i hikuái:
Tupã tohovasa ñande rréype Ñandejára rérape oúva. Py’a guapy toĩ yvágape ha ñamomba’e guasu Ñandejárape.”

Umi géntekuéra apytépe oĩ ave fariséo kuéra. He’i hikuái Jesúspe: — Mbo’ehára, eréna nde disípulokuérape tokirirĩ.
Jesús katu he’i chupekuéra:— Ha’éta peẽme peteĩ mba’e. Ko’ãva okirirĩ ramo, umi ita jepe oñemoĩne osapukái.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Mburuvicha guasu niko ou mba’yru porãme, coche, camionétape. Ikatu voi avión térã helicóptero-pe mba’e. Oúne hendive heta poguasu, policía, soldado, tuicha háicha oñemomýi ha tyapu guasúpe oñemoguahẽ. He’ise niko mba’éichapa ou ñane rendápe ñande ruvicha. Péva ohechauka avei oñemoĩpa ñande ykére ñaneandu ha ñanerendu haguãicha, térãpa oñemoĩ voi yvate, mboriahu ikatu’ỹ hápe oñemboja.

Jahecha Jesús oike Jerusalén-pe peteĩ burrito ári. Jaikuaa niko ñande mboriahu apĩnte ojupiha oguata chavurri ári. Ha péicha oiméne raka’e Jesús ohechaukase ndouiha oñemoĩvo avave akã ári. Ndoúi mboka ha soldado reheve jakyhyje haguãicha chugui.

Nahániri che irũ ha che reindy. Ñande ruvicha ou py’a porã ha mborayhu pópe.

ÑAÑEMBO’E OÑONDIVE

Ñandejára Jesucristo, nde ha’e ore ruvicha. Ndéve roguerohory ejúvo mborayhu pópe eme’ẽ nde rekove ore rehe. Rohupi ha rombokacha ore pindo karai nde rérape. Amén.

Pa’i Alberto Luna.

Che aguyjevete mante opavave peẽme pehendúva Jesús ñe’ẽ ha pembohasa jeýva pende rapichápe. Pene pytyvõ rupi mombyryve ha hetaitevépe roguahẽ.