Ñahendu Jesús Ñe’ẽ. Vigilia Pascual Sábado Santo

Escucha el evangelio y la reflexión en: https://youtu.be/rynj4Whut34

Vigilia pascual Sábado santo Ciclo C Lucas 24, 1 -12

Pe semána ñepyrũha ára ko’ẽme umi kuña oho va’ekue Jerusalénpe Jesús ndive, oho upe itakuápe. Ogueraha hikuái umi mba’e ryakuã porã ombosako’i vaekue. Oguãhẽvo katu, ojuhu pe ita ombotýva pe itakua juru noĩ veimaha hendápe. Ha oikévo hikuái, ndojuhúi Ñandejára Jesús retekue. Oñemondýi hikuái ha ndoikuaái mba’épa ojapóta. Ha peichahágui, hesaho sapy’a hikuái mokõi kuimba’ére oñembo’ýva hína pe ijypýpe.

Umi ijao morotĩ sakã ha omimbipa. Ha okyhyjégui opyta itĩndy hikuái. Umi kuimba’e katu he’i chupekuéra: — Mba’éreiko peheka oikovévape omanóva apytépe. Ndaipóri véima ápe. Oikove jeýma. Na pene mandu’ái piko he’i hague peẽme oĩ ramo gueteri Galiléape: “Tekotevẽ niko chéve che me’ẽ hikuái heko vaíva pópe, upéi añemosãingo kurusúre, ha mbohapy ára haguépe aikove jey.”

Upépe imandu’a hikuái upe Jesús he’i vaekuére. Ha ojevývo upe itakuágui, oho hikuái omombe’u ko’ã mba’e umi 11 apóstolkuérape ha opavavépe. Umi kuña apytépe oĩ vaekue upérõ María Magdaléna, Juana, ha María Santiago sy. Umi apóstolkuéra katu oimo’ã vyresaha umi mba’e umi kuña he’íva. Ha ndogueroviái hikuái.

Opáichavo, Pedro osẽ odipara oho pe itakuápe. Ha oma’ẽvo hyepýpe, savanántema ohecha. Ha pya’e ojevy hógape ha opondera pe ohecha va’ekuére.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Pe ñane gente mano vove térã katu ho’a ramo ñande ári degrásia, mba’asy vai ha mba’e, umíva tuicha ñande reity ha ñanembotyryry are. Ndaha’éi hína ja’a ñapu’ã, jajetyvyro ha jaháva hese mba’everõ guáicha. Oĩ hína umi mba’e pohýi oguapýva ñande py’a ruguáre ha ñande reja vaíva.

Upéicha jave jepe avei oime ñande rapicha ohecha kuaáva ha oúva oipytyvõ, omoirũ, oñembo’e ha oñandu ñanendive ha ombovevúi ñandéve jehasa asy. Péina jahecha umi kuña nguéra omoirũ va’ekue Jesús pe oho upe sementériope ohecha mba’éichapa opyta Jesús retekue omohenda porã haguã upe apúrope péicha péichante ojeheja vaekue sepultúrape pytũma ramo upe viérne. Ha upépe ojuhu Ñandejára remimbou he’íva ichupe kuéra anívema oñembyasy, Jesús oikove jevymaha.

Mba’épa, che irũ, nde rejuhu nde rapépe ome’ẽva ndéve esperánsa ha nemopu’ãva nekangy jave. Mávapa, che reindy, umi oñemoñe’ẽva ndéve epu’ã jevy haguã re’a vove. Ndaha’éi chénepa umíva Ñandejára remimbou oñandukáva ndéve Jesús oikove ha oimeha nde ypýpe ne añuávo imborayhúpe.

Pa’i Alberto Luna.