LECTURAS DOMINGO SÉPTIMO DE PASCUA

LECTURAS DOMINGO SÉPTIMO DE PASCUA

LECTURA PETEÎHA:
Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha
1, 1-11

Che kuatiañe’ẽ tenonde guápe, nde Teófilo rejererohory etéva, añe’ẽ va’ekue opa mba’e Jesús ojapo ha ombo’e va’ekue rehe iñepyrũha guive, yvágape ojehupi hague ára peve. Oho mboyve, Espíritu Santo rupi oheko mbo’e hembiaporãre umi apóstol ha’e oiporavo va’ekuépe.

Ha omano rire ojechauka va’ekue ha’ete voi, ohechauka porãvo oikoveha, 40 ára aja ojechauka ichupekuéra ha oñe’ẽ ichupekuéra Ñandejára Reino rehe. Oiko aja gueteri ijapóstolkuéra ndive, Jesús he’i ichupekuéra ani haguã oho Jerusaléngui.

He’i ichupekuéra: Peha’arõ toiko raẽ upe che Ru he’i va’ekue, che añe’ẽ hague peẽme. Añete, Juan oporomongarai va’ekue ýpe, mbovy ára riremínte katu peẽ peñemongaraíta Espíritu Sántope.

Umi oñembyaty va’ekue Jesús ndive oporandu ichupe: ¿Ore Jára, ko’ágãpa
remopu’ã jevýta tetã Israel?

Jesús he’i ichupekuéra: Peẽme ndaijái peikuaávo, mba’e árape térã araka’etépa
oikóta umi mba’e che Ru oheja va’ekue ipoguýpe. Espíritu Santo oúvo pende ári
katu perekóta pokatu ha pesẽta pe che myerakuãvo Jerusalénpe ha opa Judea ha
Samaría pýre ha opa ko yvy jerekuévo.

Upéva he’ipávo, ha’ekuéra oma’ẽ aja hese, Jesús ojehupi ha peteĩ arai ojaho’i ha
ndohechavéi hikuái ichupe. Ha ha’ekuéra oma’ẽ aja yvága rehe, ohechávo
mba’éichapa Jesús oho mombyry, mokõi kuimba’e ijao morotĩva ojechauka ijyke
rehekuéra, ha he’i ichupekuéra: Peẽ Galileagua, ¿mba’e rehe piko pepyta pema’ẽ
yvága rehe? Upe Jesús voi oĩ va’ekue pene ndive ha ojehupi va’ekue yvágape, ou
jevýta pehecha haguéicha oho.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 47, 2-3. 6-9
Opavave: Ñamomba’e guasu Ñandejárape ojupíva yvágape.
Opa tetãnguéra pejepopete,
pesapukái vy’águi Tupãme.
Ñandejára yvateteguágui jakyhyje va’erã,
ha’e hína mburuvicha guasu. O.

Ñandejára ojupi iguapyhápe,
sapukái ha turupúpe.
Pepurahéi! Pepurahéike Ñandejárape!
Pepurahéi! Pepurahéike ñande ruvicha guasúpe! O.

Ñandejára hína tetãnguéra ruvicha guasu,
pepurahéi ichupe peteĩ purahéi iporãva.
Ñandejára oisãmbyhy tetãnguéra,
Ñandejára oĩ iguapyha marangatúpe. O.

LECTURA MOKÕIHA:
Ñahendúta Tupã Ñandejára Ñe’ẽ San Pablo ohai va’ekue Éfeso guápe 1, 17-23
Ajerure Ñandejára Jesucrísto Tupãme, Túva tuichaitéva, ome’ẽ haguã peẽme pe Espíritu, pene moarandu ha oikuaaka haguã peẽme mba’eichaguápa Ñandejára, ha añetehápe peikuaa haguã ichupe.

Ajerure Ñandejárape omyesakã haguã peẽme pene akãme perekóva, peikuaa porã
haguã mba’e peha’arõ haguãpa ha’e pene renói raka’e, ha mba’eichaitépa ha’e
tuicha ohovasa opa mba’épe, umi imba’évape, ha mba’éichaitépa tuicha ha
ijojaha’ỹva pe ipokatu ñane pytyvõva, ñande, Cristo rehe jajeroviávape.

Ko ipokatu ñane pytyvõva niko hína pe pu’aka Ñandejára ohechauka mbarete
va’ekue, omopu’ã jevy ramo Crístope, ha omboguapy ichupe ijykére, yvágape.
Ñandejára omoĩ ichupe opaichagua yvategua ruvicha ári, ha opaite mba’e oĩva ári,
ko’agãgua ha oútava. Ha’e omoĩ opaite mba’e Cristo py guýpe, ha omoĩ Crístope
voi iglésia akãrõ, ha pe iglésia niko Cristo rete hína. Ha’e rupi opaite mba’e
oñemohenda porãmba.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Mt 28, 19a. 20b.
Aleluia.
Ñandejára ome’ẽ chéve pokatu opa mba’e ári, yvágape ha yvýpe. Tapeho aipo
ramo opa tetã rupi pe porombo’e ha pejapo ichupekuéra che remimbo’e ramo.
Peikuaáke, che aimetaha pene ndive opa ára ko yvy opaha peve.
Aleluia.

EVANGELIO
Ñahendúta Ñandejára Jesucristo rekove ha hemimbo’e San Juan omombe’u háicha 28, 16-20
Opavave: Romomba’e guasu ndéve, Ñandejára.

Upérõ umi 11 Jesús disípulo oho Galiléape, pe sérro Jesús he’i haguépechupekuéra oho hag̃uáme. Ha ohechávo chupe, oñesũmba hikuái henondépe. Oĩ jepe ijapytépekuéra ndogueroviapáiva ha’eha Jesús pe ohecháva.

Jesús katu oñemboja hendápe kuéra ha he’i: — Opa mba’e yvága ha yvýpe oĩva niko Ñandejára omoĩmba che pópe. Tapeho aipo ramo opa tetã rupi, pembo’e opavavépe ha pejapo chuguikuéra che disípulo.

Pemongarai umíva Túva, Ta’ýra ha Espíritu Santo rérape, ha pembo’e chupekuéra opa umi mba’e che pombo’e va’ekue peẽme. Peikuaáke aimetaha pene ndive ára paha peve.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Jesucristo.