Ñahendu Jesús Ñe’ẽ. Miércoles 14º Durante el Año

Escucha el evangelio y la reflexión en: https://youtu.be/D7nzuCz0lKE?feature=shared

Miércoles 14º Durante el Año Mateo 10, 1 – 7

Upérõ Jesús ombyaty umi 12 idisípulope. Ha peteĩ-teĩme ombohasa pu’aka ikatu haguãicha ha’ekuéra ave omosẽ demóño hamba’e, ha omonguera haguã opaichagua hasýva. Ko’ãva hína umi 12 apóstol: tenondete oĩ Simón hérava avei Pedro, ha tyvýra Andrés.

Upéi Santiágo ha tyvýra Juan, Zebedeo ra’y mokõivéva. Upéi katu Felipe ha Bartolomé, Tomás ha Mateo, ku impuésto okovráva Róma peguarã. Oĩ avei Santiágo, Alfeo ra’y, ha Tadeo. Upéi katu Simón, ku hetãre oñorãirõsetéva. Ipahápe oĩ Judas Iscariote, ku otraisiona va’ekue Jesúspe.

Jesús omondo mboyve umi 12pe, oñe’ẽ chupekuéra kóicha: Ani pehótei umi hudío’ỹva oikoha rupi. Ha ani ave peguãhẽ Samariagua róga kuéra rupi. Israelgua rendápente tapeho.

Umíva niko oikopa rei ku ovecha okañymbávaicha. Tapeho peje chupekuéra oguãhẽtamaha hína Ñandejára Rréino.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

He’i ningo ñe’ẽ: “Ñande retáramo opaichagua mante ma ñaime”. Ñande jopara. Ha oje’e avei: “Ndaipóri iporãmbáva ha ndaipóri ivaipáva”. Ñande Iglesia-pe avei opaichagua ñaime. Ñande jopara porã voi ja’e porãséramo jajeroviáva Ñandejárare ha ñamomýiva tembiapo hérape. Oime ñande rapicha imba’e porã añetéva ha ñaime avei ñande rari’imíva, ha ñaneñarõva gueteri.

Ha péva ohecha umi ndohayhúiva ñande Iglesia ha he’íva: umi tupaópe ohóva niko iñañave. Ha sapy’ánte ko osẽ diáriope, téle ha rrádiope, pa’i, térã obispo rembiapo vaikue ñanemotĩva, ambue tetãme ha ñane retãme avei. Ha ndofaltaichéne he’íva ñandéve: Iporã nde cristiano, iporã nde sociokuéra! Ha japyta ñande ñatĩro, ñande rova pytã, ndajaikuaái mba’épa ja’éta. Ha péina jahecha Jesús ohenói iñirũra ha ombyaty ijehe opaichagua tapicha.

Ijopara porã avei hikuái, ha ndaha’éi iporãmbáva. Oñepyrũ voi cho Perúgui. San Pedro onega vaekue imaéstrope, ha amo ipahápe jaha jajuhu Judas-pe. Upéva katu otraisiona voi ichupe, ha ome’ẽ hepýre hekove. Ndaha’éi voi pohã ro’ysã hikuái opavavéva. Ha péva hina upe ñande Iglesia. Ndaha’éi hina oje’e háicha: santorã santopáma.

Oime añete umi imarangatu añetéva ha ñaime katu ñande tajasúva gueteri ha ñaikotevẽva ñañepohano jahávo ñane rembiapo vaikuégui. Jesús voi ningo he’i: Che ndajúi ahenói umi imarangatúva, ndaha’éi hesãiva umi oikotevẽva ñepohano. Ha péicha ko hína nde che reindy ha che irũ.

Jesús ohenói haguéicha iñirũrã yma, ñanerenói ñandéve iñirũrã ko’ãga, ojeroviágui ñande rehe, ohecháramo jepe heta ofaltaha ñandéve. Ndaha’éi ñande ñanemba’e porãgui. Ha’énte imba’e porã. Ñande ha’eramo jepe tembiporu kuéicha, jaikuaa ipópe ñañemoĩramo ikatu ha’e ojapo heta mba’e porã.

Pa’i Alberto Luna.