DOMINGO CUARTO DE PASKUA

LECTURA PETEÎHA:

Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha 4, 8-12

Pedro, henyhẽva Espíritu Sántogui, he’i ichupekuéra:
Tetãgua ruvicha ha myakãhárakuéra: Peporandu niko oréve peẽ mba’e porã ojejapo va’ekue rehe peteĩ hasýva rehe, ha mba’éichapa oñemonguera ra’e.

Ro’e pene renondépe ha opa Israelgua renondépe, ko kuimba’e oĩva ápe opavave rovake, hesãiha Jesucrísto Nazaretgua rérape, upe peẽ pemosãingo va’ekue kurusu rehe ha Ñandejára omoingove jevy va’ekue. Ko Jesús hína upe Ita, peẽ óga apoha pemboyke va’ekue, ha oiko ichugui pe Ita tekotevẽvéva.

Ndaipóri ambue ñande salva kuaáva, Ñandejára nome’ẽi hague rehe ñandéve yvy ári ambue.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 117, 1. 8-9. 21-23. 26. 28-29

Opavave: Pe aguyjeve me’ẽ Ñandejárape, ha’e niko ipy’a porã ha imborayhu
ndopái araka’eve.

O bien: Aleluia.

Pemomba’e guasu Ñandejárape, ha’e niko ipy’a porã ha imborayhu ndopái araka’eve.
Iporãve niko jajerovia ramo Ñandejára rehe, avave rehe jajerovia rangue, poguasukuéra rehe jajerovia rangue. O.

Ñandejára, ndéve romomba’e guasu, nde che rendúgui ha che renohẽgui jejopy vaígui.

Upe ita omboykéva óga mopu’ãhára, upéva ári ko’ágã oñemopu’ã.
Ñandejára upéicha ojapo ha ore jurujái ore rohechávo. O.

To jehovasa Ñandejára rérape oúva. Ore pohovasa tupao guive.
Nde niko Tupã che Jára, upéva rehe romomba’e guasu.
Nde hína Ñandejára upéva rehe rombotuicha.
Pe aguyjeve me’ẽ Ñandejárape, ha’e niko ipy’a porã, ha imborayhu ndopái
araka’eve. O.

LECTURA MOKÔIHA:
Ñahendúta Tupã Ñandejára Ñe’ẽ San Juan aranduka peteĩ hápe oi háicha 3, 1-2

Pema’ẽmi mba’éichapa ñande rayhu Ñandejára pe Túva, ikatu haguã ñañembohéra Ñandejára ra’y, ha ñande ha’e.

Upéva rehe yvypóra reko rayhuha na ñande kuaái, ndoikuaái hague rehe Ñandejárape. Che pehẽnguekuéra pohayhúva, ñande ha’éma Ñandejára ra’y, ha jepe ndo jekuaáirõ gueteri mba’eichaguátapa ñande, jaikuaa, Jesucrísto ojechaukávo, ha’eichaguataha ñande jahechátagui ichupe ha’e háichaite.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Jn 10, 14
Aleluia.
Che ha’e pe ovecha rerekua imba’e porãva. Che Ru che kuaa háicha chéve, che aikuaa che Rúpe. Péicha avei, che aikuaa háicha che ovechápe, ha’ekuéra che kuaa chéve.
Aleluia.

EVANGELIO

Marandu porã Ñandejára Jesucrísto rekove ha hemimbo’e San Juan omombe’u háicha

10, 11-18

Opavave: Romomba’e guasu ndéve, Ñandejára.

Upe ramo Jesús he’i: Chéko hína pe ovecha rerekua imba’e porãva. Pe ovecha rerekua imba’e porãva niko oĩ ome’ẽ haguãicha hekove ijovecháre.

Umi plátare omba’apóva katu, ohechávo aguara guasu ouha ijovechakuérape, odipara ha okañy. Péicha ojapo umi ovecha ndaha’éigui imba’e. Pe aguara guasu ojeity umi ovecha apytépe ha omosarambi opa rupi. Umi plátare omba’apóvape niko mba’evete chupekuéra umi ovecha.

Chéko hína pe ovecha rerekua imba’e porãva. Che ru chéve che kuaaháicha, che aikuaa chupe. Péicha avei, che aikuaaháicha che ovecha, ha’e kuéra che kuaa chéve. Che aime ame’ẽ haguã che rekove hesekuéra.

Oime jepéko areko avei ambue ovecha, ndaha’éiva kóva ko korapegua. Umíva avei niko ambyatypa va’erã, ha ha’ekuéra ohendúne che ñe’ẽ. Oupáne hikuái oiko peteĩ atýpente ha peteĩnte herekuáne.

.
Che ru che rayhu aimégui ame’ẽ haguã che rekove, upéi aikove jey haguã. Avave ndaikatúi oipe’a chehegui che rekove, upéva che ame’ẽva che jehegui.

Che ñónte pe ikatúva ame’ẽ, ha chéve jeýnte ija aikove jey haguã. Péicha che ru
he’i chéve ajapo haguã.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.