SÁBADO TRIGÉSIMO CUARTO DURANTE EL AÑO
1 diciembre, 2023LECTURA PETEÏHA:
Ko’ágã ñahendúta Tupã Ñandejára ñe’ẽ Isaías arandukápe oĩ háicha 63, 16b-17, 19b; 64, 2-7
Nde hína ore Jára ha ore ru. Nde réra ymaite guive, “Upe ivaívagui ore pe’áva”.
Mba’e rehe piko, ore Jára, ore mombía nde rapégui ha ore mbopy’a hatã rohenduve’ỹ haguã ne ñe’ẽ?
Eju jevýna ore ndive, ne rembiguái rayhupápe, ha ne ñemoñareguakuéra rehehápe.
Hanga’u remondoro yvága ha reguejy! Umi yvyty ne renondépe hykupáne.
Rejapo ramo guare hechapyrãva noñeha’arõi va’ekue, araka’eve noñehendúi ha ndojehechai va’ekue
oĩha Tupä Ñandejára, nda ha’éiva nde, ojapóva mba’e ko’ãichagua, umi hese ojeroviáva rayhupápe.
Nde rerohory upe ipy’aite guive heko jojávape ha imandu’a ojapo haguã ne rembipota.
Nde pochy va’ekue rojapo hague rehe ivaíva.
Ymaite guivéma ropu’ã mante roikóvo nde rehe.
Opavave ore ky’a va’ekue, ore reko trápo ky’ápe ojogua. Yvyra rogue pirukuéicha ro’a
ha ore rembiapo vaikue ore reroveve yvytúicha.
Ndaipóri ohenóiva nde réra, ndaipóri oñeha’ãva ojeko nde rehe. Upéva rehe rekañy ore hegui
ha ore reja ore rembiapo vaikue poguýpe.
Opáichavo, ore Jára, nde hína ore ru. Ore pe ñai’ũ ha nde pe kambuchi apoha. Opavave niko ne rembiapokue.
Tupã Ñandejára Ñe’ẽ.
Opavave: Romomba’e guasu ndéve, Ñandejára.
SALMO ÑEMBOHOVÁI 79, 2ac. 3b. 15-16. 18-19
Opavave: Ñandejára roikose jevy niko ymave guaréicha.
Israel rerekua ore rendu kena.
Reguapýva umi tekove ipepóva ári, ehechauka nde pokatu
ha eju ore pytyvõ. O.
Ñandejára nde pu’akapáva, eju jevy ore rendápe.
Amo yvága guive emaña ore rehe.
Eju ehecha parralty, nde poite rupi reñotỹ va’ekue
ha nde voi remongakuaa va’ekue. O.
Nde po toĩ nde akatúa pegua ári,
upe ne rembiporavo remombarete va’ekue.
Upéicha ramo ndorojeréi chéne nde hegui.
Eheja to roikove ha to romomba’e nde réra. O.
LECTURA MOKÖIHA:
Ñahendúta Tupã Ñandejára Ñe’ẽ San Pablo ohai va’ekue ikuatia peteïhápe Corinto guápe 1, 3-9
Tupã ñande Ru ha Jesucrísto Ñandejára to hykuavo pende ári ipytyvõ ha ipy’a guapy. Opa ára ame’ẽva che aguyje Tupã Ñandejárape pende rehe, upe pytyvõ Tupã Ñandejára ohykuavo va’ekue pende árire, Jesucrísto rupi. Ha’e rupi niko Ñandejára ome’ẽ va’ekue peẽme opa mba’e peñe’ẽ kuaa ha pene arandu haguã. Jesucrísto rehegua marandu niko oĩ mbaretéma pende apytépe.
Upéva rehe Ñandejáragui pereko opa mba’e, peha’arõ aja pe ára Ñandejára Jesucrísto oguahẽ va’erãha. Ñandejára oñangareko hatãne pende rehe ipaha peve, avave oguereko’ỹ haguã mba’eve he’i va’erã pende rehe Jesucrísto ou jevyha ára. Ñandejára nopyrũiva iñe’ẽ rehe araka’eve, ha ha’e niko hína pe pene renói va’ekue peiko haguã Ta’ýra Ñandejára Jesucrísto ndive.
Tupã Ñandejára Ñe’ẽ.
Opavave: Romomba’e guasu ndéve, Ñandejára.
ALELUIA Sal 85,8
Aleluia.
Ore Jára, ore poriahuvereko kena ha ore renohẽ jejopy vaígui.
Aleluia.
EVANGELIO
Marandu porã Ñandejára Hesukrísto rehegua San Marcos omombe’u háicha 13, 33-3 7
Opavave: Romomba’e guasu ndéve, Ñandejára.
Upérõ Jesús he’i idisípulo kuérape: “Peikóke pe payhápe porã, ha peñangarekóke pende jehe. Ndapeikuaái hína araka’épa oguahẽta upe ára. Pejapóke peteĩ kuimba’e mombyry ohótava ojapo haguéicha, he’i vaekue hembiguáikuérape oñangareko haguã hógare.
Peteĩ-teĩme oheja hembiaporã, ha okẽ ñangarekohápe he’i oma’ẽ porã haguã óga rokẽre. Pejesarekóke aipo ramo, ndapeikuaái hína araka’etépa oúta pe óga jára, ka’aru pytũvo, térã pyharepytévo, térã gállo osapukáivo, térã ko’ẽmbávo. Ani ou mba’e peimo’ã’ỹ jave, ha pende juhu peke peína. Ko ha’éva peẽme, ha’e opavavépe: Peikóke pe payhápe porã!”
Ñandejára Jesucrísto Ñe’ẽ.
Opavave: Romomba’e guasu ndéve, Ñandejára Hesukrísto.