DOMINGO SEGUNDO DE PASCUA

DOMINGO SEGUNDO DE PASCUA

LECTURA PETEÎHA:

Ko’ágã ñahendúta Tupã Ñandejára ñe’ẽ Apóstolkuéra arandukápe oĩ háicha 2, 42-47

Umi ojerovia va’ekue oñemohatã umi apóstolkuéra ombo’évape, omboja’óvo oñondive umi oguerekóva, oñembyatývo oipehe’ã haguã pan ha oñembo’e haguã.

Opavave ohecha ramo heta hechapyrãva ha techaukarã Ñandejára ojapóva apóstolkuéra rupi.

Opa ogueroviáva oĩ peteĩ ñe’ẽme ha omboja’o ojoapytépe opa oguerekóva. Ome’ẽ hepy rehe ijyvy ha opa oguerekóva, ha omboja’o upe viru peteĩ teĩ oikotevẽ háicha. Opa ára oñembyatými Tupaópe ha hógakuéra rupi oipehe’ã mbujape ha ho’u oñondive torypápe ha py’a porãme.

Oguerohory Tupãme ha opavave ohayhu ichupekuéra. Arako’ẽ rehe Ñandejára

ombohetave upe aty, umi ha’e osalva va’ekue reheve.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI    117, 2-4. 13-15. 22-24

Opavave: Pemomba’e guasu Ñandejárape, ha’e niko ipy’a porã ha imborayhu ndopái araka’eve.

Mayma Israelgua te’i: “Ñandejára mborayhu ndopái araka’eve”.

Mayma pa’ikuéra te’i: “Ñandejára mborayhu ndopái araka’eve”.

Mayma ojeroviáva Ñandejára rehe te’i:

“Ñandejára mborayhu ndopái araka’eve”. O.

Hatã che myaña che reity haguã ha Ñandejára ou che pytyvõ.

Ñandejára che mombarete, ichupe aropurahéi.

Ha’e che renohẽ jejopy vaígui.

Sapukái rory oñehendu heko jojáva róga guýpe. O.

Upe ita omboykéva óga mopu’ãhára, upéva ári ko’ágã oñemopu’ã.

Ñandejára upéicha ojapo ha ore jurujái ore rohechávo.

Kóva ko árape Ñandejára oñemongu’e,

Javy’a joáke hesehápe. O.

LECTURA MOKÕIHA:

Ñahendúta Tupã Ñandejára Ñe’ẽ San Pedro aranduka peteĩhápe oĩ háicha         1, 3-9

Che pehengukuéra: Jarohory Tupã ha Ñandejára Jesucristo Rúpe, iporiahuvereko tuichaite rupi ñane moingove jevy va’ekue, Jesucristo jeikove jevy rupi. Péva ome’ẽ ñandéve ñeha’arõ kuaa ne mbaretéva, ha upéicha rupi pehupytýne pe mba’e Ñandejára oguerekóva peëme guarã yvágape, ikatu’ỹva oñembyai, iky’a térã ipiru.

Pejerovia hague rehe hese, Ñandejára pene mo’ã ipokatúpe, pene pysyrõ haguã, pe ha’e ombosako’íva ha oikuaaukátava hína ára paha oguahẽvo.  Upéva rehe, peẽ pene renyhẽ vy’águi, tekotevẽ ramo jepe sapy’ami pehasa heta jepy’a ra’ã rupi. Pe Pende jerovia niko ha’ete ku óro, iporã haguã oñemboykuva’erã tatápe. Pe jerovia osẽ porãva heta ñeha’ãgui, iporãve jevy pe órogui, ikatúva oñembyai. Upéva rehe, péicha oñeha’ã ramo pende jerovia oñemoneĩ, ojererohory ha oñemyerakuã va’erã, Jesucrísto ou vove.

Peẽ pehayhu Jesucrístope, nda pehechái ramo jepe. Ha ko’ágã, peroviávo ichupe pehecha’ỹre, pe pende vy’a tuichaetereígui ndaikatúi pemoñe’ẽ. Péicha pehupity pehóvo pe pende jerovia ohekáva, pene ánga salvación.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA    Jn 20, 29

Aleluia

Jesús he’i Tomáspe: ¿Erovia piko che recha hague rehe?

Ovy’aite va’erã piko umi ohecha’ỹ rehe oguerovia va’ekue.

Aleluya

EVANGELIO

Ñahendúta Ñandejára Jesucrísto rekove ha hemimbo’e San Juan omombe’u háicha           20, 19-31

Opavave: Romomba’e guasu ndéve, Ñandejára.    

Umi Jesús disípulo okyhyjégui umi judíokuéra ruvichágui oñembyaty peteĩ koty

ñembotypýpe. Ha upe Domíngo pyhare voi, Jesús ou sapy’a oñemoĩ mbytépekuéra. Omomaitei chupekuéra he’ívo: — Ta pende py’aguapy joaitéke.

Upéva he’ipávo, ohechauka chupekuéra umi ipo ha pe ijyke ojekutu hague. Tuicha ovy’a hikuái ohechávo Ñandejára Jesucrístope. Upéi katu Jesús omomaitei jey voi chupekuéra: — Py’aguapy toĩ pene ndive. Che Ru che mbou haguéicha, che pomondo peẽme.

Upévo, oipeju hesekuéra ha he’i: — Ame’ẽ peẽme Espíritu Santo. Oimeraẽvape peẽ peperdonáva ipecádo, Ñandejára ave operdonáta ichupe. Ha napeperdonái ramo katu, Ñandejára ave noperdona mo’ãi chupe.

Tomás, ku Jesús disípulo Gemelo ojeheróva, niko noĩri va’ekue Jesús ojechauka ramo guare idisípulokuérape. Upéi umi Jesús disípulo he’i Tomáspe: — Rohecha niko Ñandejára Jesucrístope.  Tomás osẽ he’i chupekuéra: — Ndahechái ramo ipóre umi klávo kuare, ha namoingéi ramo che kuã umi ikuarépe ha pe ijyke ojekutu haguépe, ndarovia mo’ãi.

Upe rire, 8 ára haguépe, Jesús disípulo kuéra oñembyaty jeýma hikuái peteĩ ógape, ha Tomás oĩ upépe. Umi okẽ hamba’e oñembotypa. Peichaháguinte, Jesús oike sapy’a ha oñemoĩ mbytépekuéra. Omomaitei chupekuéra, he’ívo: — Ta pende py’aguapy joaitéke.

Upéi osẽ he’i Tomáspe: — Emoinge ápe ne kuã ha ema’ẽ che póre. Eru nde po ha

emoinge ko che yképe. Anive reduda. Eguerovia. Upépe Tomás he’i: — Nde niko Tupã ha che Jára.

Jesús he’i chupe: — Che recha haguérente piko rerovia. Ovy’aite va’erãnepa ágã umi che rehecha’ỹre ogueroviáva.

Opaichagua milágro niko Jesús ojapo idisípulokuéra renondépe. Heta umíva noñemoĩri ko kuatiápe. Umi ko’ápe oĩva katu niko oñemoĩ peguerovia haguã peẽ Jesús ha’eha pe Mesías, Ñandejára Ra’y, ha hese pejeroviárõ perekóta tekove opa’ỹva.

Ñandejára Jesucrísto  Ñe’ẽ.

Opavave: Romomba’e guasu ndéve, Ñandejára Jesucristo