DOMINGO SEGUNDO DE PASCUA

DOMINGO SEGUNDO DE PASCUA

Primera lectura:

Ko’ágä ñahendúta Tupä Ñandejára ñe’ẽ Apóstolkuéra rembiapokuépe oĩ háicha                                            

2, 42-47

Oñemohatã hikuái umi apóstolkuéra ombo’évape rehe, omboja’óvo oñondive umi oguerekóva, oñemboatývo oipehe’ã haguã mbujape ha oñembo’e haguã.

Opavave ohecha ramo heta hechapyrãva ha techaukarã Tupä Ñandejára ojapóva apóstol kuéra rupi. Opa ogueroviáva oĩ peteï ñe’ẽme ha omboja’o ojoapytépe opa oguerekóva. Ome’ẽ hepy rehe ijyvy ha opa oguerekóva, ha omboja’o upe viru peteï teĩ oikotevẽ háicha.

Opa ára oñemboatými Tupaópe ha hóga kuéra rupi oipehe’ã mbujape ha ho’u oñondive torypápe ha py’a porãme. Oguerohory Tupäme ha opavave ohayhu ichupe kuéra. Arako’ẽ rehe Ñandejára ombohetave upe aty, umi ha’e oipysyrõ va’ekue reheve.

Tupä Ñandejára Ñe’ẽ.

SALMO ÑEMBOHOVÁI                       117, 2-4. 13-15. 22-24

R. Pemomba’e guasu Tupä Ñandejárape, ha’e niko ipy’a porã ha imborayhu ndopái araka’eve.

Mayma Israelgua te’i:

“Tupä Ñandejára mborayhu ndopái araka’eve”.

Mayma pa’i kuéra te’i:

“Tupä Ñandejára mborayhu ndopái araka’eve”.

Mayma ojeroviáva

Tupä Ñandejára rehe te’i:

“Tupä Ñandejára mborayhu ndopái araka’eve”. R.

Hatã che myaña che reity haguã, ha Tupä Ñandejára ou che pytyvõ.

Tupä Ñandejára che mombarete, ichupe aropurahéi.

Ha’e che renohẽ jejopy vaígui.

Sapukái rory oñehendu heko jojáva róga guýpe. R.

Upe ita omboykéva óga mopu’ãhára, upéva ári ko’ágã oñemopu’ã.

 Tupä Ñandejára upéicha ojapo ha ore jurujái ore rohechávo.

Kóva ko árape Ñandejára oñemongu’e, javy’a joáke hesehápe. R.

Segunda lectura:

Ñahendúta Tupä Ñandejára Ñe’ẽ San Pedro aranduka peteï hápe oĩ háicha                                                                  1, 3-9

Jarohory Tupä ha Ñandejára Jesucrísto  Rúpe, iporiahuvereko tuicha ite rupi ñane moingove jevy va’ekue, Jesucrísto  jeikove jevy rupi. Péva ome’ẽ ñandéve ñeha’arõ kuaa ne mbaretéva, ha upéicha rupi pehupytýne pe mba’e Tupä Ñandejára oguerekóva peëme guarã yvágape, ikatu’ỹva oñembyai, iky’a térã ipiru. Pejerovia hague rehe hese, Tupä Ñandejára pene mo’ã ipokatúpe, pene pysyrõ haguã, pe ha’e ombosako’íva ha oikuaaukátava hína ára paha oguahẽvo.

Upéva rehe, peë pene renyhẽ vy’águi, tekotevẽ ramo jepe sapy’ami pehasa heta jepy’a ra’ã rupi. Pe Pende jerovia niko ha’ete ku óro, iporã haguã oñemboyku va’erã tatápe. Pe jerovia osẽ porãva heta ñeha’ãgui, iporãve jevy pe órogui, ikatúva oñembyai. Upéva rehe, péicha oñeha’ã ramo pende jerovia oñemoneĩ, ojererohory ha oñemoerakuã va’erã, Jesucrísto  ou vove.

Peë pehayhu Jesucrístope, nda pehechái rire ramo jepe. Ha ko’ágã, peroviávo ichupe pehecha’ỹre, pe pende vy’a tuicha etereígui ndaikatúi pemoñe’ẽ. Péicha pehupity pehóvo pe pende jerovia ohekáva, pene ánga ñepysyrõ.

Tupä Ñandejára Ñe’ẽ.

ALELUIA        Jn 20, 29

Aleluia

Jesús he’i Tomáspe:

Erovia piko che recha hague rehe? Ovy’a ite va’erã piko umi ohecha’ỹ rehe oguerovia va’ekue.

Aleluia

EVANGELIO

Ko’ágä ñahendúta Ñandejára Jesucrísto  rekove ha hemimbo’e San Juan omombe’u háicha.

Pejapysaka porãtapa hese?                                                    20, 19-31

Upe árape voi, pe semána ñepyrũha ára pyharépe, Jesús remimbo’e kuéra oñemboaty  peteï koty ñembotypýpe okyhyjégui umi judío moakãhára  kuéragui. Upéi Jesús ou, oñemoĩ imbytépekuéra ha omomaitei ichupekuéra he’ívo:

Ta pende py’a guapy joaitéke.

Upéva he’ipávo, ohechauka ichupekuéra umi ipo ha pe ijyképe ojekutu hague. Tuicha ovy’a hikuái ohechávo Ñandejára Jesucrístope.

 Upéi Jesús he’i jevy ichupekuéra:

Ta pende py’a guapy joaitéke. Che Ru che mbou haguéicha chéve, péicha che pomondo peëme.

Upévo oipeju hesekuéra, ha he’i ichupekuéra:

Ame’ẽ peëme Espíritu Santo. Oimeraẽ peheja reívape iñangaipa, Tupä Ñandejára avei oheja reíta. Ha oimeraẽ ndapehejái reívape, Tupä avei ndoheja rei mo’ã.

Tomás, Jesús remimbo’ekuéra peteï, Gemelo ojeheróva, ndaipóri va’ekue Jesús ojechauka ramo hemimbo’e kuérape. Upe rire umi Jesús remimbo’e kuéra he’i Tomáspe:

Rohecha niko Ñandejára Jesucrístope.

Tomás katu he’i ichupekuéra:

Nda hechái ramo ipo rehe umi klávo kuare, ha namoingéi ramo che kuã umi ikuarépe ha pe ijyke ojekutu haguépe, ndarovia mo’ãi.

Upe rire 8 ára  haguépe, Jesús remimbo’ekuéra oñemboaty  jevýma peteï ógape, ha Tomás oĩ avei upépe. Umi okẽ oñembotypa, ha péicha ramo jepe, Jesús oike ha oñemoĩ imbytépe kuéra. Omomaitei ichupe kuéra, he’ívo: Ta pende py’a guapy joaitéke.

Upéi he’i Tomáspe:

Emoinge ko’ápe ne kuã ha ema’ẽ che póre. Eru nde po ha emoinge ko che iképe. Anive nde py’a mokõi, ha erovia.

Upépe Tomás he’i:

Che Jára ha che Tupä.

Jesús he’i ichupe:

Erovia piko che recha hague rehe? Ovy’aite va’erã piko umi ohecha’ỹ rehe oguerovia va’ekue. Jesús ojapo heta ambue mba’e hechapyrãva hemimbo’e kuéra renondépe. Umíva noñemoĩri ko kuatiápe. Umi ko’ápe oñemoĩva katu oĩ Peë perovia haguã Jesús ha’eha pe Mesías, Tupä Ra’y, ha hese pejeroviávo peikovete haguã.

Ñandejára Jesucrísto  Ñe’ẽ.