LECTURAS DOMINGO SEMANA XVIII TO

LECTURAS DOMINGO SEMANA XVIII TO

LECTURA PETEÏHA:

Ko’ágä ñahendúta Tupä Ñandejára ñe’ẽ Isaías arandukápe oĩ háicha          55, 1-3

“Opa pende yuhéiva peju pey’u.

Pende viru’ỹva peju, reínte to ñeme’ẽ peëme trígo.

To ñeme’ẽ  avei kamby ha víno, pehepy me’ẽ’ỹrehe.

Maerã piko peme’ẽta viru ndaha’éi  ramo tembi’u rehe,

ha pene rembiapokue repy, na pene mohyvatã mo’ãiva rehe?

Pejapo ha’éva ha pekaru porãta, pe’úta umi mba’e hevéva.

Peju che rendápe ha pejapysaka, pe che rendu ha peikovéta.

Ajapóta pene ndive ñe’ẽ me’ẽ opa árape guarãva, amboajévo péicha

umi mborayhu ñe’ẽ ame’ẽ va’ekue Davídpe.

Tupä Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 144, 8-9. 15-18

Opavave: Nde pojera rupi, ore myenyhë ne mba’e porãme ha oremohyvatã.

Tupä Ñandejára imba’e porã ha oporoporiahuvereko.

Ha’e oporohayhu ha hasýpe ipochy, opavavépe ha’e ohecha kuaa,

ha ohecha ramo opa hembiapokue. O.

Opavave omoĩ nde rehe hesa

nde remongaru haguã ichupekuéra hi’árape.

Nde po jera rupi, ne mba’e porãme

remohyvatã opa mba’e oikovévape. O.

Tupä Ñandejára heko joja opa hapépe,

ha’e ipy’a porã opa mba’épe.

Ha’e oñemoaguĩ umi oñembo’éva rehe,

umi ipy’a ite  guive ichupe oñembo’évape. O.

LECTURA MOKÖIHA:

Ñahendúta Tupä Ñandejára Ñe’ẽ San Pablo ohai va’ekue Roma guápe 8, 35. 37-39

Che pehenguekuéra:

Máva piko ikatúta ñande pe’a Jesucrísto mborayhúgui? Jehasa asy piko, mba’e mbyasy, ñemuña, ñembyahýi, opívo térã ñemano vai piko?

Opa ko’ã mba’épe katu ñasẽ porã upe ñande rayhu va’ekue rupi. Arovia che py’a ite  guive mba’eve na ñande pe’a mo’ãiha Tupä Ñandejára mborayhúgui: ñemano, jeikove, Tupä Ñandejára remimbou kuéra, mba’eveichagua pokatu ha pu’aka, ko’agãgua térã ou va’erãva, pu’aka yvategua ha yvy pegua, mba’eve Tupä Ñandejára rembiapokuéva. Mba’eve ndaikatu mo’ãi ñande pe’a pe mborayhu Tupä Ñandejára ohechauka va’ekuégui ñandéve, Ñandejára Cristo Jesús rupi.

Tupä Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA     Mt 4, 4b

Aleluia.

“Nda ha’éi  tembi’u añónte oikotevẽva yvypóra oikove haguã,

opa ñe’ẽ Tupä Ñandejára jurúgui osẽva rehe avei oikotevẽ”.

Aleluia.

EVANGELIO

Marandu porã Ñandejára Hesukrísto rehegua San Mateo omombe’u háicha          14, 13-21

Opavave: Romomba’e guasu ndéve, Ñandejára

Upe ramo oikuaávo Jesús upe Juánpe ojehu va’ekue, ojupi peteï kanóape ha oho upégui peteï ha’eñoháme. Opavave oikuaávo upéva, osẽ umi oikohágui ha oho ha’e oĩháme yvy rupi. Oguejývo Jesús pe kanóagui, ha ohechávo hetaha umi ijatýva, oiporiahuvereko ichupe kuéra, ha omonguera umi hasýva ogueru va’ekue hikuái. Pytüma ramo hína, hemimbo’e kuéra ou hendápe, ha he’i ichupe:

Ka’aru etéma niko, ha ko’arupi ndaipóri avave oikóva. Emondómana opavavépe toho umi táva rupi, tojogua hembi’urã.

Jesús katu he’i ichupekuéra: – Natekotevẽi oho. Peë voi pemongaru ichupekuéra.

Ha’e kuéra he’i ichupe: – Roguereko niko 5 mbujape ha mokõi pira.

Jesús he’i ichupekuéra: – Peru chéve ko’ápe.

Ha omboguapy opavavépe kapi’ipépe. Upéi katu ohupi ipópe umi 5 mbujape ha mokõi pira ha oma’ẽvo yvága gotyo ojerure Tupä Ñandejára ohovasa haguã. Upéi oipehe’ã umi mbujape ha ome’ẽ hemimbo’e kuérape, ha ha’e kuéra ome’ẽ opavavépe. Opavave ho’u hyvatã meve. Ha umi hembývagui omono’õ hikuái 12 ajaka renyhẽ. Umi okarúva niko hína 5.000 kuimba’e rupi, ojepapa’ỹre kuña ha mitã nguéra.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Jesukrísto.