DOMINGO SEMANA XXXIII TO

LECTURA PETEÏHA:

Ko’ágä ñahendúta Tupä Ñandejára ñe’ẽ Proverbios arandukápe oĩ háicha

31, 10-13. 19-20. 30-31

Avápa ojuhúne peteï kuña oñangareko kuaáva hóga rehe?

Iporãve óro ku’ígui.

Iména ojerovia hese, ha noikotevẽi.

Iporãva hese ojapo ha araka’eve ivaíva oikove aja pukukue.

Ha’ete oheka ovecha rague ha mandyju, ha oipovã kyre’ỹ.

Ipópe opyryrỹi he’ỹ, ha oipyaha ijaorã

Oikotevẽva ndive ipo jera, ha oipytyvõ mboriahúpe.

Kuña juky ogue ha iporãngue pya’e ohasa, kuña omboajéva Tupã  Ñandejárape

ojererohory va’erã. Perohory opa ojapo va’ekue rehe, perohory opavave renondépe.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI         127, 1-5

Opavave: Revy’a va’erã Ñandejára rehe rejerovia ramo.

Revy’a va’erã Ñandejára rehe rejerovia ramo,

ha reiko ramo ha’e oipota háicha.

Nde ry’ái repykuégui rekarúne, revy’áne, ha opa mba’épe resẽ porãne. O.

Nde róga pýpe ne rembireko ojoguáta ku parral hi’a hetávape.

Ne mesa jerére katu nde ra’y ha nde rajykuéra ojoguáta umi yvyra roky pyahúpe. O.

Kóicha ojehovasáta upe Ñandejára rehe ojeroviáva.

Ñandejára ta nde rovasa Sión guive reikove aja pukukue.

Reikovéta rehecha haguã mba’éichapa Jerusalén opu’ã. O.

LECTURA MOKÖIHA:

Ñahendúta Tupã Ñandejára Ñe’ẽ San Pablo ohai va’ekue Tesalónica guápe     5, 1-6

Araka’épa oikóta ko’ã mba’e rehegua, ore pehẽngue, natekotevẽi romoĩ peëme kuatia rehe. Peẽ peikuaa voi, ára ou jevytaha Ñandejára Jesucristo oguahẽtaha oñeha’arõ’ỹve jave, mondaha oguahẽ ramo guáicha pyhare.

Ágã ku yvypóra he’ívo: “Opa mba’e péina oĩ py’a guapýpe, ha ndaipóri jakyhyje haguã”, upépe oúta hi’árikuéra oimo’ã’ỹhágui ñehundi guasu, ou háicha memby pota rasy kuña hye guasúvape; ha avave ndaikatu mo’ãi okañy. Peẽ katu, ore pehẽnguekuéra, napeiméi pytũmbýpe pene mondýi haguã pe ára ou jevyha Ñandejára peteĩ monda háicha.

Ñande, ára ha mba’e rendy rehegua, ñande ndaha’éi  pyhare ha pytũ rehegua. Upéva rehe, ndajakéi va’erã umi ambuéicha, japáy ha ñane akã porã va’erã katu.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA   Jn 15, 4a. 5b

Aleluia.

Pejoajuke che rehe, che ajoaju háicha pende rehe.

Pe ojoajúva che rehe ha che hese, upéva heta hi’a.

Aleluia.

EVANGELIO

Marandu porã Ñandejára Hesukrísto rehegua San Mateo omombe’u háicha 25, 14-30

Opavave: Romomba’e guasu ndéve, Ñandejára.

 Upérõ Jesús he’i:   Ñandejára Rréino niko kóichata hína. Oiko va’ekue ndaje raka’e peteĩ karai ohótava mombyry. Ohenói mbohapy hembiguáipe ha oheja chupekuéra pláta omomemby haguã chupe.

  Ha oikuaágui mbohapyvépe, pe iñakã porãvévape oheja hetave ha umi ambuépe katu michĩve. Tenondeguápe oheja 5 vosa pláta, pe ambuépe mokõi vosa, pe tapykueguápe katu peteĩnte. Upéi osẽ oho.   Upe 5 vosa ohupyty vaekue, oho omomba’apo, ha omomemby jey 5 vosa.   Upe mokõi ohupyty vaekue oho avei omomba’apo, ha omomemby jey 2 vosa.   Upe peteĩ vosánte ohupyty vaekue katu, oho oñotỹ.

  Are rire, ou jey pe karai ha oikuaase mba’épa ojapo ra’e hikuái pe pláta oheja va’ekue chupekuéragui.   Oñemboja hendápe pe 5 vosa ohupyty vaekue. Ha he’i pe karaípe, “Che ruvicha, 5 vosa niko reheja va’ekue chéve, ha kóina ápe hi’ári 5 vosave, amomemby vaekue ndéve.” 

Pe karai he’i chupe, “Iporã. Kuimba’e katupyry ha jeroviaháva niko nde ra’e. Resẽ porã haguére pe pláta michĩmi aheja va’ekue ndéve reheve, ko’águi rire hetaiteve amoĩta nde pópe. Eike che rógape ha javy’a.”   Upéi ou pe kuimba’e ohupyty vaekue mokõi vosa pláta. Ha’e avei he’i pe karaípe, “Che ruvicha, mokõi vosa niko reheja vaekue chéve, ha kóina ápe hi’ári mokõi vosave, amomemby va’ekue ndéve.” 

Pe karai he’i avei chupe, “Iporã. Kuimba’e katupyry ha jeroviaháva niko ndé ra’e. Resẽ porã haguére pe pláta michĩmi aheja vaekue ndéve reheve, ko’águi rire hetaiteve amoĩta nde pópe.

Eike che rógape ha javy’a.”   Ipahápe, oguãhẽ hendápe pe kuimba’e peteĩ vosánte oñeme’ẽ vaekue chupe. Osẽ he’i pe karaípe, “Che ruvicha, aikuaa niko nde jopyha. Ha reme’ẽ’ỹ va’ekue jepe rembyatyseha.   Ha akyhyjégui ndehegui, aha añotỹ pe pláta reme’ẽ va’ekue chéve. Kóina aguerupa jey ndéve.”   Pe karai osẽ he’i chupe, “Nde tekove ate’ỹ, mba’everã nderevaléiva.

Reikuaárõ che jopyha,   piko mba’ére nderehói ra’e eheja peteĩ omomba’apo va’erã pópe mba’e. Péicha aju jeývo, imemby vaerã mo’ã chéve michĩmínte jepe.”   Ha he’i umi upépe oĩvape, “Peipe’a chugui pe vosa ha peme’ẽ pe 5 oguerekóvape. 

Upe heta oguerekóvape, oñeme’ẽvéta ha hembypáta chupe. Upe oguereko’ỹvagui katu, pe michĩmi oguerekóva jepe ojepe’áta chugui.   Ko tembiguái pituvápe katu, pemosẽ okápe pytũmbýpe. Upépe ojahe’o soróta ha hãi mante opururũta.”

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.