DOMINGO SÉPTIMO DE PASCUA

Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha 1, 1-11

Che kuatiañe’ẽ tenonde guápe, nde Teófilo rejererohoryetéva, añe’ẽ va’ekue opa mba’e Jesús ojapo ha ombo’e va’ekue rehe iñepyrũha guive, yvágape ojehupi hague ára peve. Oho mboyve, Espíritu Santo rupi oheko mbo’e hembiaporãre umi apóstol ha’e oiporavo va’ekuépe. Ha omano rire ojechauka va’ekue ha’ete voi, ohechauka porãvo oikoveha, 40 ára aja ojechauka ichupekuéra ha oñe’ẽ
ichupekuéra Ñandejára Reino rehe.

Oiko aja gueteri ijapóstolkuéra ndive, Jesús he’i ichupekuéra ani haguã oho Jerusaléngui. He’i ichupekuéra: Peha’arõ toiko raẽ upe che Ru he’i va’ekue, che añe’ẽ hague peẽme. Añete, Juan oporomongarai va’ekue ýpe, mbovy ára riremínte katu peẽ peñe mongaraíta Espíritu Sántope.

Umi oñembyaty va’ekue Jesús ndive oporandu ichupe: Ore Jára, ko’ágãpa remopu’ã jevýta Israel remisãmbyhy?

Jesús he’i ichupekuéra: peẽme ndaijái peikuaávo, mba’e árape térã araka’etépa oikóta umi mba’e che Ru oheja va’ekue ipoguýpe. Espíritu Santo oúvo pende ári katu perekóta pokatu ha pesẽta pe che myerakuãvo Jerusalénpe ha opa Judea ha Samaría pýre ha opa ko yvy jerekuévo.

Upéva he’ipávo, ha’ekuéra oma’ẽ aja hese, Jesús ojehupi ha peteï arai ojaho’i ha ndo hechavéi hikuái ichupe. Ha ha’ekuéra oma’ẽ aja yvágare, ohechávo mba’éichapa Jesús oho mombyry, mokõi kuimba’e ijao morotĩva ojechauka ijykérekuéra, ha he’i ichupekuéra: Peẽ Galileagua, mba’ére piko pepyta pema’ẽ yvágare?

Upe Jesús voi oĩ va’ekue pene ndive ha ojehupi va’ekue yvágape, ou jevýta pehecha haguéicha oho.

Tupã Ñandejára Ñe’ẽ

Opavave: Romomba’e guasu ndéve, Ñandejára.

SALMO ÑEMBOHOVÁI 46, 2-3. 6-9
Opavave: Ñandejára ojupi iguapyhápe, sapukái ha turupúpe.
O bien:
Aleluia
Opa tetãnguéra pejepopete, vy’apópe pero sapukái Tupãme.
Ñandejára yvateteguágui jakyhyje va’erã, ha’e hína mburuvicha guasu. O.

Tupã Ñandejára ojupi iguapyhápe, sapukái ha turupúpe.
Pepurahéi! Pepurahéike Tupãme!
Pepurahéi! Pepurahéike ñande ruvicha guasúpe! O.

Tupã hína tetã nguéra ruvicha guasu, peropurahéike ichupe.
Tupã oisãmbyhy tetãnguéra, Tupã oĩ iguapyha marangatúpe. O.

LECTURA MOKÕIHA:
Ñahendúta Tupã Ñandejára Ñe’ẽ San Pablo ohai va’ekue Éfeso guápe 1, 17-23

Che pehenguekuéra: Ajerure Ñandejára Jesucrísto Tupãme, Túva tuichaitéva, ome’ẽ haguã peẽme pe Espíritu, pene moarandu ha oikuaaka haguã peẽme mba’eichaguápa Ñandejára, ha añetehápe peikuaa haguã ichupe.

Ajerure Tupãme omyesakã haguã peẽme pene akãme perekóva, peikuaa porã haguã mba’e peha’arõ haguãpa ha’e pene renói raka’e, ha mba’eichaitépa ha’e tuicha ohovasa opa mba’épe, umi imba’évape, ha mba’eicha itépa tuicha ha ijojaha’ỹva pe ipokatu ñane pytyvõva, ñande Cristo rehe jajeroviávape.

Ko ipokatu ñane pytyvõva niko hína pe pokatu Ñandejára ohechauka mbarete va’ekue, omopu’ã jevy ramo Crístope, ha omboguapy ichupe ijakatúape, yvágape. Tupã omoĩ ichupe opaichagua yvategua ruvicha ári, ha opaite mba’e oĩva ári, ko’agãgua ha oútava.
Ha’e omoĩ opa ite mba’e Cristo py guýpe, ha omoĩ Crístope voi iglésia akãrõ.

Cristo iglésia niko Cristo rete hína, Cristo rupi oĩmba porãva, Cristo rupi hína opaite mba’e oĩ porãmba.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

O bien:
Ñahendúta Tupã Ñandejára ojehai va’ekue Hebreoskuérape 9, 24-28; 10, 19-23

Che pehenguekuéra: Cristo ndoikéi va’ekue upe Tupao yvypóra rembiapokuépe, pe yvága pegua joguahántevape. Oike katu yvagaitépe, ko’ágã oĩháme Tupã renondépe oñembo’e ñande rehe. Ha ndoikéi oñekuave’ẽ haguã ha’ete voi heta jevy, ojapo háicha áño ohasávo jepi pa’i guasu oikéva Tupaópe oikuave’ẽvo tuguy imba’e’ỹva.

Upéicha rire avei, Cristo oikotevẽ va’erã mo’ã omano heta jevy oiko ypy guive ko yvy. Cristo katu, ko ára ipaha jave ohóvo, ou peteĩ jevyete ha tapia guarã, oikuave’ẽvo hekove voi ojeheja rei haguã yvypóra angaipa.

Opavave omano va’erã peteĩ jevýnte ha upéi oñembojovake va’erã. Upéicha avei Cristo oikuave’ẽ hekove peteĩ jevýnte oipe’a haguã heta angaipa. Upéi ha’e ou jevýta, ndaha’evéima angaipa rechávo, oipysyrõ haguã katu umi ichupe oha’arõvape.

Che pehẽnguekuéra, ko’ágã ikatu jaike Tupaópe avave ñande joko’ỹre, Jesucrísto ruguy rehe ae, jahávo pe tekove rape pyahúre, omondoróvo pe poyvi sãingo Tupao pegua, he’iséva, hete voi. Jareko peteï pa’i mba’e guasúva Ñandejára rógape.

Upéva rehe, ñañemboja va’erã Tupãre py’a porã ha jerovia mbaretépe, ipotĩ pyre ñande py’a mba’e vaígui ha ñande rete ojejohéi pyre y potĩme. Jaiko mbaretéke, ñane kangy’ỹ rehe, ñeha’arõ kuaápe ome’ẽva ñandéve ñande jerovia, Ñandejára ojapo va’erãgui katuete umi he’i va’ekue ñandéve.

Tupa Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Mt 28, 19a. 20b

Aleluia.
Ta peho opa tetã rupi ha peporombo’e ha pejapo ichupekuéra che remimbo’e
ramo. Che aiméta pene ndive opa ára ko yvy opa peve.
Aleluia.

EVANGELIO
Marandu Ñandejára Jesucrísto rekove ha hemimbo’e San Lucas omombe’u háicha 24, 46-53
Opavave: Romomba’e guasu ndéve, Ñandejára.

Upérõ Jesús he’i idisípulokuérape: — Ñandejára Ñe’ẽme niko he’i voi pe Mesías omano ha oikove jey va’erãha mbohapy ára haguépe. He’i ave opa tetã rupi oiko vaerãha hese mandu’a, hérape maymáva ojevy haguã Ñandejára gotyo, ikatu haguãicha ha’e oheja rei opavavépe hembiapo vaikue.

Peñepyrũ va’erã Jerusalénpe voi pemombe’u opa ko’ã mba’e pehecháva. Che amboúta peẽme pe che Ru he’i vaekue omboutaha peẽme. Pepytamivéta Jerusalénpe ou peve peẽme py’a guasu oúva yvágagui.

Jesús ha idisípulokuéra osẽ oho Betániape. Upépe ohupi ha’e ipo ha ohovasa chupekuéra. Ha upe javete ojei chugui kuéra ha ojereraha yvágape. Idisípulokuéra omomba’e guasu rire Jesúspe, vy’apópe oho Jerusalénpe. Ha oho meme hikuái tupaópe omomba’e guasu haguã Ñandejárape.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.