DOMINGO TERCERO DE PASCUA

LECTURA PETEÎHA:

Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha 3, 13-15. 17-19

Tupã Abraham, Isaac ha Jacob Jára, Ñandejára ñande rukuéra ypykue Jára, ombojeroviave va’ekue opavavégui hembiguái Jesúspe, peẽ pemoĩ va’ekue mburuvichakuéra pópe ha pemboyke va’ekue, Pilato he’i rire opoitaha ichugui.

Pejerure rangue ojepoi haguã imarangatu ha heko jojávagui, pejerure ojepoi haguã mba’e vai apohagui. Ha péicha pejuka va’ekue jeikove me’ẽhárape. Ñandejára katu omoingove jevy ichupe, ha ore hína kóva rechahare.

Aikuaa, che pehẽnguekuéra, peẽ ha pende ruvichakuéra pejuka ramo guare Jesúspe, pejapo hague peikuaa porã’ỹ rehe. Opáichavo, Ñandejára ojapo péicha, oiko haguã upe he’i va’ekue opa imaranduhára rupi, pe Mesías omano va’erãha.

Upéva rehe pejevy Ñandejára gotyo ha peñembyasy, ha’e oheja rei haguã peëme pene angaipa.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 4, 2.4. 7. 9
Opavave: Ehechaukána oréve Ñandejára de rova ojajaipáva.

Ñandejára che Pytyvõhára , ehendu che ñembo’e.
Nde ku ajejopy vai ramo che mbopy’a guapýva.
Che poriahuverekókena ha ehendu che ñembo’e. O.

Peikuaáke Ñandejára ombojeroviaha umi hese ojeroviáva.
Ha’e che rendúne katuete ichupe añembo’évo.
Heta oĩ he’íva: “Máva piko ñane mbovy’áta?”
Emaña ore rehe ore Jára. O.

Py’a guapýpe añeno ake, nde che Ru upe che py’a remombytu’úgui. O.

LECTURA MOKÔIHA:

Ñahendúta Tupã Ñandejára Ñe’ẽ San Juan aranduka peteĩhápe oi háicha 2, 1-5a

Che ra’ykuéra pohayhuetéva: Ahai peẽme ko’ã mba’e ani haguã pejapo ivaíva. Opáichavo, jajapo ramo ivaíva, jareko Jesucrístope ojeruréva ñande rehe Itúvape. Ha’e imarangatu. Ha omano va’ekue ojeheja rei haguã ñandéve ñane angaipa, ha nda ha’éi ñandévente, opa yvypórape avei.

Jajapo ramo Ñandejára rembiapoukapy, jaikuaa porã jaikuaaha ichupe. Oĩ ramo he’íva: “Che aikuaa ichupe” ha ndojapói hembiapoukapy, upéva ijapu ha nde’íri pe añetegua. Ojapo ramo iñe’ẽ katu, Ñandejára mborayhu oĩ hekopete ipype.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ACLAMACIÓN Cf. Lc 24, 32

Aleluia.
Ha he’i hikuái ojupe: Ajépa niko ñande py’a hendy va’ekue hína ñande pyti’ápe jajúvo tape rehe, ku omyesakã ramo hína ñandéve Ñandejára Ñe’ẽ?
Aleluia.

EVANGELIO

Marandu porã Ñandejára Jesucrísto rekove ha hemimbo’e San Lucas omombe’u háicha 24, 35-48

Opavave: Romomba’e guasu ndéve, Ñandejára.

Upérõ umi mokõi Jesús disípulo ou jey va’ekue Emaúsgui Jerusalénpe, omombe’u mba’épa ojehu chupekuéra Emaús rapére, ha mba’éichapa oikuaa hikuái Jesúspe pan omboja’óvo.
Jesús disípulokuéra oñe’ẽ jave hína umi mba’e chupekuéra ojehu va’ekuére, oñemoĩ sapy’a imbytépekuéra Jesús.

Omomaitei chupekuéra ha he’i:— Py’a guapy agueru peẽme.

Ha’ekuéra katu tuicha oñemondýi. Oimo’ã hikuái poraha. Jesús katu he’i chupekuéra:—Mba’éreiko peñemondýi. Mba’éreiko ndaperoviaséi aikove jeyha. Pema’ẽ che po ha che pýre.Pepoko ha pemaña porãna che rehe.

Che niko hína. Póra niko ndaho’ói ha na’ikanguéi. Péicha he’ívo ohechauka chupe kuéra ipo ha ipy. Ha ovy’a ha ohecha ramoitereígui ndogueroviapái hikuái.

Upémarõ Jesús he’i chupekuéra: — Perekóiko ja’umi va’erã. Ha ome’ẽ chupe hikuái pira mbichy pehẽngue, ha Jesús ho’u henondépekuéra.

Upéi katu he’i: — Pe chéve ojehu va’ekue niko hína pe ha’e va’ekue peẽme aimérõ gueteri pene ndive: oiko va’erãha che rehe opa umi mba’e oĩva kuatiáre, Moisés léipe, proféta kuérape ha Salmokuérape avei.

Upépe omyesakã chupe kuéra pe Ñandejára Ñe’ẽ, ha he’i: — Ñandejára Ñe’ẽme niko he’i voi pe Mesías omano va’erã ha oikove jey va’erãha mbohapy ára haguépe.

He’i ave opa tetã rupi oiko va’erãha che rehe mandu’a, maymáva ojevy haguã Ñandejára gotyo, ikatu haguãicha ha’e oheja rei opavavépe hembiapo vaikue.

Peñepyrũ va’erã Jerusalénpe voi pemombe’u opa ko’ã mba’e pehecháva. Che amboúta peẽme pe che Ru he’i vaekue omboutaha peẽme. Pepytamivéta Jerusalénpe ou peve peẽme pe py’a guasu oúva yvágagui.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.