JUEVES DE LA OCTAVA DE PASCUA

JUEVES DE LA OCTAVA DE PASCUA

Primera lectura:

Ko’ágä ñahendúta Tupä Ñandejára ñe’ẽ Apóstolkuéra rembiapokuépe oĩ háicha                                                           3, 11-26

Pe ijapapáva okuéra va’ekue ndopoíri Pedro ha Juángui. Opavave ohecha ramo joa, ha pya’e oupa joa Tupaópe upe “Salomón Roka” héravape, ha’e kuéra oĩháme. Pedro, ohechávo kóva, he’i ichupe kuéra: “Mba’e rehe piko pehecha ramo kóva, peë Israelgua?

Mba’e rehe piko pema’ẽ ore rehe, ha’e ramo guáicha ore umi romonguera va’ekue ko kuimba’épe, térã romboguata ichupe ore pokatu térã ore marangatu rupi? Tupä Ñandejára Abraham, Isaac ha Jacob Jára, Tupä ñande rukuéra ypykue Jára, ombojeroviave va’ekue opavavégui hembiguái Jesúspe, peë pemoĩ va’ekue mburuvichakuéra pópe ha pemboyke va’ekue, Pilato he’i rire opoitaha ichugui.

Pejerure rangue ojepoi haguã imarangatu ha heko jojávagui, pejerure ojepoi haguã mba’e vai apohagui. Ha péicha pejuka va’ekue jeikove me’ẽhárape. Tupä Ñandejára katu omoingove jevy ichupe, ha ore hína kóva rechahare. Ko kuimba’e peë pehecha ha peikuaáva, imbarete jevy ojerovia rupi Jesús réra rehe. Ko ijerovia Jesús rehe omoĩva omonguera ite ichupe, peë voi pehecha háicha.

Aikuaa, che pehẽngue kuéra, Peë ha pende ruvicha kuéra pejuka ramo guare  Jesúspe, pejapo hague peikuaa porã’ỹ rehe. Opáichavo, Tupä Ñandejára ojapo péicha, oiko haguã upe he’i va’ekue opa imaranduhára rupi, pe Mesías omano va’erãha.

Upéva rehe pejevy Tupä Ñandejára gotyo ha peñembyasy, ha’e oheja rei haguã peëme pene angaipa, ha Ñandejára ombou haguã peëme ára piro’y omboúvo peëme upe Jesús, iñepyrũha guive voi ha’e oiporavo va’ekue Mesías ramo peëme guarã.

Jesucrísto  tekotevẽ gueteri opyta yvágape oñemoĩmba peve hekópe opa mba’e, he’i haguéicha umi maranduhára marangatu yma guare  rupi. Moisés he’i va’ekue ñande rukuéra ypykuépe: ‘Tupä pende Jára omopu’ãta pende apytégui peteï maranduhára cheichagua. Pene ñe’ẽrendúke ichupe opa he’ívape, Cháke opa umi ohendu’ỹva upe maranduhárape oñemosẽta hetãgui’.

Ha opa maranduhára, Samuel guive, oñe’ẽ va’ekue avei ko’ã ára rehe. Peëme guarã hína umi ñe’ẽ Tupä Ñandejára ome’ẽ va’ekue maranduhára kuéra rupi, ha peëme guarã avei upe ñe’ẽ me’ẽ Tupä Ñandejára ojapo va’ekue pende ru kuéra ypykue ndive. Tupä Ñandejára niko he’i va’ekue Abrahámpe: ‘Opa tetã yvy arigua ojehovasáta ne ñemoñare kuéra rupi’. Tupä omoingove ramo guare  ita’ýrape, omondo ichupe peëme raẽ, pende rovasa haguã, opoikávo peëme pene rembiapo vaikuégui”.

Tupä Ñandejára Ñe’ẽ.

SALMO ÑEMBOHOVÁI       8, 2a. 4-9

R. Tupä ore Jára, herakuã porã ite nde réra

Amaña ramo yvága rehe upe ne rembiapokue rehe,

jasy ha mbyja kuéra rehe hendápe remoĩ va’ekue,

ha’e che jupe: Máva piko yvypóra,

ne mandu’a haguã hese? R.

Michĩ remomichĩve ekove yvágape guágui,

ha yvate ichupe rehupi ha rembotuicha.

Mburuvicha ramo remoĩ ichupe ne rembiapokue ári,

opa mba’e ipo guýpe remoĩ. R.

Ovecha ha guéikuéra, ha opa mymba saite,

guyra kuéra yvága rehe ovevéva,

pira ha opa umi mba’e ýpe oikóva. R.

SECUENCIA

Ñandejára Jesucrísto  rayhupárakuéra

ñamoï Tupä Ñandejára ra’y pópe ñane remikuave’ë momba’eguasu rehegua

ojora va’ekue ñane angaipa Cristo imara’ÿva,

omoï porã jevy va’ekue hi’angaipávape ñande Ru ndive.

Mano ha tekove oñembojovake ñera’ã mbaretépe

pe mburuvicha guasu omano va’ekue

ha ko’ágä oikove jevy.

Ere oréve María Magdalena mba’épa rehecha tape rehe

Ahecha Ñandejára Jesucrísto  tyvy ha Ñandejára oikove jevýva rova ojajaipáva.

Ahecha angelkuérape, ohecha va’ekue pe mba’e hechapyrã

ahecha Ñandejára Jesucrísto  oñeñuvã hague

ha ijaokuéra oikove jevy Cristo che jeroviaha,

ha omotenondéta hemimbo’e kuérape Galiléape.

Jaikuaa Ñandejára Jesucrísto  oikove jevyha añete hápe

nde, Mburuvicha guasu nde pu’akapáva, ore poriahuverekomi kena.

ALELUIA              Sal 117, 24

Aleluia.

Kóva ko árape

Ñandejára oñemongu’e,

javy’a joáke hesehápe

Aleluia.

EVANGELIO

Ko’ágä ñahendúta Ñandejára Jesucrísto  rekove ha hemimbo’e San Lucas omombe’u háicha.

Pejapysaka porãtapa hese?                                                    24, 35-48

Upe ramo mokõi discípulo ou jevy rire Emaúsgui omombe’u mba’épa ojehu ichupe kuéra tape rehe, ha mba’éichapa oikuaa hikuái Jesúspe omboja’óvo mbujape.

Oñe’ẽ gueteri hikuái ko’ã mba’e rehe, oñemoĩ ramo Jesús mbytépe kuéra. Omomaitei ichupe kuéra ha he’i:

Py’a guapy peëme guarã.

Ha’e kuéra tuicha oñemondýi, oimo’ã ohecha hikuái póra. Jesús katu he’i ichupe kuéra:

Mba’e rehe piko peñemondýi? Mba’e rehe piko pende py’a mokõi, perovia ha ndaperoviái? Pema’ẽ che po ha che pýre. Che ha’e. Pepoko che rehe ha pehecha. Póra niko ndaho’ói ha naikanguéi, pehecha háicha arekoha che.

He’ívo péicha, ohechauka ichupe kuéra ipo ha ipy. Ha ndogueroviaséi hikuái, ovy’a ha ohecha ramo itereígui. Ha Jesús he’i ichupe kuéra:

Perekópa ko’ápe ja’u va’erã?

Ome’ẽ ichupe hikuái peteï pira mbichy pehẽngue, ha ha’e ho’u henondépe kuéra. Upéi katu he’i:

Pe ojehu va’ekue chéve niko, pe ha’e va’ekue peëme aimérõ gueteri pene ndive: oiko va’erãha che rehe pe oĩva Moisés rembiapoukapýpe, umi maranduhára kuatiápe ha Salmo kuérape.

Aipo ramo oikuaauka ichupe kuéra pe Ñandejára Ñe’ẽ, ha he’i:

Oĩ kuatiápe pe Mesías omano va’erãha, ha oikove jevy mbohapy ára haguépe, ha hérape oje’e va’erãha opa tetãme, ojevy haguã hikuái Tupä Ñandejára gotyo, ha’e oheja rei haguã ichupe kuéra iñangaipa. Peñepyrũ Jerusaléngui, Peë pemombe’u va’erã ko’ã mba’e.

Ñandejára Jesucrísto  Ñe’ẽ.