JUEVES QUINTO DE PASCUA

LECTURA PETEÎHA:

Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha 15, 7-21

Heta oñe’ẽ rire hikuái, Pedro opu’ã ha he’i ichupekuéra: Che pehẽnguekuéra, peikuaa ymáma Tupã Ñandejára che poravo hague pende apytégui amoerakuã haguã pe marandu porã Israelgua’ỹvape, ikatu haguã ha’ekuéra oguerovia. Ha Tupã Ñandejára, oikuaáva opavave py’apy, ohechauka oguerohoryha ichupe kuéra, ome’ẽ niko ichupekuéra Espíritu Santo ñandéveicha avei.

Tupãme guarã peteĩchante ha’ekuéra ha ñande, omopotĩ niko avei ipy’apy pe jerovia rupi. Mba’érepa aipórõ peñemoĩse Tupã Ñandejára rehe, peitývo ko’ã Jesús reroviaha ári mba’e pohýi, ñande ha ñande rukuéra ypykue ikatu’ỹ va’ekue jaropu’aka? Upéva rangue, ñande jarovia reiete jajepysyrõha ha’ekuéraicha avei, Ñandejára Jesús imba’e porã rupi.

Opavave okirirĩ ha ohendu, Bernabé ha Pablo oñe’ẽ aja umi techaukarã ha hechapyrãvare, Tupã Ñandejára ojapo va’ekue ha’e kuéra rupi umi Israelgua’ỹva apytépe. Ha’ekuéra oñe’ẽmbávo, Santiago he’i: Che pehẽnguekuéra, pe che rendumi: Simón omombe’u ñandéve mba’éichapa Tupã Ñandejára  oguerohory ypy va’ekue Israelgua’ỹvape, oiporavóvo avei ijapytépekuéra peteĩ tetã imba’erãva. Upéicha avei ohai va’ekue umi maranduhára, he’i háicha Tupã Ñandejára kuatiañe’ẽ:

‘Upéi aju jevýta  ha amopu’ã jevýta  David tapỹi ojero’a va’ekue; amyatyrõ jevýta  itapere ha amopu’ã jevýta, ikatu haguã umi ambue oheka Tupä Ñandejárape opa tetã megua ndive, oñemboyke va’ekue che rérape guarã.

Tupä Ñandejára, oikuaauka va’ekue ko’ã mba’e yma ite guive, ome’ẽma iñe’ẽ.’

Aipórõ che añandu nañamoĩ va’erãiha mba’e pohýi tekotevẽ’ỹva umi Israelgua’ỹvape, ijerovia yma guarégui ojehejávape, oho haguã Tupã Ñandejára ndive. Jahaínte ichupekuéra kuatiañe’ẽ ojei haguã opa oñekuave’ë va’ekue tupã gua’u kuérapegui, ani omenda hekope’ỹ, ani ho’u tymba ojahoga va’ekue ro’o, ha ani ho’u so’o huguy reheve. Yma ite guive niko opa ite táva rupi, judío kuéra tupaópe oñemoerakuãva Moisés rembiapoukapy pytu’uha árape.

Tupã Ñandejára Ñe’ẽ.

SALMO ÑEMBOHOVÁI  95, 1-3. 10

Opavave: Peropurahéi Tupã Ñandejárape purahéi pyahu.

O bien:

Aleluia.

Peropurahéi Tupã Ñandejárape purahéi pyahu.

To purahéi Tupä Ñandejárape opa ko yvy.

Pepurahéi Tupä Ñandejárape, héra pemomba’e. O.

Opa árape pemoherakuã ha’e oporoguenohẽha jejopy vaígui.

Pemombe’u opa tetã rupi ha maymávape, ha’e tuichaha, ha umi mba’e hechapyrãva ha’e ojapóva. O.

To je’e opa tetã rupi: “Ñandejára ñande ruvicha guasu hína”.

Hatã omoĩ hendápe ko yvy, ha ndaipóri omongu’éva.

Ha’e oisãmbyhy tekojojápe tetãnguéra. O.

ALELUIA  Jn 10, 27

Aleluia.

Ñandejára Jesucristo he’i: “Che ovechakuéra ohendu che ñe’ẽ,

che aikuaa ichupekuéra ha ha’e kuéra oho che rapykuéri”.

Aleluia.

EVANGELIO

Marandu porã Ñandejára Jesucristo rekove ha hemimbo’e San Juan omombe’u háicha     15, 9-11

Upe ramo ohasa mboyvemi Tupã Ñandejára ykére, Jesús he’i hemimbo’ekuérape: Che pohayhu peẽme che Ru che rayhu háicha. Peiko kena mborayhúpe, pende rehe arekóvape. Pejapo ramo che rembipota, peikóta mborayhu pende rehe arekóvape.

Péicha avei che, ajapóvo che Ru rembipota aiko imborayhu che rehe orekóvape. Añe’ẽ peẽme péicha pevy’a haguã che ndive, ha pene renyhẽ haguã vy’águi.

Ñandejára Jesucristo Ñe’ẽ.