LECTURAS JUEVES SEMANA XVI DURANTE EL AÑO

LECTURAS JUEVES SEMANA XVI DURANTE EL AÑO

JUEVES SEMANA XVI DURANTE EL AÑO

Ko’ágã ñahendúta Tupã Ñandejára ñe’ẽ Jeremías arandukápe oĩ háicha   2, 1-3. 7-8. 12-13

Tupã Ñandejára he’i chéve: “Tereho eñe’ẽ Jerusalén guápe.

Esapukái oñehendu porã haguã: ‘Péicha he’i Tupã Ñandejára:

Che mandu’a ne kuñataĩ ramo guare che mba’énte hague, amenda ramo guare nde rehe, che rayhu va’ekue  ha reju che ndive yvy ojeiko’ỹháme, oñeñotỹ’ỹháme mba’eve.’

Israel ojeporavo va’ekue  che mba’erã, che koga’a poravo pyre.

Oĩ ramo omboaíva ichupe, che ainupãva upévape, amondóvo ichupe ivaíva. Che, opa mba’e Jára, upéicha ha’e.”

Che agueru ichupe kuéra ko yvy porãme, ho’u haguã hi’a ha iporã nguete ichugui  heñóiva.

Peẽ katu peju ha pemomarã che yvy, che mbojeguaru ko tetãgui, upe che mba’e teévagui.

Pa’ikuéra noporandúi: “Mamo piko oĩ Tupã Ñandejára, che rembiapoukapy rerekuakuéra nda che kuaái, mburuvichakuéra opu’ã che rehe, maranduhára kuéra omomarandu Baal rérape, ha oho tupãnguéra mba’everã iporã’ỹva rapykuéri.”

Eñemondýike yvága kóva renondépe!

Eñemoĩ eryryipa kyhyjégui!”

Che, opa mba’e Jára, upéicha ha’e.

“Che retãgua ojapo mokõi mba’e ivai etereíva: Che reja chéve, ykua satĩ oporomoingovéva, ha ojapo ijupe guarã ykua oñembyaipáva opyta’ỹháme y.”

Tupã Ñandejára Ñe’ẽ.

SALMO ÑEMBOHOVÁI    35, 6-7b. 8-11

Opavave: Tupã Ñandejára nde heguínte heñói tekove añetegua

Tupã Ñandejára, ne mborayhu niko ojepyso yvága peve,

nde reko jerovia araíre.

Nde reko joja katu umi yvyty ijyvateve vaicha,

ha ne mba’e kuaa yguasu pypukúicha. O.

Nde Ñandejára, reñangareko yvypóra ha mymbakuérare.

Ajépa tuicha ne mborayhu Tupã Ñandejára.

Upévare maymáva oñemo’ã nde pepo guýpe.

Hyvatã umi mba’eta nde rógape oĩvagui. O.

Nde hegui mante heñói tekovete,

ha nde ore resape rupi, opa mba’e oréve hesakã.

Mborayhu ha teko jojápe reñañuã umi imarangatu ha ne momba’évape. O.

ALELUIA Cf. Mt 11, 25

Aleluia.

Jehovasapyre nde che Ru, Tupã yvy ha yvága Jára, rehechaukáre mba’e guasu ete Sambyhy rehegua

umi michïvévape.

Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha                             13, 10-17

Upe ramo Ñandejára remimbo’e kuéra oñemboja hendápe ha oporandu ichupe: Mba’ére piko opavavépe reñe’ẽ jave, reiporu ñe’ẽ mbojoja ichupe kuéra rembo’e haguã?

Jesús he’i ichupe kuéra: Tupã Ñandjára niko oikuaauka peẽmente umi mba’e ñemimby Tupã Ñandejára sãmbyhy yvága peguáre. Ichupe kuéra katu nahániri. Upe oguerekóvape oñeme’ẽvéta oguerekove haguã, ha upéva ári oñeme’ẽvéta ichupe.

Upe oguereko’ỹvagui katu, pe michĩmi oguerekóva jepe ojepe’áta, ha mba’evete ndopyta mo’ãi ichupe. Ko’ãva niko omaña ramo jepe ndohechái hína, ha ohendu ramo jepe ndoikéi iñakãme. Upévare añe’ẽ ichupe kuéra ñe’ẽ mbojoja rupi. Ha péicha, ojehu ichupekuéra upe maranduhára Isaías he’i haguéicha:

“Ko’ãva ohenduve ramo jepe ndoikuaa mo’ãi, omañave ramo jepe ndohecha mo’ãi.

‘Ko’ãva akãme ndoike véima mba’eve, omboty ijapysa ha hesa. Péicha’ỹrõ, ikatúne ohecha ha ohendu, térã ojecha kuaa ha ojere ou che rendápe ha aipohano ichupekuéra”.

Pevy’a ite va’erã katu peẽ, ikatúgui peche recha pende resa rupi, ha ikatúgui peche rendu pende apysa rupi. Añetehápe ha’e peẽme, heta maranduhára ha heta imarangatúva ohechase va’ekue  ko peẽ pehecháva, ha ndo hechái, ha ohenduse va’ekue  ko peẽ pehendúva, ha nohendúi.

Ñandejára Jesucristo Ñe’ẽ