LECTURAS JUEVES SEMANA 33° DURANTE EL AÑO

LECTURAS JUEVES SEMANA 33° DURANTE EL AÑO

Ñahendúta Tupã Ñandejára Ñe’ẽ Apocalipsis arandukápe oĩ háicha    5, 1-10

Che Juan, ahecha pe guapyhápe oguapýva po akatúape peteĩ kuatia apakuapy ojehaíva hyepýguio ha okaguio, ha 7 séllope oñemboty hatãva.

Ha ahecha peteĩ Tupã Ñandejára remimbou ipu’akapáva, oporandu hatãva: “Mávapa ijeroviaháva, oipeka haguã ko kuatia apakuapy ha ojoka umi séllo?” Ha yvágape ha yvýpe, yvyguýpe jepe, ndaipóri avave ijeroviaháva ikatúva oipeka upe kuatia apakuapy, ha oma’ẽnte jepe hese. Ha che heta che rasẽ ndojejuhúi haguére peteĩ ijeroviaháva ikatúva oipeka upe kuatia apakuapy ha oma’ẽ hese. Ha peteĩva umi karai moakãhára apytégui he’i chéve: “Anive rejahe’o, pe León, Judá ñemoñare, David ra’yre, osẽ porã ha ichupe ija oipekávo pe kuatia apakuapy ha ojoka umi 7 séllo.”

Ha upe jave, pe guapyha ha umi oikovéva, ha umi karai moakãhára mbytépe, ahecha peteĩ Ovecha ra’y. Oñembo’y vaicha, ha ojekuaa ojejuka hague. 7 hatĩ ha 7 hesa, ha umíva hína umi 7 Tupã espíritu oñemondo va’ekue  yvy ári.

Upe Ovecha ra’y oho ha ojapyhy pe kuatia apakuapy, pe guapyhápe oĩva po akatúagui. Ha ojapyhývo kuatia apakuapy, umi irundy oikovéva ha umi 24 karai moakãhára oñesũ pe Ovecha ra’y renondépe.

Opavave hi’árpa ha oguereko ipópe mbayru óro henyhẽva insiénsogui, umíva niko umi Tupã Ñandejára mba’éva ñembo’e hína. Ha opurahéi joa ko purahéi pyahu: “Ndéve ija rejapyhy ha reipekávo pe kuatia apakuapy ha rejoka umi séllo, nde niko reñe momarangatu va’ekue; ha reñohẽvo nde ruguy, renohẽ mba’e vaígui, Tupã Ñandejárape guarã, tekove opaichagua, opáicha oñe’ẽva, opa táva ha tetã.

Ichugui kuéra rejapo peteĩ tetã, rejapo pa’i ore Tupã Ñandejárape guarã, ha oisãmbyhýta yvy tuichakue.”

Tupã Ñandejára Ñe’ẽ.

SALMO ÑEMBOHOVÁI    149, 1- 6a. 9b

Opavave: Pepurahéi Tupä Ñandejárape purahéi pyahu.

Pepurahéi Tupä Ñandejárape purahéi pyahu,

umi hese ojeroviáva atýpe ichupe to ñemomba’e guasu.

Israelgua to guerohory ijapo harépe,

Siongua to guerohory huvicha guasúpe. O.

Héra rehehápe pejeroky, tambor

ha árpa púpe ichupe pepurahéi.

Tupä Ñandejára niko ohayhu hetã guápe,

imboriahúvape oguenohẽ jejopy vaígui. O.

Ta hory hesehápe umi imarangatúva, oñenoháme to purahéi.

Ijurúgui ta ñahendu omomba’e guasúrõ Tupã Ñandejárape,

ipópe to guereko kyse puku hãimbe jováiva, to jejapo, kuatiápe oñemoĩ haguéicha, hese ojeroviáva osẽ porãta. O.

ALELUIA Sal 94, 7d. 8a

Aleluia.

Pehendúke Tupã Ñandejára ñe’ë, ani pemohatä pene korasö.

Aleluia.

EVANGELIO

Marandu porã Ñandejára Jesucristo rekove ha hemimbo’e San Lucas omombe’u háicha     19, 41-44

Upe ramo oguahẽvo Jerusalén ypýpe, ohechávo upe táva guasu, Jesús ojahe’o hese, ha he’i: ‘Ikatúmo ra’e ko árape, nde avei reikuaa mba’épa ome’ẽ kuaa ndéve py’a guapy! Ko’ágä  jepe, upéva okañy nde hegui ha ndaikatúi rehecha.

Oúta ndéve guarã heta ára ivaíva. Umi nde rehe ija’e’ỹva omopu’ãtaha tápia nde jerére, ha okaguaíta nde rehe opáguio, ha ne rundi etéta hikuái. Ojukapáta nde pypegua kuéra, ha ndoheja mo’ãi ita ojo’ári, nderehecha kuaái rupi pe ára ou hague Tupã Ñandejára ne momarandúvo.

Ñandejára Jesucristo Ñe’ẽ.