VIERNES VII DE PASCUA

VIERNES VII DE PASCUA

LECTURA PETEÏHA:

Ko’ágä   ñahendúta Tupã Ñandejára ñe’ẽ Apóstolkuéra rembiapokuépe oĩ háicha   

                     25, 13b-21

Mburuvicha guasu Agripa ha Berenice oho Cesaréape omomaiteívo Féstope. Hi’arégui upépe ára mbovymi, Festo omombe’u mburuvicha guasúpe upe Pablo reheguáva. He’i ichupe: Oĩ ko’ápe peteĩ kuimba’e Félix oheja va’ekue iñembotypy.

Aimérõ guare Jerusalénpe, pa’i ruvicha kuéra ha Israelgua moakãhárakuéra, oñe’ẽ vai chéve hese ha ojerure ojejuka haguã. Ha’e ichupe kuéra Romagua mburuvichakuérava, ndojepokuaaiha ojukaukávo avavépe, ombojovake mboyve ichupe imombe’uhára ndive, ikatu haguã oñe’ẽ ijehe.

Upévare, ha’ekuéra oúvo ko’ápe, ambopuku’ỹre, upe ára ambuépe voi añemoĩ mbojovakehára guapyhápe ha aruka pe kuimba’épe. Umi oúva omoĩ vai haguã ichupe katu nde’íri hese mba’eve umi che aimo’ã va’ekuégui.

Umi mba’e jerovia imba’ekuérava rehegua año ite he’i hese: aipo Jesús omano va’ekue ha Pablo he’ívare oikoveha gueteri. Che ndaikuaáigui mba’épa ajapóta, aporandu Páblope ohosépa Jerusalénpe oñembojovake haguã ko’ã mba’ére. Ha’e katu ojerure ombojovake haguã ichupe Romagua mburuvicha pavẽ. Upévare ha’e, opyta haguã iñembotypy ikatu peve amondo ichupe.

Tupã Ñandejára Ñe’ẽ.

SALMO ÑEMBOHOVÁI      102, 1-2. 11-12. 19-20ab

R. Tupä Ñandejára omoĩ iguapyha yvágape.

O bien:

Aleluia.

Amomba’e guasu Tupä Ñandejárape che py’a ite guive,

che py’a ite guive amomba’e guasu héra marangatu,

ha nda che resarái chéne heta

mba’e porã ome’ẽ hague chéve. R.

Yvága oĩ mombyry háicha yvýgui,

upéicha ite tuicha imborayhu umi hese ojeroviávare.

Kuarahy resẽ mombyry háicha kuarahy reikégui,

upéicha omomombyry ñande hegui ñane angaipa. R.

Tupä Ñandejára omoĩ iguapyha yvágape,

ha upe guive oisãmbyhy opavavépe.

Tupã remimbou, peẽ pejapóva Tupã Ñandejára rembipota,

pejapóva opa mba’e ha’e he’íva. R.

ALELUIA Jn. 14, 26

Aleluia.

Espíritu Sánto oikuaaukáta peëma opa mba’e

ha pene momandu’áta opa mba’e ha’e va’ekue peëme.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Juan omombe’u háicha. Pejapysaka porãtapa hese?                                       

       21, 1. 15-19

Upe ramo guare Ñandejára oikove rire, ojechauka hemimbo’e kuérape ha orambosapa rire hendive kuéra, Ñandejára oporandu Pédrope: Nde, Simón, Juan Ra’y, ndépa che rayhuve opa ko’ãvagui? Pedro he’i ichupe: Hẽe, che Jára. Nde niko reikuaa rohayhuha.

Jesús he’i ichupe: Eñangareko che ovechakuérare.

Jesús oporandu jevy ichupe: Nde, Simón, Juan ra’y, ndépa che rayhu?

Pedro he’i ichupe: Hẽe, che Jára. Nde niko reikuaa rohayhuha.

Jesús he’i ichupe: Eñangarekóke che ovecha kuérare.

Jesús oporandu jevy voi ichupe: Nde, Simón, Juan ra’y, ndépa che rayhu?

Pedro rehe oguapy Jesús oporandu jevy voi haguére ichupe péicha, ha he’i: Che Jára, nde niko reikuaa opa mba’e, ha nde reikuaa che rohayhuha.

Jesús he’i ichupe: Eñangarekóke che ovecha kuérare.

Añetéko ha’e ndéve: yma ne mitãvérõ reñemobosako’ími va’ekue ha reho mamo rehosehápe. Ágã nde tujávo katu, reipysóta umi nde jyva ha ambue nde jokuáta ha nde reraháta rehose’ỹháme.

Péicha, Jesús oikuaauka hína mba’éichapa Pedro omanóta ha mba’éichapa ombotuicháta Tupã Ñandejárape. Upéi Jesús he’i ichupe: Eju che moirũ.

Ñandejára Jesucristo Ñe’ẽ.