LECTURA DEL 2 DE ENERO – FERIA DE NAVIDAD

LECTURA DEL 2 DE ENERO – FERIA DE NAVIDAD

Ko’ágã ñahendúta Tupã Ñandejára Ñe’ẽ San Juan ohai va’ekue      1 Jn 2, 22-28

Che ra’ykuéra pohayhu etéva: Mávapa pe ijapúva? Upe he’íva Jesús ndaha’eiha pe Cristo. Upéva hína pe Crístore opu’ãva ndoikuaaséigui mba’eve Túva ha Ta’ýragui. Umi ndoikuaaséiva mba’eve Ta’ýragui, ndoguerekói hendive Túvape. Pe oguerohorýva Ta’ýrape katu oguereko hendive Túvape.

Upévare peẽ peñongatu pende py’apýpe upe ñe’ẽ pehendu va’ekue  iñepyrũha guive. Ha upe pehendu va’ekue iñepyrũha guive opytárõ pende korasöme, peẽ avei peiméta Ta’ýra ndive ha Túva ndive. Kóva hína upe Jesucristo he’i va’ekue ome’ẽtaha: Jeikove opa’ỹva.

Ahai hína peẽme umi pene mbotavysévare. Peẽ katu pereko Espíritu marangatu, Jesucristo pene mboyke hague rupi imba’erã, ha napeikotevẽi avave pene mbo’e, pe Espíritu ha’e ome’ẽ va’ekue pende reko mbo’e rupi opa mba’ére, ha umi hemimbo’epy añetegua hína, ndaha’éi japu. Pepytáke peteĩ py’ápe Cristo ndive, Espíritu pene mbo’e haguéicha.

Ko’ágã, che ra’ykuéra pohayhu etéva, pepyta peteĩ py’ápe Cristo ndive, ikatu haguã jajerovia hese ha’e ojechaukárõ, ha ani ñatĩ henondépe ha’e oúvo.

Tupã Ñandejára Ñe’ẽ.

SALMO ÑEMBOHOVÁI  97, 1-4

Opavave: Tupã Ñandejára ohechauka ipokatu

Pepurahéi Tupã Ñandejárape purahéi pyahu, mba’e hechapyrãva ojapógui ha’e.

Ipyapy mbarete ha imarangatúgui ipu’aka opa mba’ére. O.

Tupä Ñandejára ohechauka ipokatu, tetãnguérape ohechauka heko jojaha.

Imandu’a imborayhu ha heko jeroviaháre tetã Israel ndive guarã. O.

Yvy jerekuévo ojehecha Tupã ipu’akaha opa mba’ére.

To jererohory Ñandejára yvy jerekuévo, purahéi rory tosoro ha to jevy’a. O.

ALELUIA

Aleluia.

Oñe’ẽ rire ñande túvakuéra ndive maranduhárakuéra rehe ae,

ko ára pahápe, Ñandejára oñe’ë ñandéve Ita’ýra rehe ae.

Aleluia.

EVANGELIO

Marandu porã Ñandejára Jesucristo rekove ha hemimbo’e San Juan omombe’u háicha   1, 19-28

Upe ramo Judío moakãhára  kuéra omondo pa’i kuéra ha umi Tupã Ñandejára rembiapoukapy mbo’eha Juan rendápe, oporandu haguã ichupe mávapa ha’e. Ha ha’e he’i porã ichupe kuéra: Che ndaha’éi pe Mesías.

Oporandu jevy ichupe hikuái: Máva piko nde péicharõ? Ndaha’éi mba’épa maranduhára Elías?

Juan he’i: Nahániri.

He’i upe marõ hikuái: Nde piko ku maranduhára ou va’erãva?

Juan he’i ichupe kuéra: Nahániri.

He’i ichupe hikuái: Emombe’u oréve mávapa nde. Umi ore mbou va’ekue rendápe roho va’erã ro’e mávapa nde. Mavaha nde ere nde jehe?

Juan he’i ichupekuéra: Che niko peteĩ osapukáiva yvy ojeiko’ỹháme, he’íva: ‘Pembosako’i Ñandejárape haperã’, he’i haguéicha maranduhára Isaías.

Umi ou va’ekue oñe’ẽ haguã Juan ndive, fariséo rembijokuái, oporandu ichupe upe marõ: Nde ndaha’éi ramo pe Mesías, ha ndaha’éi ramo maranduhára Elías térã pe maranduhára ou va’erãva, mba’ére reporomongarai reikóvo?

Ha Juan he’i ichupekuéra: Che niko ýpe aporomongarai. Pende apytépe katu oĩ peteĩ peẽ peikuaa’ỹva, oútava che rire, ha chéve ija’ỹva ajora ichupe ipy rehegua sãnte jepe.

Opa ko’ã mba’e ojehu, táva hérava Betániape, opytáva ysyry Jordán ári, kuarahy resẽ gotyo.

Ñandejára Jesucristo Ñe’ẽ.