LECTURAS DEL 7 DE ENERO

LECTURAS DEL 7 DE ENERO

LECTURA PETEÎHA:

Ñahendúta Tupã Ñandejára Ñe’ẽ San Juan ohai va’ekue   1 Jn 5, 14-21

Che ra’ykuéra:

Jajerovia Tupã Ñandejárare jaikuaágui, jajerure ramo pe ha’e oipotáva, ñane renduha. Ha jaikuaa háicha Tupã Ñandejára ohenduha ñane ñembo’e, jaikuaa avei jarekomaha pe jajerure va’ekue.

Oĩrõ oikuaáva hapicha ojapoha ivaíva ndogueraháiva ichupe ñemanóme, oñembo’e va’erã ha Tupã Ñandejára ome’ẽta jeikove hapichápe ha’érõ angaipa ndogueraháiva ñemanóme. Oĩ angaipa ogueraháva ñemanóme ha upe tembiapo vaíre nda’éi oñeñembo’e haguã. Opa ñepu’ã Tupã Ñandejárare niko angaipa. Oĩ jepe angaipa ndogueraháiva ñemanóme.

Jaikuaa pe oguerekóva Tupã Ñandejárape Túva ramo, ndojapoveiha angaipa, Tupã Ñandejára Ra’y oñangarekógui hese, ha Aña ndopokói hese. Jaikuaa ñane Tupã Ñandejára mba’eha ha opa yvypóra reko rayhuhára oĩha Aña poguýpe. Jaikuaa avei Tupã Ñandejára Ra’y ou hague ha ome’ẽ hague ñandéve akã porã jaikuaa haguã pe Tupã Ñandejára añeteguávape. Ñaime ñemopeteĩme upe hi’añetéva ndive, he’ise Ita’ýra Jesucristo ndive. Kóva pe Tupã Ñandejára añeteguáva ha pe jeikove opa’ỹva. Che ra’y kuéra pohayhu etéva, peñeñangarekóke tupã gua’ukuéragui. Amén

Tupã Ñandejára Ñe’ẽ.

SALMO ÑEMBOHOVÁI 149, 1-6a. 9b

Opavave: To ñemomba’e guasu Tupã Ñandejára.

Pepurahéi Tupã Ñandejárape purahéi pyahu,

umi hese ojeroviáva atýpe ichupe to ñemomba’e guasu.

Israelgua toguerohory ijapo harépe,

Siongua toguerohory huvicha guasúpe. O.

Héra rehehápe pejeroky, tambor ha árpa púpe ichupe pepurahéi.

Tupä Ñandejára niko ohayhu hetã guápe,

imboriahúvape oguenohẽ jejopy vaígui. O.

Ta hory hesehápe umi imarangatúva,

oñenoháme jepe ichupe to purahéi.

Ijurúgui tañahendu omomba’e guasúrõ Tupã Ñandejárape,

Umi hese ojeroviáva kóicha osẽ porãta. O.

ALELUIA

Aleluia.

Ojekuaa maranduhára tuicháva ñande apytépe

Tupã Ñandejára oguejy hese ojeroviáva apytépe.

Aleluia.

EVANGELIO

Ñahendúta Ñandejára Jesucristo rekove ha hemimbo’e San Juan omombe’u háicha  2, 1-11

Upe ramo guare mbohapy ára rire oiko peteĩ ñemenda táva Canáme, opytáva yvy Galiléape. Jesús sy oĩ hína avei upépe. Jesús ha hemimbo’ekuérape avei oñemoguahẽ ñe’ẽ oho haguã. Vino opávo, Jesús sy oñemboja hendápe ha he’i ichupe:

Opa niko ichugui  kuéra ivino.

Jesús he’i ichupe: Mba’ére piko ere chéve upéva? Ne’ĩra gueteri niko oguahẽ chéve che ára.

Isy he’i umi tembiguáikuérape: Pejapo opa mba’e ha’e he’íva peẽme.

Oĩ upépe 6 kambuchi y reheve, judíokuéra oipurúva oñemopotĩ haguã. Umi kambuchípe ija amo 50, 60 lítro kuéra rupi. Jesús he’i umi tembiguáipe: Pemoenyhẽ ýpe umi kambuchi.

Omoenyhẽ  hikuái hembére, ha upéi Jesús he’i ichupe kuéra: Ko’ágã penohẽ michĩmi ha peraha upe tembiguái kuérape omyakãvape ho’u haguã.

Péicha ojapo hikuái. Ha upe omyakãva tembiguái kuérape ho’u pe vino ýgui oiko va’ekue, oikuaa’ỹre ha’e moõguipa osẽ. Umi tembiguái añónte umi oikuaáva, ha’e kuéra oguenohẽ haguére pe kambuchígui. Upéi pe omyakãva tembiguái kuérape ohenói pe omendávape, ha he’i ichupe:

Maymáva niko ikaguy iporãvéva raẽ ome’ẽ oje’u haguã, ha oje’u heta rire ae katu, oguenohẽ pe ivaivéva. Nde katu niko reheja pe iporãvéva ko’ágã guarã.

Kóva ko mba’e Jesús ojapo va’ekue Canáme, yvy Galiléape, mba’e hechapyrãva tenondetegua ha’e ojapo va’ekue. Péicha ha’e ohechauka ipokatu ha hemimbo’e kuéra ojerovia hese.

Ñandejára Jesucristo Ñe’ẽ.