LECTURAS DEL DOMINGO 02 DE FEBRERO

LECTURAS DEL DOMINGO 02 DE FEBRERO: Hesu oñemoĩ Ñandejára renondépe.

PRIMERA LECTURA:

Ko’ágä ñahendúta Tupä Ñandejára ñe’ẽ Malaquías arandukápe oĩ háicha     3, 1-4

Ñandejára ipu’akapáva he’i: “Amondóta che rembijokuái ombasako’i haguã che raperã. Pende Jára peë pehekáva oikéta itupaópe. Oguahẽma pe oñemboúva ha ogueru pe ñe’ẽ me’ẽ peë peipotáva!”

Ha mávapa ikatúne ogueropu’aka upe ára? Mávapa ikatúne opyta ñembo’yhápe? Oguahẽta tatáicha ñane mopotĩ haguã. Ha’éta havõicha oipe’áva ky’a ñande hegui. Ñandejára oguapýta omopotĩ haguã pa’i kuéra, Leví ñemoñare, oñemopotĩháicha pláta ha óro tatápe. Upéi ha’e kuéra ikatúta omba’e kuave’ẽ hekópe Ñandejárape. Upéma ramo  Ñandejára oguerohorýta Judá ha Jerusalén mba’e kuave’ẽ oguerohory haguéicha ymave.

Tupä Ñandejára Ñe’ẽ.

SALMO ÑEMBOHOVÁI                                                        23, 7-10

R. Ñandejára ningo imbarete, ha’e hína upe mburuvicha guasu.

Peipe’a umi okẽ nguéra, nandi topyta, ha toike mburuvicha guasu tuichaitéva. R.

Máva piko aipo mburuvicha guasu?

Ñandejára hína upéva, upe ipu’akapáva, upe ñorairõme imbaretetéva. R.

Peipe’a umi okẽnguéra, nandi topyta, ha toike mburuvicha guasu. R.

Máva piko aipo mburuvicha guasu?

Ñandejára ojajaipáva, ha’e hína upe mburuvicha tuichaitéva. R.

SEGUNDA LECTURA:

Ñahendúta Tupä Ñandejára ñe’ë ojehai va’ekue Hebreos kuérape              2, 14-18

Che pehengue kuéra: Ta’ýra kuéra ha’eháicha peteï to’o ha peteï tuguýgui guare , upéicha avei Jesús oiko va’ekue yvypóraicha, ho’o ha huguy reheve, imano rupi ipu’aka haguã Aña, ikatúva oporojukáre. Ha péicha oipysyrõ opa umi oiko va’ekue kyhyje poguýpe oikove aja pukukue. Añetehápe niko ha’e ndoúi va’ekue oipytyvõvo umi Tupä remimboúpe, ha’e ou oipytyvõ haguã Abraham ñemoñarépe.

Upéva rehe, oiko va’erã va’ekue ipehẽnguekuéraicha opa mba’épe, oiko haguã ichugui peteï Pa’i Guasu heko jeroviahava ha oporoporiahuverekokuaáva, omba’apóva Tupäme guarã, ha ojeheja rei haguã yvypórape iñangaipa. Ha ha’e voi ohasa asy ha ojepy’a ra’ã rupi, ko’ágã ikatu oipytyvõ umi ojepy’a ra’ãvape avei.

Tupä Ñandejára Ñe’ẽ.

ALELUIA                 Lc 2, 32

Pe tesakä ohesapepátava opa tetãme, ha omomimbipátava ne retã Israélpe.

EVANGELIO

Ko’ágä ñahendúta Ñandejára Jesucrísto  rekove ha hemimbo’e San Lucas omombe’u háicha. Pejapysaka porãtapa hese?   2, 22-32  Versión breve:

Oguahẽvo ára oñemopotĩ haguã, he’i háicha  Moisés rembiapoukapy, ogueraha hikuái pe mitã Jerusalénpe omoĩvo Ñandejára renondépe. Ojapo hikuái upéva, upéicha oĩgui Ñandejára rembiapoukapýpe, he’íva: “Opa mitã kuimba’e ijypykuéva oñemboyke va’erã Ñandejára peguarã”.Aipo ramo oho hikuái omba’ekuave’ẽvo, he’i háicha  Ñandejára rembiapoukapy: mokõi jeruti, ỹrõ katu mokõi pykasu ra’y.

Umi árape oiko va’ekue Jerusalénpe peteï kuimba’e hérava Simeón, heko joja ha iporiahuvereko katúva, ha oha’arõva osẽ Israel ñepysyrõva. Espíritu Santo oĩ Simeón ndive, ha oikuaauka ra’e ichupe nomano mo’ãiha ohecha mboyve pe Mesíaspe, Ñandejára omboútava. Espíritu Santo ogueraha Simeónpe Tupaópe ipógui, ha oguerahavo mitã Jesúspe itúva ha isy ojapo haguã Tupä rembiapoukapy he’íva, Simeón ohupi pe mitã ijyva ári ha omomba’e guasu Tupäme kóicha:

Ko’ágã, che Jára, rejapóma ne ñe’ẽ:

ikatúma reheja omano ko ne rembiguái py’a guapýpe.

Ahechama reñepyrũha reporopysyrõ opa tetã renondépe, pe mba’e rendy ohesapepátava opa tetãme, ha omomimbipátava ne retã Israélpe.

Ñandejára Jesucrísto  Ñe’ẽ.