LECTURAS DEL SÁBADO 07 DE DICIEMBRE
7 diciembre, 2019LECTURAS DEL LUNES 09 DE DICIEMBRE
8 diciembre, 2019LECTURAS DEL DOMINGO 08 DE DICIEMBRE: INMACULADA CONCEPCIÓN DE LA SANTÍSIMA VIRGEN MARÍA
Primera lectura:
Ko’ágä ñahendúta Tupä Ñandejára ñe’ẽ Génesis arandukápe oĩ háicha
3, 9-15. 20
Tupä Ñandejára katu ohenói upe kuimba’épe ha oporandu ichupe:
Mamo piko reime?
Upe kuimba’e he’i:
Ahendu reguata ramo yvaty rupi ha akyhyje ahechágui opívo, upéva rehe akañy.
Tupä oporandu ichupe:
Máva piko he’i ndéve nde opivoha? Re’u piko ra’e upe yva ha’e va’ekue ndéve ani haguã re’u?
Upe kuimba’e he’i:
Kuña reme’ẽ va’ekue chéve che irũrã, ome’ẽ chéve upe yva ha ha’u.
Tupä Ñandejára oporandu kuñáme:
Mba’e piko rejapo?
Ha’e he’i: Mbói che mbotavýgui ha’u.
Upéma ramo Tupä Ñandejára he’i mbóipe:
Rejapo hague rehe kóva, ne añoite reikóta
tymba jaheipýrõ, retyryrýta reikóvo yvy rehe ha ne ñembyahýi ramo re’úta yvy.
Kuña ndive romoingo vaíta, ha iñemoñare ne ñemoñare ndive.
Kuña ñemoñare ne akã rehe opyrũta, nde katu reha’ãta reisu’u ipytápe.
Kuimba’e ombohéra hembirekópe Eva he’iséva sy, opa yvypóra sýgui ha’e.
Tupä Ñandejára Ñe’ẽ.
SALMO ÑEMBOHOVÁI 98, 1-4
R. Pepurahéi Ñandejárape purahéi pyahu.
Pepurahéi Ñandejárape purahéi pyahu, mba’e hechapyrãva ojapógui ha’e.
Ipyapy mbarete ha imarangatúgui ipu’aka opa mba’e rehe. R.
Ñandejára ohechauka ipokatu, tetã nguérape ohechauka heko jojaha.
Imandu’a imborayhu ha heko jeroviaha rehe tetã Israel ndive guarã. R.
Yvy jerekuévo ojehecha Tupä ipu’akaha opa mba’e rehe.
Tojererohory Ñandejára yvy jerekuévo,purahéi rory tosoro ha tojevy’a. R.
Segunda lectura:
Ñahendúta Tupä Ñandejára Ñe’ẽ San Pablo ohaiva’ekue Éfeso guápe
1, 3-6. 11-12
To ñemomba’e guasu Tupä, Ñandejára Jesucrísto Túva. Cristo rupi niko ha’e ñande rovasa va’ekue opaichagua jehovasápe yvágagui oúva reheve. Cristo rupi niko Tupä ñande poravo va’ekue opa mba’e ojapo mboyve, jaiko haguã henondépe, ichupe oñemboyke va’ekue ha marã’ỹvaicha. Ha ha’e ñande rayhúgui, ymaite guive voi ñande poravo va’ekue, ñande rereko haguã ta’ýra tee ramo Jesucrísto rupi, péicha ha’e ojaposégui ha oipotágui.
Péicha ha’e ojapo, opa árape ñamomba’e guasu haguã Tupäme imborayhu tuichaite rehe, ha heseve ñande rovasa hague rehe Ta’ýra ohayhu etéva rupi.
Tupä péicha oipotágui, ha opa mba’e ojehúva ojehúgui ha’e oipota háicha niko ore poravo va’ekue ymaite guive Cristo rupi, roiko haguã imba’e teéva ramo. Ha’e niko oipota va’ekue ore raẽvete roju rojerovia Cristo rehe, ikatu haguãicha opavave romomba’e guasu ipokatu tuichaite.
Tupä Ñandejára Ñe’ẽ.
ALELUIA Cf. Lc 1, 28
Aleluia.
Roguerohory, nde Tupä rembiporavo!
Ñandejára oĩ ne ndive.
Aleluia.
EVANGELIO
Ko’ágä ñahendúta Ñandejára Jesucrísto rekove ha hemimbo’e San Lucas omombe’u háicha.
Pejapysaka porãtapa hese?
1, 26-38
Tupä omondo hemimbou Gabriélpe peteï táva Galilea pegua hérava Nazarétpe. Upépe oiko María, peteï kuñataĩ marã’ỹ, ome’ẽma va’ekue iñe’ẽ omenda haguã José rehe, mburuvicha guasu David ñemoñare. Tupä remimbou oike pe María oĩháme ha he’i ichupe:
Roguerohory, nde Tupä rembiporavo! Ñandejára oĩ ne ndive. María ipy’andýi opytávo, ha oñeporandu mba’énepa he’ise pe maitei ne upéva. Tupä remimbou he’i ichupe:
María, ani rekyhyje, Tupä nde rerohory. Nde rye guasúta ha ne membýta, ha pe mitã rembohérata Jesús. Ha’e mba’e guasúta ha oje’éta hese: “Tupä Yvatetegua Ra’y”. Ha Tupä Ñandejára ojapóta ichugui mburuvicha guasu, ijypykue Davídcha. Ha’e oisãmbyhýta Jacob retã guápe opa árape guarã.
María oporandu pe Tupä remimboúpe:
Mba’éicha piko ojehúta upéva, ko che ndaikóiva gueteri kuimba’e ndive?
Tupä remimbou katu he’i ichupe:
Espíritu Santo oikéta nde pype, ha Tupä Yvatetegua pokatu oúta nde ári. Upéva rehe, pe mitã oútava oñembohérata Imarangatúva ha Tupä Ra’y. Isabel, nde rogaguáva, imembýta avei, iguãiguĩma ramo jepe. Pe kuña oje’e va’ekue ndaikatuiha imemby, ojapóma 6 mése hye guasuha. Tupäme guarã ndaipóri ikatu’ỹva.
Aipo ramo María he’i:
Che, Ñandejára rembiguái. Tupä to japo che rehe pe ere haguéicha.
Ha upéi, pe Tupä remimbou oho.
Ñandejára Jesucrísto Ñe’ẽ.