LECTURAS DEL DOMINGO 10 DE NOVIEMBRE

LECTURAS DEL DOMINGO 10 DE NOVIEMBRE

Primera lectura:

Ko’ágä ñahendúta Tupä Ñandejára ñe’ẽ Macabeos aranduka mokõiháme oĩ háicha

6, 1; 7, 1-2

Ndohasa pukúi mburuvicha guasu omondo haguã peteï moakãhára Atenas guápe ojopývo umi Israel guápe oheja haguã itúva kuéra ypykue reko ha Tupä Ñandejára rembiapoukapy
Umi ára umívape oñemoakãsã peteï sy 7 imemby reheve. Mburuvicha guasu oinupãuka ichupe kuéra tukumbo ha teju ruguáipe ho’u haguã kure ro’o, oheja’ỹva Tupä Ñandejára rembiapoukapy. Peteïva, opavave rérape, kóicha he’i: “Mba’e piko peikuaase? Roime romano haguãicha rojei rangue ore ru kuéra ypykue rembiapoukapýgui”.

Ha ha’e omanonguévoma he’i: “Nde, nde reko añáva, reipe’a ore hegui ore rekove ko’ágã, opa mba’e Jára katu ore moingove jevýta ha ome’ẽta oréve jeikove opave’ỹva, romano hague rehe hembiapoukapýre”.

Kóva rire oñemboharái hikuái pe mbohapyhare. Ha’e, ojejerurévo ichupe, oguenohẽ ikũ ha oipyso ichupe kuéra ijyva, okyhyje’ỹ rehe, ha he’i: “Tupä Ñandejára ome’ẽ va’ekue chéve che rete, ha hembiapoukapy amomba’égui narombyasýi, ha ichugui aha’arõ ome’ẽ jevývo chéve”. Umi upépe oĩ va’ekue ha mburuvicha guasu jepe ipirĩmba ohechávo mba’eicha ite pevépa ipy’a guasu pe mitã rusu. Péicha ohechaukáva nomomba’eiha upe jehasa asy.

Omanóvo ha’e, pe irundyhare avei oñemboharái hikuái. Ha ha’e, Oĩma ramo omano haguãicha, he’i: “Nambyasýi amanotaha pende po rupi, ajeroviágui Tupä Ñandejára ñe’ẽ me’ẽre, he’i va’ekue ore moingove jevytaha. Ndéve guarã katu ndaipóri mo’ãi jeikove jevy”.

Tupä Ñandejára Ñe’ẽ.

SALMO ÑEMBOHOVÁI 17, 1. 5-6. 8b. 15

R.TupäÑandejára mba’e aipotave? apáyvo, rohecha guive.

Tupä Ñandejára, hendapeguánteko ajerure ndéve.
Ndéve niko rohenói jevy jevy.
Ehendu kena che ñembo’e,
añeteguánteko ha’e ndéve. R.

Nde rape rupi memete aiko,
araka’eve ndapiái ichugui.
Che Jára, ndéve niko añembo’e.
Ejapysaka kena che rehe ha che rendu. R.

Nde pepo guýpe kena che mo’ã
Che katu Tupä Ñandejára, nde reko joja rehehápe
nde rehe amaña guive piko mba’e aipotave?
Ha apáyvo, rohecha guive? R.

Segunda lectura:

Ñahendúta Tupä Ñandejára Ñe’ẽ San Pablo ohai va’ekue ikuatiañe’ẽ mokõiháme Tesalónica guápe

2, 16__3, 5

Che pehënguekuéra:

Ñandejára Jesucrísto voi ha Tupä ñande Túva, ñande rayhúva ha ome’ẽ va’ekue ñandéve vy’a opa’ỹva, ha ñeha’arõ kuaa ipy’a porã rupi, ta pene mbopy’a kyre’ỹ, ha ta pene mombarete opa mba’e porã peje ha pejapóvape.

Ipahávo, ore pehẽngue kuéra, peñembo’ekena ore rehe, Tupä Ñandejára ñe’ẽ oguahẽ pya’e ha ojererohory haguã opa rupi, ojehu haguéicha pende apytépe. Peñembo’e avei Tupä Ñandejára ore pe’a haguã umi tekove añágui, nda opavavéi niko oguerovia umi mba’e ro’éva. Tupä Ñandejára katu heko jeroviaha, ha ha’e pene mombarete ha pene mo’ã va’erã Añágui. Ha Tupä Ñandejára rehe rojerovia pejapo ha akóinte pejapotaha umi ro’e va’ekue peëme. Tupä

Ñandejára ta pene pytyvõ peporohayhu haguã Tupä oporohayhuháicha, ha peropu’aka haguã jehasa asy, Cristo ojapo haguéicha.

Tupä Ñandejára Ñe’ẽ.

ALELUIA Apoc 1, 5a. 6b

Aleluia.
Ha Jesucrístogui avei, mba’e rechahara jeroviahava
Teko mimbipa ha pokatu ta imba’e opa ára.
Aleluia.

EVANGELIO

Ko’ágä ñahendúta Ñandejára Jesucrísto rekove ha hemimbo’e San Lucas omombe’u háicha.
Pejapysaka porãtapa hese?

20, 27-38

Upe rire umi Saduséo oho Jesús rendápe. Umi Saduséo niko ndogueroviái omanóva oikove jevyha, upéva rehe he’i Jesúspe:

Mbo’ehára, Moisés niko oheja va’ekue kuatia rehe, peteï kuimba’e omano ramo imemby’ỹre ichugui hembireko, tyvýra omenda va’erã hembirekorére omoñemoñare haguã tyke’ýra omano va’ekuépe. Ha upéicha, oiko va’ekue peteï jevy 7 ojoryvýva. Ha pe tenondegua omenda, ha omano ta’ýra’ỹre. Pe mokõiha, ha mbohapyha omenda hembirekorére, ha upéicha avei ojapo umi ambue, ha omanomba umi 7 ita’ýra’ỹre. Ipahavo omano avei pe kuña. Ha néi, ágã ojeikove jevy vove, máva rembirekótapa hína pe kuña, umi 7 niko omenda va’ekue hese?

Jesús he’i ichupe kuéra:
Yvy ári ojeikove aja, kuña ha kuimba’e omenda. Ha umi Tupä ohechava, ikatuha oikove jevy pe jeikove tenondevévo guápe, taha’e kuimba’e térã kuña, umíva nomenda mo’ã véima, ndaikatu véiguima omano. Ha’e kuéra Tupä remimboúichata, ha Tupä ra’ýta oikove jevy rupi. Moisés jepe voi niko, ku javorái hendýva okai’ỹ ramo guare , oikuaauka ñandéve omanóva oikove jevyha. Upépe he’i, Tupä Abraham, Jacob ha Isaac Jaraha. Ha’e niko nda ha’éi omanóva Tupä. Oikovéva Tupä katu. Ichupe guarã niko maymáva oikove.

Ñandejára Jesucrísto Ñe’ẽ.

O bien más breve:

Ko’ágä ñahendúta Ñandejára Jesucrísto rekove ha hemimbo’e San Lucas omombe’u háicha.
Pejapysaka porãtapa hese?

20, 34-38

Jesús he’i ichupekuéra:
Yvy ári ojeikove aja, kuña ha kuimba’e omenda. Ha umi Tupä ohechava, ikatuha oikove jevy pe jeikove tenondevévo guápe, taha’e kuimba’e térã kuña, umíva nomenda mo’ã véima, ndaikatu véiguima omano. Ha’e kuéra Tupä remimboúichata, ha Tupä ra’ýta oikove jevy rupi. Moisés jepe voi niko, ku javorái hendýva okai’ỹ ramo guare , oikuaauka ñandéve omanóva oikove jevyha. Upépe he’i, Tupä Abraham, Jacob ha Isaac Jaraha. Ha’e niko ndaha’éi omanóva Tupä. Oikovéva Tupä katu. Ichupe guarã niko maymáva oikove.

Ñandejára Jesucrísto Ñe’ẽ.