LECTURAS DEL SÁBADO 19 DE OCTUBRE
20 octubre, 2019LECTURAS DEL LUNES 21 DE OCTUBRE
21 octubre, 2019LECTURAS DEL DOMINGO 20 DE OCTUBRE
Primera lectura: Ko’ágä ñahendúta Tupä Ñandejára ñe’ẽ Éxodo arandukápe oĩ háicha
17, 8-13
Ou amalecgua ha ojeity Israelgua ári Refidímpe. Moisés he’i Josuépe:
Eiporavo kuimba’e kuéra ha esẽ pyhareve eñorairõ amalecgua ndive. Che ajupíta yvyty ru’ãme, Tupä Ñandejára yvyra jekoha reheve.
Josué ojapo he’i haguéicha ichupe Moisés ha osẽ oñorairõ amalecgua ndive. Upe aja Moisés, Aarón ha Hur ojupi yvyty ru’ãme. Moisés ohupi aja ipo yvate, Israelgua ipu’aka amalec guáre. Omboguejy aja katu, amalecgua umi Israel guápe omboguevíva. Moisés katu ijyva kane’õ ha Upéma ramo Aarón ha Hur omoĩ ichupe ita oguapy haguã, ha’e kuéra katu oñemoĩ mokõive ijyke guio ojyva joko ichupe yvatévo. Upéicha opyta hikuái kuarahy oike peve. Josué ipu’aka amalecguare kyse pukúpe.
Tupä Ñandejára Ñe’ẽ.
SALMO ÑEMBOHOVÁI 120, 1-8
R. Tupä Ñandejára che pytyvõta.
Umi yvyty rehe ajesaupi ha che py’a pýpe ha’e:
Máva piko che pytyvõta?
Tupä Ñandejára che pytyvõta,
ha’e niko yvága ha yvy apohare. R.
Ha’e ndoheja mo’ãi ne pysyrỹi.
Upe nde rehe oñangarekóva ndokéiva araka’eve.
Ndokéiva térã ndokevýiva
upe Israel rehe oñangarekóva. R.
Tupä Ñandejára oñangarekóta nde rehe,
ha’e upe nde ypýpe oĩva ne pytyvõ haguã.
Árape kuarahy ndojapói chéne nde rehe mba’eve
térã jasy pyharekue. R.
Tupä Ñandejára ndoheja mo’ãi ojehu ndéve mba’eve ivaíva,
ha’e oñangarekóta nde rehe.
Ha’e oñangarekóta nde rehe resẽvo ha rejevývo,
ko’ágã guive opa ára peve. R.
Segunda lectura:
Ñahendúta Tupä Ñandejára Ñe’ẽ San Pablo ohai va’ekue ikuatia mokõiháme Timotéope 3, 14__4,2
Che ra’y rohayhu etéva:
Nde katu aníke araka’eve rejei umi mba’e reikuaáva ha reroviávagui. Nde niko reikuaa porã mávapa ne mbo’e va’ekue. Ne mandu’áke ne mitã guive reikuaaha Tupä Ñandejára Ñe’ẽ. Reikuaa ikatuha ne moarandu ha ikatuha ne pysyrõ rejerovia ramo Cristo Jesús rehe. Tupä Ñandejára Ñe’ẽ niko henyhẽ Tupä Ñandejára pu’akágui, ha iporã ñambo’e ha ñañe moñe’ẽ haguã ñande rapichápe, japoheko mbo’e ha ñaporo moarandu haguã hekopete. Upéicha ramo, pe Tupä Ñandejárape omomba’e guasúva noikotevẽ mo’ãi mba’eve ojapo haguã opa mba’e iporãva.
Tupä Ñandejára ha Cristo Jesús rérape, oútava Mburuvicha guasúicha ombojovake haguã oikove ha omanóvape, ajerure jevy jevy ndéve remo sarambi haguã pe marandu porã. Emoherakuãke ijahápe ndéve ha ija’ỹháme avei. Eñe’ẽ opavavépe ku oguerovia añete haguãicha pe eréva, eñemoñe’ẽ ha mbegue mbeguépe eheko mbo’e ichupekuéra.
Tupä Ñandejára Ñe’ẽ.
ALELUIA Heb 4, 12
Aleluia.
Tupä Ñandejára Ñe’ẽ niko oikove ha ipu’aka. ñande py’apy okañyvehápe, ha oipyguara ñane remiandu ha ñande py’a pota.
Aleluia.
EVANGELIO
Ko’ágä ñahendúta Ñandejára Jesucrísto rekove ha hemimbo’e San Lucas omombe’u háicha.
Pejapysaka porãtapa hese? 18, 1-8
Upe ramo Jesús omombe’u ichupekuéra peteï ñe’ẽ mbojoja, ombo’e haguã ichupekuéra oñembo’e va’erãha, ipy’a kangy’ỹ rehe.
He’i ichupekuéra:
“Oĩ va’ekue peteï távape peteï mbojovakehára ndo kyhyjéiva Tupä Ñandejáragui ha nomomba’éiva yvypórape. Ha upe táva upévape oĩ avei peteï kuña imenave’ỹva oguerekóva peteï ambuéndi ojoavyha, ha ohóva upe mbojovakehára rendápe ojerurévo ichupe ñepytyvõ rehe. Heta ára pukukue, upe mbojovakehára nohenduséi ichupe, upéi katu ojepy’amongeta: ‘Nda kyhyjéirõ jepe Tupä Ñandejáragui ha namomba’éi yvypórape, ko kuña imenave’ỹmava che moangekói oikóvo. Aipytyvõta ichupe anive haguã ou ha che mbyaju.’
Ha Ñandejára he’ive: “Péicha he’i pe mbojovakehára ñaña. Ha néi, Tupä Ñandejára nga’u piko noipytyvõ mo’ãi avei umi oiporavo va’ekuépe, ohenói asýva ichupe ára ha pyhare? Omoha’arõta piko? Ha’e peëme, oipytyvõ va’erãha pya’ete. Ha ou jevy vove Tupä Ñandejára ra’y ou va’ekue yvypóraicha, ojuhúne gueteripa jerovia ko yvy ape ári?”.
Ñandejára Jesucrísto Ñe’ẽ.